Mateo 28 - Nuevo Testamento Romané 2007

O Jesus ustel katar e meripe

¹ Kana nakklo o sabado kana llivosaola o purvo llive, e Maria Magdalena ta o goia Maria llele te dikken o limori.

² Ta ondaka dermosaili e ppuv but zurale soke iek suecho e Devleko fulisto katar o miloso ta ikanda o barr kai saia po udar katar o limori, ta beslo upral po barr.

³ O suecho saia sargo iek esterlicha ta leke patave parne sargo o lliu.

⁴ E boñikura izdraie daratar ta achile sargo mule.

⁵ A o suecho ppenda e diskinienge: —Tumen na daran soke me llanau kai tumen roden e Jesuse kai krustosarde.

⁶ Vou inai kate soke ustilo katar o meripe gia sar ppendaia; aven dikken kote kai ttode e Gazda.

⁷ Akana llan oma ta ppenen leke disipulonenge kai ustilo katar o meripe ta llal angla tumende ande Galilea, kote ka dikken le; gala alava me saia te ppenau tumenge;

O Jesus sikadol e diskinienge

⁸ Ondaka von lleletar daraia katar o limori ta i bare veselimaia lleletar prastindo te ppenen e disipulonenge.

⁹ A kana von llana te ppenen e disipulonenge, o Jesus llelo te maladol lenchar ta ppenda lenge: Salami; a von avile pase pasa leke porrne ta dodisardelen ta blagosisarde le.

¹⁰ Ondaka o Jesus ppenda lenge: —Na daran llan ppenen e viasta me pplalorrenge te sai llan ande Galilea ta kote ka dikken man.

E boñikura bichindon pala e love

¹¹ Kana von llana nesave katar e boñikuria llele ando foro ta ppende e mai preche poponenge sa e ezgode kai nakklea.

¹² Von chidinaile e ppurenchar ta achile pe orba ta die but love e boñikonen.

¹³ Ta ppende lenge: —Tumen ka ppenen gia kai leke disipulura avile orachaia ta vazdiele kana amen sovaia.

¹⁴ A te asunda gava Pilato amen ka ppena leke te na cherel tumenge niso.

¹⁵ Von lie e love ta cherde isto gia sar ppendea lenge; ta gaia si e viasta kai lleli maskar e judiura llik allive.

¹⁶ A e desuiek disipulura lleletar ande Galilea, po burdo kote kai o Jesus ppendaia lenge.

¹⁷ Kana dikkle e Jesuse blagosisarde le, a nesave ni pachana.

Llan te cheren disipulura

¹⁸ O Jesus avilo mai pase ta dia lenchar orba ta ppenda lenge: Sa e zor si dini mange ando miloso ta i pe ppuv.

¹⁹ Goleke llan ta cheren disipulura pe sa e ppuvia ta kristin len ando anau e Dadeko e Chaveko ta ando Santone Duoko.

²⁰ Ta sikaven len te arakken sa ezgode kai ppendem te cheren, ta me sem tumenchar suako llive llik o son e suetoko. Gia te avelpe.