Mateo 8 - Nuevo Testamento Romané 2007

O Jesus sastarel iekke llene katar e lepra

¹ Kana fulisto o Jesus katar o burdo, but sueto llala pala le.

² Ta avilo pasa le iek leproso kai dia changa angla le, ta ppenda leke: —Gazda, te mangea, sai sastare man katar mo nasualipe.

³ O Jesus dodisarda le pe vastea ta ppenda: —Mangau. ¡Sastiu! Ta isto kote achilo chisto katar po nasualipe.

⁴ Ondaka o Jesus ppenda leke: —Na ppen nikake so avilape tuia, lla ta sikado e popoke, ta de kurbano pala cho sastipe sar ppenda o Moises te cheren, te sai dikken e popura kai sastilan.

O Jesus sastarel iekke esluga katar iek boñiko

⁵ Kana o Jesus dia ando Kafernaum, avilo pasa le iek boñiko kai molilape leke.

⁶ Ta ppenela: —Gazda, mo esluga si ande postelia po meripe ando cher ta nasti ppirel ta dukkal le but.

⁷ O Jesus ppenda leke: —Me ka llau ta ka sastarau le.

⁸ A o boñiko ppenda leke: —Gazda, ni sem manus lacho te de ande mo cher; samo ppen o alau ta mo esluga ka sastol.

⁹ Soke i pe mande gazdarin ta i me gazdariu, ta si tala mo va boñikura, ta ppenau goleke lla, ta vou llal; a ogoleke: aide; ta vou avel. A kana me ppenau me eslugake cher gaia ezgoda, vou cherel la.

¹⁰ Kana asunda le o Jesus chudisailo ta ppenda e llenenge kai llana pala lete: —Chachimaia ppenau tumenge ka ni ando Israel ni maladem gia baro pachape sargo gale lleneko.

¹¹ Ppenau tumenge kai but llene katar o oriente ta katar o oksidente ka besen e Abraamea, e Isaakea ta i e Jakoboia ande charoina e milosoki;

¹² a e chave e charoinake ka aven tradine avri ando truñariko; kote ka avel o roipe ta e bari dar.

¹³ Ondaka o Jesus ppenda e boñikoke: —Llatar, ta gia sar pachaian te cherdol chuke. Ta leko esluga sastilo isto ande gua saiato.

O Jesus sastarel esasui e Pedroki

¹⁴ O Jesus llelo kai o cher e Pedroko, ta dikkla kai leki sasui saia ande postelia ta ppabola nasualimatar.

¹⁵ Ondaka dodisarda lako va ta sastili; voi ustili, ta radila leke.

O Jesus sastarel buten nasualen

¹⁶ Kana peli e riat inllarde lete bute llenen kai sea llavoluria ande lende, ta samo e alavea tradia avri e llavolonen ta sastarda sa e nasualen.

¹⁷ Gia cherdilo so ppendaia o porauko Isaias: “Isto vou lia amaro nasualipe ta lia amare dukka.”

Gola kai mangena te llan pala o Jesus

¹⁸ Kana o Jesus dikkla kai truial letar saia but sueto ppenda te nakken pe o goia rig katar e mora e Galileaki.

¹⁹ Ta avilo pasa le iek kovachi e zakonoko ta ppenda leke: —Kovachi, ka llau pala tu kai go tu llaia.

²⁰ O Jesus ppenda leke: —E lisiche si len kai te gurudon, ta i e chiriklia e milosoke si len kuibura; a o Chavo e manuseko inai le kai te ttovel po soro.

²¹ Aver katar leke disipulura ppenda leke: —Gazda muk mai anglal te llau te prajou me dade.

²² O Jesus ppenda leke: —Aide pala ma muk e llenen kai si mule te prajon pire mulen.

O Jesus achavel e balavia

²³ O Jesus likisto ande llimia ta leke disipulura llele pala le.

²⁴ Ta vazdinaili pe mora iek balau gia bari kai e valura ucharena e llimia; a o Jesus sovela.

²⁵ Ondaka avile pasa le leke disipulura ta llungade le, ta ppenena: —¡Gazda, braduisar amen, ka tasiva!

²⁶ Vou ppenda lenge: —¿Soke daran manusalen kai si tumen gia cherricha pachape? Ondaka, ustilo ta dia pe balavia ta i pe mora, ta avilape iek baro esmiro.

²⁷ A e manusa chudinape ta ppenena: —¿Savo manus si gava kai llik e balavia ta i e mora kandel le?

E bengale e Gadarake

²⁸ Kana avilo pe o goia rig katar e mora kai e ppuv katar e gadarenura, dui llene kai sea ande lende llavolura, likiste katar e limoria ta avile lete. Von sea gia dive kai niko nasti nakkela katar gua drom.

²⁹ Ta urkina ta ppenena: —¡So si chuke amenchar, Jesus Chavo e Devleko! ¿Avilan kate te pati amen mai oma katar amaro vreme?

³⁰ Kotar dur lendar sea but bale kai jana,

³¹ a e llavoluria molisaile leke ta ppenena: —Te ikandan amen katar gala llene, muk amen te da ande gola bale.

³² Vou ppenda lenge: —Llan. Von likiste katar gola llene ta die ande gola bale; ondaka sa gola bale prastie karing e mora katar iek jar, ta sa mule ando pai.

³³ E llene kai arakkena e balen nasle, ta kana avile ando foro ppende sa so nakklaia e llenenchar kai saia e llavoluria ande lende.

³⁴ Ondaka sa o foro llelo kote kai saia o Jesus, ta kana dikkle le molisaile leke te llaltar katar lengi ppuv.