Mateo 9 - Nuevo Testamento Romané 2007

O Jesus sastarel iekke manuse kai nasti ppirela

¹ Mapalal o Jesus likisto ande llimia, nakklo pe o goia rig katar e mora ta avilo kai po foro.

² Kote inllarde lete iekke llene kai nasti ppirela inzardo ande iek postelia; kana dikkla o Jesus lengo pachape, ppenda e bangeke: —Chaurrea, cher chuke zor; cho bilachipe si prostime.

³ Ondaka nesave kovacha e zakonoke mislisaile gia: “Gava lleno kusel e Devle gole alavenchar.”

⁴ A o Jesus llangla so mislina, ta puchla len: —¿Soke mislin tumen gia? —¿Soke mislin tumen gia baro bilachipe ande tumaro lio?

⁵ ¿So si mai lesno, te ppendol: ‘Cho bilachipe si prostime’, o te ppendol: ‘Uste ta ppir’?

⁶ Goleke ka sikavau tumenge kai o Chavo e manuseko si le e zor pe ppuv te prostil o bilachipe. Ondaka ppenda e bangeke: —Uste, le chi postelia ta llatar ande cho cher.

⁷ Ta o lleno kai nasti ppirela ustilo ta llelotar kai po cher.

⁸ O sueto chudisailo kana dikkla goia ezgoda ta blagosina e Devle kai diaia gia bari zor e manusen.

O Jesus ikkarel e Mateo

⁹ Kana o Jesus llelotar kotar, dikkla iekke llene kai ikkardola Mateo kai besela po stali, kote kai pochindol e love e ppuviake ta o Jesus ppenda leke: —Aide pala ma. Ondaka o Mateo ustilo ta llelo pala le.

¹⁰ Iek llive kai o Jesus saia besindo pe sinia ando cher, ta but publikanura ta bilache llene kai avilea, i von besle pe sinia e Jesusea ta leke disipulonenchar.

¹¹ Kana dikkle gava e fariseura, puchle e disipulonen: —¿Soke tumaro kovachi jal e publikanonenchar ta i e bilache llenenchar?

¹² Kana o Jesus asunda gaia orba, ppenda lenge: —E saste ni trubul len doktori samo e nasualen.

¹³ Llan tumen ta sikon so si gala alava: “zalba mangau a na kurbanura,” soke ni avilem te ikkarau lachen, avilem te ikkarau e bilachen te sai aven keime.

Puchen katar o alluno

¹⁴ Ondaka avile kai o Jesus e disipulura katar o Juan kai kristila ta puchle le: —¿Soke amen ta i e fariseura alluni a che disipulura ni cherenle?

¹⁵ O Jesus ppenda lenge: —¿Sai aven zalosne e llene kai si ikkarde pe iek biau kana o chavo kai zinilpe si lenchar? A ka avel o llive kana ka len lendar gole kai zinilpe, ondaka von ka allunin.

¹⁶ “Niko ni ttovel iek kotor chiti nevo pe iek fistano purano, soke o kotor o nevo chikniol ta chirdel, ta cherel te chindol ios mai but o chiti o purano.

¹⁷ Ta ni ttodol e mol nevi ande morcha purane, soke e morcha pparron ta gia e mol ta e morcha jasaon; Goleke si te ttodol e mol e nevi ande morcha neve.” Ta gia e dui ezgode te achen pe iek ttan.

E chorri e Jairoki ta e diskinia kai peravela rat

¹⁸ Kana o Jesus ppenela lenge gala orbe, avilo lete iek lleno katar gazda e judionenge ta dia changa angla le, ta ppenda leke: —Mi chorri muli; akana aide ta ttou cho va pe la ta ka zivil.

¹⁹ O Jesus ustilo ta llelo pala le pe disipulonenchar.

²⁰ Ta kana vou llala, iek diskinia nasuali kai peravela rat cherela desudui burs, avili palal pala o Jesus ta dodisarda leko gertachi.

²¹ Soke ppenela voi peke: Samo te dodiu leko gertachi ka sastivau.

²² Ondaka o Jesus boldinailo ta dikkla pe late, ta ppenda lake: —Cher chuke zor chorrie, cho pachape sastarda tut. Ta e diskinia sastili isto ande gua saiato.

²³ Kana o Jesus dia ando cher katar o gazda e judionengo, ta kana dikkla golen kai basalena e taturuge ta o sueto kai urkila ta rovena.

²⁴ Ppenda lenge: —Len tumen katar soke e minoni inai muli, voi sovel. A von marena letar espurnia.

²⁵ A kana tradie e sueto avri, dia andre ta lia e minona e vastetar ta voi ustili.

²⁶ Ta lleli gaia viasta pe sa goia ppuv.

O Jesus sastarel duie korren

²⁷ Kana o Jesus likisto kotar llele pala le dui korre kai urkina ta ppenena leke: —¡Te avel chuke zalba amendar Chavo e Davideko!

²⁸ Kana avilo kai o cher avile pasa le e korre, ta o Jesus pucha len: —¿Tumen pachan kai sai cherau gaia ezgoda? —Von ppende leke: Ea Gazda.

²⁹ Ondaka dodisarda lenge akka ta ppenda: —Gia sar si tumaro pachape, gia te cherdol tumenge.

³⁰ Ta e korre dikkle. A o Jesus ppenda lenge te na llanel le niko.

³¹ A von kana likiste kotar ppende saurrenge sa e bare ezgode kai o Jesus cherela.

Iek nemao del orba

³² Kana von llanatar, ande kai o Jesus iekke nemave kai saia o llavolo ande lete.

³³ Kana tradia e llavolo letar, o nemao dia orba, a o sueto chudilape ta ppenela: —¡Nikada ni dikklam iek ezgoda sargo gaia ando Israel!

³⁴ A e fariseura ppenena: —Isto o gazda e llavolonengo diale e zor te chudel avri e llavolonen.

O Jesus avila leke zao katar o sueto

³⁵ O Jesus ppirela sa e forura ta i e forichura minone, ta sikavela ande lenge kkanllira e judionenge, ta dela orba katar e lachi viasta e charoinaki ta sastarela suako nasualipe ta suako duk e foroki.

³⁶ Kana dikkla kai sea but llene avila leke zao lendar, soke ni saia len niko ta sea rispime sargo e bakre kai inai len chobano.

³⁷ Ondaka ppenda pe disipulonenge: —Chachimaia o lliu si but a cherricha e manusa kai radin.

³⁸ Goleke molintumen e Gazdake te bichalel llenen kai radin te chiden o lliu.