Santiago 3 - Nuevo Testamento Romané 2007

E chib

¹ Pplalalen; te na aven maskar tumende but kovacha, soke tumen llanen kai e kovacha ka aven mai dosarde.

² Saurre dukkava but droma; akana, te si iek lleno kai gazdaril pe pi chib, vou si orta ta i sai gazdaril pe pi esnaga.

³ Amen sai gazdari pe esnaga e grastengi samo te ttova o salvari pe lengo muia.

⁴ Ta i e bare llimie, kai e balavia zurale cheren len te miskonpe, a e kapitanura samo iekke minone kastea, inllaren len kai go kamen.

⁵ Isto gia e chib, kai ande esnaga si minoni, sai cherel bare ezgode. ¡Iek baro vos sai ppabol iekke minone iagaia!

⁶ E chib si sargo iek lliska. Si la but zor te cherel o bilachipe. Ta i sai meliarel sa amaro zivoto, ta te chudel amen ando tufano.

⁷ O manus sai gazdaril pe sa e zivirinie kai si; chiriklia, sapa, ta i gazdarisarda pe gola kai zivin ande mora,

⁸ a ni iek manus nasti gazdaril pe pi chib kai si iek bilachipe kai nasti achadol, ta si pperdi mundaripe.

⁹ Amen amare chibiaia blagosisara e Devle kai si amaro Dad, ta isto laia da armaia e manusen kai o Del cherda len prema sar si vou.

¹⁰ Isto e muiea amen blagosisara ta i da armaia. Pplalalen, gava nasti avelpe gia.

¹¹ Katar iek bunari nasti likel pai guglo ta i pai cherko.

¹² Pplalalen, isto gia, katar e simochina ni liken maslinke, ta katar o drak ni liken simochine, ta i katar iek bunari nasti likel pai guglo ta pai londo.

O bizaipe chachuno

¹³ Te si maskar tumende iek lleno bizai, te cherel o lachipe prostimaia, ta gia te sikadol lacho angla e llene.

¹⁴ A tumen te cheren sa e ezgode jolinaia; ondaka ka zivin tristome ta ni ka avel tumen ande so te cheren baripe, soke ni ka llan prema o chachipe.

¹⁵ Gua inai o bizaipe kai avel e Devletar, gua bizaipe avel e suetotar, avel katar o mislo e manuseko ta i katar o llavolo.

¹⁶ Soke kote kai si joli ta murzania, kote si e burkania, ta suako bilachipe;

¹⁷ A gola kai si len o bizaipe kai avel e Devletar, si briste, ni cheren o bilachipe, inai lenge drago e joli; si lenge zao katar gola kai nakken patnia, ta saurrenchar von si lache, si len pachape ta ni kojaven.

¹⁸ Ta gola kai roden e pas maskar e llene, ka avel lenge dini e pas ta o chachipe.