Tito 1 - Nuevo Testamento Romané 2007

Salami

¹ Me o Pablo, esluga e Devleko ta apostol e Jesukristoko, bichaldo letar te resen e llene kai si esvirime e Devletar kai o pachape ta kai o chachipe kai si ande so amen pacha,

² ta adurichara o zivoto ostade, soke o Del ni kojavel ta dia po alau omanglal ta ppenda kai ka del amen gua zivoto,

³ ta akana kai si orta o vreme, sikada pe alava e orbaia kai mukla mange o Del kai braduil amen.

⁴ E Titoke, kai si sargo mo chaurro chachimaia ando pachape kai si amen. O Del amaro Dad, ta o Jesukristo kai braduil amen te den tut po volipe ta pi pas.

O rado e Titoko ande Kreta

⁵ Kana muklem tut ande Kreta, cherdemle te lachare so muklana bi lachardo ta ande suako foro te ttove ppuren ande kkanlliri, gia sar ppendem chuke.

⁶ Iekke ppure morabi te na dosarel le niko sar zivil. Morabi te avel le samo iek romi, ta leke chaurre morabi te pachan ta te na ppenen lendar kai cheren o bilachipe o kai ni kanden.

⁷ Soke gua kai inllarel angle e kkanlliri leko rado si ande Devleke ezgode, ta goleke leko zivoto morabi te na avel dosardo nikatar, morabi te na istardon ta te na joliaol; te na aven matarne, ta te na marenpe, ta te na lel chari pe bilache ezgode.

⁸ Morabi te avel pachivalo e llenenchar kai aven te racharen ande leko cher, ta morabi te avel lacho, chacho, santo ta te llanel so cherel.

⁹ Morabi te pachal ande orba chachuni kai sikilo, te del zor i averen ando sasto sikadipe, ta te cherel te pachan e llene kai ni pachan ande so vou ppenel.

E poraukura kojamne

¹⁰ Soke si but llene kai ni pachan, ta mai but gola kai cheren e sirkunsision kai ppenen samo ezgode dile ta kojaven e llenen.

¹¹ Gole llenengo mui morabi te ppandenle, soke diliaren sa e llenen katar iek familia, ta sikaven so ni trubul, ta cherenle te len chari bilachimaia.

¹² Isto ande Kreta iek porauko lengo ppenda gia: “E llene kai zivin ande Kreta si kojamne, dive, jan but ta ni radin.”

¹³ Ta ppenda o chachipe; goleke de pe lende zurale te sastol lengo pachape

¹⁴ ta te na pachan ande paramiche kai cheren e judiura, ta ni ande llene kai den e zea karing o chachipe.

¹⁵ E llene kai si chache sa e ezgode si lenge chache; a e llene kai inai chache ta ni pachan, niso inai lenge chacho, soke lengi golli ta lenge mislura si melale.

¹⁶ Ppenen kai pinllaren e Devle, a prema e ezgode kai cheren ppenen kai iok, den joli ta ni kanden ta nasti cheren ni iek lachipe.