Romanos 3 - Nuevo Testamento Romané 2007

¹ Goleke ¿so mol e manuseke te avel judio? ¿mol la vareso e sirkunsision?

² Ea, pe suako ezgoda, soke mai anglal lende o Del dia pe alava.

³ Llana kai nesave judiura ni ttode sama katar e Devleke alava, a o Del ni mukla te avel chacho lenchar cheres nesave llene kai ni pachaie.

⁴ Soke i te avena kojamne e manusa, o Del suako drom ppenel o chachipe. Ando Pisipe ppenel: “Ka ppenen kai san chacho pe chi orba, Ta kana ka den tut pe kris, tu ka dobi.”

⁵ Soke sa o bilachipe kai chera, sikavel kai o Del si chacho kana joliaol ta dukkavel amen ¿a kana dukkavel amen, ka ppene kai o Del inai chacho?

⁶ ¡iok! O Del te na aviloa chacho, ¿sar sai krisil e sueto?

⁷ Vareko sai mislilpe kai inai sukar te dukkavel le o Del, soke leko kojaipe cherel te dikkol bristomaia o chachipe e Devleko, a te si gia ¿soke akana sem dino pe kris sargo iek bilacho?

⁸ A te avena gala ezgode gia, ondaka sai ppena kai sai chera o bilachipe te sai avel o lachipe; gaia si e buna kai ikanen pe mande ta von ppenen kai me sikavau gala ezgode.

Inai ni iek chacho

⁹ ¿A so? ¿gaia orba ppenel kai amen e judiura sam mai lache neko sa ogola llene? ¡iok! Soke sikadam kai saurre sam bilache, e judiura ta i gola kai inai judiura.

¹⁰ Soke gia si pisime: “¡Inai ni iek te avel chacho!

¹¹ Inai niko te acharel; inai niko te rodel e Devle.

¹² Saurre lleletar po bilacho drom; Saurre cherdile bilache. ¡Inai niko te cherel o lachipe! ¡Inai ni iek!

¹³ Lengo gurtano si sargo iek limori putardo; lengi chib si kojamni. Pe alavenchar dukkaven sargo iek sap kana dandarel

¹⁴ Ta lengo mui si pperdo armaia ta zalba.

¹⁵ But oma joliaon ta vareka mundaren;

¹⁶ kai go llan muken zatrania,

¹⁷ ta ni pinllarde o drom kai si le pas.

¹⁸ Ni daran e Devletar.”

¹⁹ Llana kai sa so ppenel o lil katar o zakono ppenel le golenge kai si telal tala o zakono, te sai ppangliol suako mui, ta sa o sueto te llanel kai si dosalo angla o Del;

²⁰ Soke niko nasti ka avel llindo chacho angla o Del samo soke kandel so ppenel o zakono; soke o zakono samo sikavel amenge kai sam bilache.

²¹ A akana bi e zakonoia, o Del sikada amenge sar llinel amen chache, ta sikadale amenge isto e zakonoia ta e poraukenchar.

²² O Del llinel chache sa golen kai pachan ando Jesukristo ni chitilpe dal si judiura o inai judiura:

²³ saurre cherde o bilachipe ta si dur katar o Del.

²⁴ A o Del ande po volipe ta llabe llinel amen chache, ta cheres o Kristo Jesus braduisarda amen katar e duk kai saia te la pala amaro bilachipe.

²⁵ Goleke o Del bichalda pe Chave te avel amaro kurbano ta te chordol leko rat. A te pachaia kai o Jesus mulo pala amende, o Del ka prostil amen. Gia si sar mangla o Del te sikavel sar llinel amen chache soke prostisarda amen o bilachipe kai cherdam omanglal,

²⁶ soke vou mangla te sikavel ande gava vreme po chachipe ta te llinel amen chache gia sar si vou chacho ta llinel chache sa golen kai pachan ando Jesus.

²⁷ ¿Kai talo akana o baripe e manuseko angla o Del? ¡gua baripe achel mulo! ¿Pala so? ¿Pala o zakono? Iok, pala o pachape.

²⁸ Goleke pala sa gala ezgode sai ppena: kai o Del llinel chacho e manuse cheres o pachape bi te cherel bucha e zakonoke.

²⁹ ¿A so o Del si samo o Del e judionengo? ¡iok! o Del si saurrenge, e judionengo ta i golengo kai inai judiura.

³⁰ Soke samo iek Del si: o Del kai llinel chache sa golen kai pachan ando Jesukristo ta ni ttovel sama dal si judiura o inai judiura.

³¹ A te pachaia ando Jesus galea ni ppena kai o zakono ni trubul amen, soke te pachaia ande lete o zakono ios mai mol.