Mateo 26 - Nuevo Testamento Romané 2007

Sar diepe orba te ppanden e Jesuse

¹ Kana o Jesus dia sa gala orbe, ppenda pe disipulonenge:

² —Gia sar tumen llanen, katar dui llive ios ka avel e Paskua, ta o Chavo e manuseko ka inllaren le te kruston le.

³ Ondaka e mai preche popura chidinaile ando cher e Kaifaseko, o mai baro popo,

⁴ ta achile pe orba te ppanden e Jesuse kojaimaia, ta te mundaren le.

⁵ Ta ppenena: —Na pe Paskua te na joliaol o foro.

Iek diskinia chudel meriso po Jesus

⁶ O Jesus saia ande Betania, ando cher e Simonoko, kai ikkarena le o leproso;

⁷ ta avili iek diskinia kai inllarela iek taso alabastrako pperdo meriso kai saia but kuch. Kana o Jesus saia po stali, voi ttoda o meriso upral pe leko soro.

⁸ E disipulura, kana dikkle jolaile ta ttodepe te ppenen: —¿Soke chuden o meriso?

⁹ Gava meriso sai bichindeale pe but love, te pomozilpe gole lovenchar e llenen kai si chorre.

¹⁰ O Jesus asunda, ta ppenda lenge: —¿Soke cheren gia gale diskiniaia? Voi cherda manchar iek lachi ezgoda.

¹¹ Soke e chorre ka aven suako llive tumenchar, a me ni ka avau suako llive tumenchar.

¹² So cherda gaia diskinia, kana chudia pe ma gava meriso, gua si kai voi lacharel man e merimake.

¹³ Chachimaia ppenau tumenge kai ande varesavi ppuv kana ka ppenen gaia lachi viasta, ka den orba i katar so cherda gaia diskinia, ta gia ka denpe golli latar.

O Jesus si bichindo

¹⁴ Iek katar e desudui disipulura, kai ikkardola Judas Iskariote, llelo te dikkel e mai preche poponen.

¹⁵ Ta ppenda lenge: —¿Pe gachin mangen te den man, ta me ka dau tumen e Jesuse? Von ppende leke pe gachin ka den le: Tranda tolaria rupune.

¹⁶ Ta kotar angle vou rodela te sai ppandel e Jesuse.

E sinia e Gazdaki

¹⁷ O purvo llive katar e eslava kana jalpe o marrno kai inai le levadura, e disipulura avile pasa o Jesus ta puchle le: —¿Kai mange te lachara e sinia katar e Paskua?

¹⁸ Vou ppenda lenge: —Llan ando foro, kai iek lleno ta ppenen leke: ‘O Kovachi ppenel: Mo vreme si pase, ta llau kai cho cher te nakkau e Paskua me disipulonenchar.’

¹⁹ E disipulura cherde gia sar o Jesus ppenda lenge, ta lacharde e sinia katar e Paskua.

²⁰ Kana peli e riat, o Jesus saia pe sinia pe desuduie disipulonenchar.

²¹ Ta kana von jana, ppenda lenge: —Chachimaia ppenau tumenge iek tumendar ka bichinel man.

²² Von tristosaile but, ta ttode te puchen le: —Gazda ¿Sem me?

²³ O Jesus ppenda lenge: —Gua kai chingarel o marrno isto ande gua charo kai me chingarau, gua ka bichinel man.

²⁴ O Chavo e manuseko morabi te llal po drom kai ppenel o Pisipe; a tesko goleke kai bichinel le. Mai sukar avilaia leke te na biandiloia.

²⁵ Ondaka o Judas gua kai mangela te bichinel le, puchla le: —Gazda, ¿Sai avelpe kai sem me? —O Jesus ppenda: Tu ppendanle, gua ppenda leke o Jesus.

²⁶ Kana jana, o Jesus lia o marrno ta dia fala e Devle, ppagla le ta diale kai e disipulura, ta ppenda: —Jan; gaia si mi esnaga.

