Mateo 3 - Nuevo Testamento Romané 2007

O Juan gua kai kristila

¹ Nakkle e bursa ta o Juan gua kai kristila sikadilo po pusto katar e Judea.

² Ta ppenela: “¡Irin tumen katar tumare bilache droma soke e charoina e Devleki si pase!”

³ O porauko o Isaias dela orba katar o Juan kana ppenda: “iek lleno urkil po pusto: Lacharen o drom e Gazdako; putaren leke iek drom orta.”

⁴ E Juaneke patave sea cherde katar e bal e devake, ta saia le iek kavisi morchako, ta leko jape saia langoste ta aullin kai rodela pe burdura.

⁵ Sa e llene katar o Jerusalem ta e llene katar e ppuv e Judeaki, ta katar sa e forura kai si truial katar o Jordan llana te asunen le.

⁶ Ta ppenena sa po bilachipe, ta o Juan kristisarela len ando pai katar e len kai ikkardol Jordan.

⁷ Kana dikkla vou kai but katar e fariseura ta i katar e saduseura avena kai leko kristope, ppenda lenge: “¡Vicha sapengi! ¿Ko ppenda tumenge kai ka nasen katar e bari patnia kai ka avel?

⁸ Cheren ezgode te sai dikkol bristomaia kai irisailen kai o Gazda,

⁹ na istardon ta na ppenen isto tumenge: ‘Amen sam katar e vicha e Abraameki.’ Soke chachimaia ppenau tumenge kai llik gale barren o Del sai cherel len vicha e Abraameki.

¹⁰ O tover si ttodo te chindol lea e kasta llik katar lenge zile. Suako kas kai ni del lache septelie chindol ta chudiniaol ande iag.

¹¹ Me, chachimaia kristiu tumen e paiea te sai irin tumen katar tumare bilache droma. A gua kai avel mapalal mandar, vou si mai zuralo neko me, kai ni sem lacho ni te inllarau leke sinele. Vou ka kristil tumen e Santone Duoia ta e iagaia.

¹² E pala si ande leko va, ta ka chistol o lliu ta ka fulavel le katar e char e suki. Ta ka guruvel po lliu ando cher kote kai gurudol o lliu, a e char suki ka ppabarel la ande iek iag kai nikada ni merel.”

O kristope e Jesuseko

¹³ Ondaka o Jesus avilo katar e Galilea kai e len katar o Jordan, kote kai saia o Juan te sai avel kristime letar.

¹⁴ A o Juan ni kamela, ta ppenela: —Tu trubul te kristo man; ¿A tu ave mande?

¹⁵ O Jesus ppenda leke: —Muk te avelpe gia akana, soke gia si mai sukar te chera sa so si orta angla o Del. Ondaka o Juan mukla le.

¹⁶ Kana o Jesus kristisailo, likisto katar o pai ta o miloso putailo leke ta dikkla kai o Duo e Devleko fuliela sargo iek gulubo upral pe lete.

¹⁷ Ondaka asundilo iek avazi katar o miloso kai ppenela: “Gava si mo Chaurro kai voliu le.”