Mateo 24 - Nuevo Testamento Romané 2007

O Jesus ppenel kai o cher e Devleko ka avel zatrime

¹ O Jesus likisto katar o cher e Devleko ta kana llalatar, avile pasa le e disipulura te sikaven leke o cher e Devleko.

² Vou ppenda lenge: —¿Dikken sa gava? Chachimaia ppenau tumenge kai ni ka achel kate barr po barr kai ni ka avel peradino.

E ezgode kai ppenen so si te avelpe

³ Mapalal lleletar po burdo e Maslinkengo. O Jesus beslo ta e disipulura avile pasa le ta puchle le: —Ppen amenge, ¿kana ka aven gala ezgode ta save ezgode ka sikaven kai tu ka ave ta kai si o son e suetoko?

⁴ O Jesus ppenda lenge: —Dikken te na kojavel tumen niko.

⁵ Soke ka aven but llene kai ka ppenen kai sem me. Ta ka ppenen: ‘Me sem o Mesias’ ta ka kojaven bute llenen.

⁶ Tumen ka asunen kai marenpe e ppuvia pe suako rig; te na daran, soke gia trubul te nakken sa gala ezgode, a ni ios inai o son.

⁷ Soke iek charoina ka marelpe averiaia ta iek ppuv ka marelpe avere ppuviaia; ta ka avel bok ta e ppuv ka dermolpe pe but ttana.

⁸ A sa gala ezgode si samo e purve dukka e suetoke.

⁹ “Ondaka ka den tumen kai o sueto ta ka avel tumenchar bilacho, ta ka mundaren tumen ta sa o sueto ka murzin pe tumende pala mo anau.

¹⁰ Ondaka but llene ka peren, ta ka pukkaven iek avere, ta ka murzin iek pe aver.

¹¹ Ta but poraukura kojamne ka aven ta ka kojaven bute llenen;

¹² ka avel pe gachin bilachipe, kai but llene ka jasaren o volipe.

¹³ A ko llala llik kai o son ta ni achela, ka avel braduime.

¹⁴ Ta gaia lachi viasta ka avel inllardi ande sa e ppuvia te dikkel o sueto; ta ondaka ka avel o son.

¹⁵ “O porauko Daniel pisisarda cheres o baro bilachipe kai ka cheren po ttan kai delpe o kurbano; ko chitil te acharel:

¹⁶ ondaka gola kai si ande Judea, te nasen pe burdura;

¹⁷ a ko si upral po cher, te na fuliel te ikanel niso;

¹⁸ a ko si ande umalia, te na irilpe te lel pe patave.

¹⁹ ¡A tesko katar e diskinie kai ka aven kkamne ta kai bariaven minonen!

²⁰ Mangen tumen e Devletar te na nasen ando viend o ando llive sabado;

²¹ soke ka avel iek duk gia bari sar kai nikada ni saia pe gaia ppuv sar kai si cherdi.

²² A o Del te na chikniavela gola llivesa, niko ni avela braduime; a vou ka chikniavel len pala gola kai vou esvirisarda volimaia.

²³ “A vareko te ppenela tumenge: ‘Dikken, kate si o Mesias’, o ‘Dikken incha si’, na pachan le.

²⁴ Soke ka aven kojamne mesias ta kojamne poraukura; ta ka cheren bare ezgode te sai kojaven te avelape i e llenen kai isto o Del esvirisarda.

²⁵ Me ppendem tumenge gala alava mai anglal te nakken.

²⁶ Goleke, te ppenena tumenge: ‘Dikken kate si gurudino’, na pachan le.

²⁷ Soke gia sar dikkol iek esterlicha kai klichil katar o oriente llik kai o oksidente, isto gia ka avelpe kana ka irilpe o Chavo e Devleko.

²⁸ Kote kai avela e esnaga muli ka chidiniaon e garvanura.

Kana ka irilpe o Chavo e Devleko

²⁹ “Samo ka nakken gola llivesa dukkake, o kkam ka cherdol truñariko, o chon ni ka klichil, e cheraia ka peren katar o miloso ta e zor e milosoki ka izdral.

³⁰ Ondaka ka dikkol ando miloso sar ka avel o Chavo e manuseko, ta sa e ppuvia ka roven daratar ta ka dikken sar ka avel o Chavo e manuseko pe oblakura e milosoke zoriaia ta barimaia.

³¹ Ta vou ka bichalel pe suechonen iekke bare taturugaia te chiden e llenen kai esvirisarda katar e star riga e ppuviake katar iek rig e milosoki llik kai o goia rig.

³² “Sikon katar o kas e simochinengo: Kana leke krangura si kovle, ta zelenil ta liken e patra, tumen llanen kai o milai si pase.

³³ Isto gia, kana tumen ka dikken sa gala ezgode, ka llanen kai o Chavo e Devleko si po udar.

³⁴ Chachimaia ppenau tumenge kai sa gala ezgode ka avenpe bi te nakkel gaia vicha.

³⁵ O miloso ta e ppuv ni ka aven ios, a me alava si te cherdon.

³⁶ “A cheres o llive ta o saiato, niko ni llanel le, ni e suechura e milosoke, ni o Chavo. Samo mo Dad llanel le.

³⁷ “Gia sar saia ande llivesa e Noeeke, isto gia si te avelpe kana ka irilpe o Chavo e manuseko.

³⁸ Ande gua vreme mai anglal te perel o baro bursin, ta llik kai o llive kana o Noe dia ande bari llimia, o sueto jala ta piela ta zininape.

³⁹ Ta o llive kana von ni mislinape, avilo o baro bursin ta inllarda peke saurren. Isto gia ka avel pe kana ka avel o Chavo e manuseko.

⁴⁰ Ande gua vreme dui llene kai ka aven ande umalia: iek ka avel inllardo a o gua ka avel muklo.

⁴¹ Katar dui diskinie ka moren e simiche, iek ka avel inllardi a o goia ka avel mukli.

⁴² “Achen llungade, soke ni llanen savo llive ka avel tumaro Gazda.

⁴³ A sikon gaia ezgoda, o gazda iekke chereko te llanela ande savo saiato e rachako ka avel o chor, achela llungado ta ni mukela nika te del ande leko cher te lel peke leke ezgode.

⁴⁴ Goleke i tumen morabi te aven lacharde, soke o Chavo e manuseko ka avel ando saiato kai tumen ni llanen.

O esluga chacho

⁴⁵ “¿Ko si o esluga chacho ta bizai, kai leko gazda mukel lete e llenen katar po cher, te sai den len te jan orta po vreme?

⁴⁶ Blagosime o esluga kai kana avel leko gazda malavel le kai cherel po rado.

⁴⁷ Chachimaia ppenau tumenge kai o gazda ka ttovel tala leko va sa so si le.

⁴⁸ A o gua esluga te mislilape kai leko gazda ni ka avel oma,

⁴⁹ ta te ttovelape te avel bilacho ogole eslugenchar, ta chidiniaola e matarnenchar te jal ta te piel,

⁵⁰ ondaka ka avel leko gazda o llive kana vou ni mislilape ta o saiato kai vou ni llanel,

⁵¹ ka dukkavel le, ta ka ttovel le e manusenchar kojamne; kote ka avel o roipe ta e bari dar.”