²⁷ Mapalal lia iek taso, dia fala e Devle, diale lende ta ppenda: Pien saurre katar gava taso,

²⁸ gava si mo rat katar o nevo alau, kai chordol pala but llene te sai aven prostime katar o bilachipe.

²⁹ A ppenau tumenge kai ni ka piau ios katar gaia septelia drakkaki lligo ni ka avel o llive kana ka piau tumenchar e nevi mol ande charoina me Dadeki.

O Jesus ppenel kai o Pedro ka ppenel kai ni pinllarel le

³⁰ Kana von llilabie e salmura, lleletar kai o burdo e Maslinkengo,

³¹ Ondaka o Jesus ppenda lenge: —Sa tumen ka jasaren o pachape ande ma gaia riat. Soke gia si pisime: ‘Ka mundarau e chobano ta e bakre ka aven rispime.’

³² A kana me ka ustau katar o meripe, ka llau ande Galilea mai oma tumendar.

³³ O Pedro ppenda leke: —A sa te jasarena o pachape ande tute, me ni ka jasaraule.

³⁴ O Jesus ppenda leke: —Chachimaia ppenau chuke kai isto gaia riat mai anglal te basel o basno ka ppene trin droma kai ni pinllare man.

³⁵ O Pedro ppenda: —I te merava tuia, ni ka ppenau kai ni pinllarau tut. Ta sa e disipulura ppenena isto gia.

O Jesus molilpe ando Jetsemani

³⁶ Mapalal o Jesus llelo pe disipulonenchar pe iek rig kai ikkardol Jetsemani, ta ppenda lenge: —Besen kate, kai me llau te moliuman.

³⁷ Ta inllarda pea e Pedro ta e duie chaven e Zebedeoke, ta tristosailo but ta i brigisailo.

³⁸ Ondaka o Jesus ppenda lenge: —Si ande mo zivoto iek zalba merimaki. Achen tumen kate, ta achen llungade manchar.

³⁹ Ondaka o Jesus llelo mai angle, bangilo llik te ttovel po chikat pe ppuv, ta ppenda molimaia: Dade, te sai avelpe, le mandar gaia buka cherki; a te na cherdol so me mangau, te cherdol so tu mange.

⁴⁰ O Jesus irisailo oma kote kai sea e disipulura, ta malada len kai sovena ta ppenda e Pedroke: —¿Nasti achilen iek saiato llungade manchar?

⁴¹ Achen llungade ta molintumen, te na peren ando zumadipe. Tumen mangen, a e esnaga inai la zor.

⁴² Pale o duito llelotar, ta molisailo gia: “Dade, te nasti lelpe mandar gaia duk kai si te nakkau, te cherdol chi volia.”

⁴³ Kana irisailo, malada pale kai e disipulura sovena, soke lenge akka ppangliona lindratar.

⁴⁴ Mukla len ta llelo te molilpe o trito drom, ta ppenda isto gola alava.

⁴⁵ Ondaka irisailo kai sea e disipulura, ta ppenda lenge: —¿Pale ttoden tumen te soven? Avilo o vreme kai o Chavo e manuseko ka avel dino ande va e bilachenge.

⁴⁶ Usten, aventar; etalo pase gua kai ka bichinel man.

Kana ppangle e Jesuse

⁴⁷ O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura ta i katar e ppure e foroke.

⁴⁸ O Judas, gua kai ppukavela le, ppendaia lenge gia: “Gole kai me ka chumidau, gua si; ppanden le.”

⁴⁹ Goleke, kana avilo pasa o Jesus ppenda: —¡Lachi chi riat kovachi! Ta chumidia le.

⁵⁰ O Jesus ppenda leke: —Amala, so avilan te chere, cherle. Ondaka e llene avile pasa le, ta ttode o va pe lete ta ppangle le.

⁵¹ Kana nakkena gala ezgode, iek lleno kai saia e Jesusea ikanda po jarni ta chinda o kan katar iek esluga e mai bare popoko.

⁵² O Jesus ppenda leke: —Guruv cho jarni pe pi rig. Soke sa gola kai marenpe e jarniea isto e jarniea ka meren.

