Mateo 4 - Nuevo Testamento Romané 2007

O Jesus zumado

¹ Ondaka o Duo e Devleko inllarda e Jesuse po pusto te sai zumavel le o llavolo.

² Kote achilo saranda llive ta saranda racha, ta bokkailo.

³ Ondaka o llavolo avilo pasa le, ta ppenda leke: —Te san chachimaia o Chavo e Devleko, ppen gale barrenge te cherdon marrno.

⁴ A o Jesus ppenda leke: —Ando Pisipe ppenel gia: ‘Na samo e marnetar ka zivil o manus, o manus zivil i katar suako alau kai likel katar e Devleko mui.’

⁵ Ondaka o llavolo inllarda le ando santo foro katar o Jerusalem ta ttoda le upral po ttan mai vazdino katar o cher e Devleko,

⁶ ta ppenda leke: —Te san chachimaia o Chavo e Devleko, chude tut tele, soke ando Pisipe ppenel gia: ‘O Del ka bichalel pe suechonen te arakken tut, ta ka vazden tut pe vastenchar te na eskombal cho porrno pe ni iek barr.’

⁷ A o Jesus ppenda leke: —Ta i ando Pisipe ppenel gia: ‘Na ttou ando zumadipe e Gazda kai si cho Del.’

⁸ Mapalal o llavolo inllarda le pe iek burdo but baro, ta sikada leke sa e ppuvia e suetoke ta lengo baripe,

⁹ ta ppenda leke: —Me ka dau tut sa gala ezgode, te dea changa ta te blagosia man.

¹⁰ A o Jesus ppenda leke: —Llatar llavolo, soke ando Pisipe ppenel gia: ‘Blagosisar e Gazda kai si cho Del, ta radisar samo leke.’

¹¹ Ondaka o llavolo mukla le, ta avile e suechura te pomozin le.

E Jesuseko rado llal angle

¹² Kana o Jesus asunda kai ppangle e Juane, irisailo ande Galilea.

¹³ Ta ni achilo ando Nazaret, vou llelo ando Kafernaum, kote beslo ande iek foro kai saia pasa e mora; ande ppuv katar o Zabulon ta katar o Neftali.

¹⁴ Gala ezgode nakkle te sai cherdol so ppendaia o porauko o Isaias kana ppenda:

¹⁵ “E ppuv katar o Zabulon, ta e ppuv katar o Neftali; o drom kai llal kai e mora pe o goia rig katar o Jordan ande Galilea, kote kai zivin e llene kai inai judiura.

¹⁶ O foro kai besela ando truñariko, dikkla iek baro villelo; gola kai besena ando truñariko merimako, o villelo sikadilo lenge.”

¹⁷ Sar kotar o Jesus ttoda te ppenel: “Irin tumen katar tumare bilache droma, soke e charoina e Devleki si pase.”

O Jesus ikkarel staren macharia

¹⁸ O Jesus ppirela pasa e mora e Galileaki ta dikkla duie pplalen; e Simono, kai ikkarena le Pedro ta e Andrese. Von sea macharia ta chudena e mreza ande mora.

¹⁹ Ta o Jesus ppenda lenge: —Aven pala ma ta ka cherau tumen macharia manusenge.

²⁰ Ondaka von mukle isto kote pe mreze, ta lleletar lea.

²¹ O Jesus llelo mai angle ta dikkla duie pplalen ios: E Santiago ta e Juane chave e Zebedeoke, von sea pe dadea ande iek llimia ta lacharena pe mreze ta o Jesus ikkarda i len,

²² Ta isto kote kana ikkarda len, mukle e llimia ta i pe dade ta lleletar lea.

O Jesus sikavel e sueto

²³ O Jesus llala ande sa e ppuv katar e Galilea, ta sikavela ande kkanllira e judionenge, ta dela orba katar e lachi viasta, katar e charoina, ta i sastarela e manusen katar sa lengo nasualipe ta i katar sa lenge dukka kai saia len ando foro.

²⁴ Ta lleli leki viasta ande sa e ppuv katar e Siria, ta anena lete sa golen kai sea nasuale o kai dukkala len vareso, ta i golen kai sea e llavolura ande lende, ta i gola kai perena bengendar, ta i golen kai nasti ppirena, ta o Jesus sastarela len.

²⁵ Pala le llala but sueto katar e Galilea, katar e Dekapolis, katar o Jerusalem, katar e Judea, ta i katar o goia rig katar o Jordan.