Santiago 2 - Nuevo Testamento Romané 2007

Ni iek mai baro averetar

¹ Ppalalen, tumen kai pachan ande amaro baro Gazda o Jesukristo, morabi te ttoven sama saurrenge.

² Mislin tumen kai iek barvalo lleno avel kote kai sen chidine, furiado ande patave barvalimake ta angrusti sunakuni ande leko nai, ta isto kote avel iek lleno chorro furiado ande patave purane.

³ Te avilen mai pachivale e barvalea neko e chorrea, ta ppenen e barvaleke: “Bes chuke kate kai si e mai lachi estolicha”, a e chorreke ppenen: “Achi kote pe porrne”, o “Bes chuke pe ppuv”;

⁴ ondaka tumen isto maskar tumende ttoven mai but sama nesave llenenge; ta ka aven sargo ogola kai chinen e kris e llenenge prema sar dikkon.

⁵ Pplalalen, asunen gava: O Del esvirisarda e chorren katar gava sueto te aven barvale ando pachape, ta te len e charoina kai vou ka del golen kai volin le, soke gala si e alava kai vou mukla;

⁶ a tumen, ni ttoven sama e chorrenge ¿soke cheren gia lenchar? ¿Ni llanen tumen kai e barvale murzin pe tumende, ta kai von ttoven tumen pe kris?

⁷ ¿Ni llanen tumen kai e barvale ni den sukar orba katar o Gazda?

⁸ Tumen, te cherden chachimaia so ppenel o glamno zakono prema sar ppenel ando Pisipe; blago tumenge ka avel. Gua si: “Volisar avere sar voli isto tu tut”

⁹ A te ttoden mai but sama iekkeke neko avereke, ondaka cheren o bilachipe ta tumen sen dosale angla o zakono e Devleko.

¹⁰ Soke vareko te cherel sa so ppenel o zakono a ni cherel iek lendar; gua si sargo kana ni kandel ni iek.

¹¹ Soke gua kai ppenda: “Na cheren o kurvaluko” i ppenda: “Na mundaren”. A te na chere kurvaluko, a te mundare, tu san iek lleno kai ni chere so ppenel o zakono e Devleko.

¹² Gia morabi te da orba, gia morabi te chera, soke ando llive e krisako o Del ka chinel amenge e kris e zakonoia katar o mukliardipe.

¹³ Soke sa gola kai inai lenge zao pala aver llene, ando llive e krisako, ni e Devleke ni ka avel zao lendar, soke sa gola kai si lenge zalba ka dobin ando llive e krisako.

Sar llangliolpe kai si tumen pachape

¹⁴ Pplalalen, ¿So dobil o lleno kai ppenel kai si le pachape ta ni cherel e Devleki buchi? ¿So mislin tumen; gua lleno ka braduilpe samo pala o pachape?

¹⁵ Te si iek pplal o iek ppei kai inai len patave te ttoven pe pete, ta inai len so te jan,

¹⁶ a iek tumendar ppenel lenge: “llan ande pas; na nakken sil, jan sogo kamen”, a ni del len so trubul len, ¿so mol gole lleneke leko pachape?

¹⁷ Isto gia o pachape si mulo kana ni cherdol e buchi e Devleki.

¹⁸ Vareko sai ppenel: “Tut si pachape, a me cherau e buchi e Devleki. Sikau mange cho pachape bi te chere e buchi e Devleki, a me ka sikavau chuke mo pachape pala e buchi e Devleki kai me cherau.”

¹⁹ Tu pacha kai o Del si iek, sukar chere; i e llavolura pachan, ta izdran daratar.

²⁰ Dilea, ¿llane kai kana ni cheren so ppenel o zakono e Devleko, o pachape si mulo?

²¹ O Del llinda chacho e Abraame amaro dad, kana dia kurbano pe chaurre e Isaake upral po altar.

²² E vera e Abraameki kai saia le ando Del, sikadili ande so cherda, goleke leko pachape lachardol cheres e buchi.

²³ Ondaka cherdilo so ppenel o Pisipe: “O Abraam pachaia e Devle, goleke o Del llindale chacho.” Ta ikkarde e Abraame: amal e Devleko.

²⁴ Dikken, o Del llinel orta e manuse kana o manus cherel so ppenel o zakono, a na samo pala o pachape.

²⁵ Isto gia e Rahab, e kurvichka; o Del llindala orta pala e buchi kai cherda, soke voi mukla te racharen late e llene kai sea bichalde ta pomozisarda len te nasen katar aver drom.

²⁶ Soke sargo iek esnaga kai kana inai la duo si muli, isto gia o pachape kana inai le buchi si mulo.