⁵³ ¿Ni llane kai isto me sai mangau me Dadetar ta vou isto akana sai bichalel mange desudui milie suechura?

⁵⁴ A te cherava gaia ezgoda ¿sar ka cherdon e alava kai si pisime?

⁵⁵ Ondaka o Jesus ppenda e llenenge: —¿Soke tumen avilen jarnienchar ta kastenchar te ppanden man sargo kana me sem iek chor? Suako llive sikavava ando cher e Devleko ta nikada ni ppanglen man.

⁵⁶ A sa gala ezgode nakken te sai cherdol gia sar ppende e poraukura ando Pisipe. Ondaka sa e disipulura mukle korkorre e Jesuse ta nasle.

O Jesus pe bari kris

⁵⁷ Gola kai ppanglea e Jesuse inllarde le ando cher e Kaifaseko, o mai baro popo, kote kai e kovacha sikaven o zakono ta e ppure sea chidine.

⁵⁸ O Pedro llelo pala lende duratar llik pasa o cher katar o mai baro popo. Nakklo, ta achilo besindo e llenenchar kai arakkena o cher e Devleko, te sai dikkel so ka avelpe.

⁵⁹ E gazda e poponenge ta sa e mai bari kris rodela varesavi dos ando Jesus te sai mundaren le,

⁶⁰ ta ni malade nisavi dos, a but llene avile pe kris te dosaren le. Pala sa gala ezgode avile ios dui llene,

⁶¹ kai ppenena: —Gava manus ppenda: ‘Me sai zatriu o cher e Devleko ta sai vazdaule ande trin llive.’

⁶² Ondaka o mai baro popo ustilo ta puchla e Jesuse: —¿Ni ppene niso? ¿So si gava kai ppenen tutar?

⁶³ A o Jesus ni ppenda niso. Ondaka o mai baro popo ppenda leke: —Ando anau katar o Del o llundo ppenau chuke te ppene o chachipe. Ppen amenge: San tu o Mesias, o Chavo e Devleko.

⁶⁴ O Jesus ppenda leke: —Tu ppendanle. Ta me ppenau tumenge kai tumen ka dikken e manuseke Chave besindo pe Devleki rig e chachi, ta sar ka avel pe oblakura e milosoke.

⁶⁵ Ondaka o mai baro popo pparrada pe patave te sai llanen kai saia joliariko, ta ppenda: —¡Gale alavenchar kusel e Devle! Ia ni trubun ios llene te dosaren le. Tumen asunden gala alava bilache;

⁶⁶ ¿So mislin tumen? Von ppende: —Vou si dosalo, morabi te merel.

⁶⁷ Ondaka chungardie le po mui ta marde le. Aver chalade le po mui,

⁶⁸ ta ppenena leke: —Tu kai san o Mesias, ¡apogodisar, ko chalada tut!

O Pedro ppenel kai ni pinllarel e Jesuse

⁶⁹ O Pedro, saia besindo avri katar o cher. Ondaka iek diskinia esluga avili pasa le ta ppenda leke: —I tu llaia e Jesusea, gua katar e Galilea.

⁷⁰ A o Pedro angla sa ppenda kai ni pinllarela le ta ppenda: —Me ni llanau savi orba de.

⁷¹ Mapalal llelotar kai o udar, kote aver diskinia dikkla le ta ppenda ogolenge: —Gava llala e Jesusea, gua katar o Nazaret.

⁷² Pale o Pedro ppenda kai ni pinllarela le, ta jala sovel ta ppenela gia: —¡Ni pinllarau gole manuse!

⁷³ Mapalal e llene kai sea kote avile pasa o Pedro ta ppende leke: —O chachipe i tu san iek lendar. I sar de orba achardol chuke.

⁷⁴ Ondaka ttoda te jal sovel ta ppenela: —¡Me ni pinllarau gole llene! Ondaka isto kote baslo o basno,

⁷⁵ Ondaka o Pedro diape golli so ppendaia leke o Jesus: “Mai anglal te basel o basno, ka ppene trin droma kai ni pinllare man.” Ta o Pedro likisto kotar, ta rovda zalbaia.