Mateo 23 - Nuevo Testamento Romané 2007

O Jesus ppukavel e pisminuren ta i e fariseonen

¹ Ondaka o Jesus dia orba e suetoke ta i pe disipulonenge, ta ppenda:

² “E kovacha e zakonoke ta e fariseura lengo rado si te sikaven so ppenel o zakono katar o Moises.

³ Goleke, kanden len ta cheren sa so von ka ppenen tumenge; a na cheren so von cheren, soke ppenen a ni cheren.

⁴ Ppanden baro pparipe kai niko nasti inllarel ta ttovenle pe llenenge dume a von ni kamen ni iekke naiea te miskonle.

⁵ Sa gala ezgode von cheren te sai dikken pe lende e llene. Lenge si drago te inllaren pe po chikat ta pe pe va kotora katar o Pisipe, ta te ttoven pe pete gertacha kai si len baro kañieri.

⁶ Mangen te besen pe sinia pe mai lache estoliche ta ando cher e Devleko drago lenge te besen pe mai lache estoliche,

⁷ ta drago lenge te blagosil len o sueto ta e llene te ppenen lenge kovachi, kovachi.

⁸ “A tumen na roden e llene te ikkaren tumen kovachi, soke sa tumen sen pplal ta si tumen samo iek Kovachi.

⁹ Ta na ikkaren nika dade pe ppuv, soke si tumen samo iek Dad: kai si ando miloso.

¹⁰ Na roden te ikkaren tumen gazda, soke o Kristo si tumaro Gazda.

¹¹ O mai baro tumendar morabi te avel tumaro esluga.

¹² Soke gua kai bariavel vou pe, ka achel ando lallao; a o lleno kai cherelpe minono, ka avel bariardo.

¹³ “¡Tesko tumenge, kovacha e zakonoke ta tumen e fariseura, manus kojamne!, kai ppanden o udar e Devleko e llenenge te na den. Ta isto tumen ni den andre ta ni muken te den andre golen kai len te den.

¹⁴ ¡Tesko tumenge, kovacha e zakonoke ta tumen fariseura, manus kojamne! Soke len e chera katar e ppivlia, ta te na achardol cheren baro molipe; goleke pala gua ka aven mai dosale pe kris.

¹⁵ “¡Tesko tumenge kovacha e zakonoke ta tumen fariseura, manus kojamne! Soke llan pe ppuv ta i pe mora te sai len llenen te llan pala tumende, ta kana len iekke llene, cheren le dui droma mai bilacho te llal ando tufano.

¹⁶ “¡Tesko tumenge kovacha korre! soke ppenen: Vareko te jal sovel po cher e Devleko, inai niso; a vareko te jala sovel po sunakai katar o cher e Devleko, ondaka kote mol leke e sovel.

¹⁷ ¡Dilalen korralen!, ¿So si mai baro, o sunakai o o cher e Devleko kai cherel te avel santo o sunakai?

¹⁸ Ta tumen ppenen: Vareko te jala sovel po ttan e kurbanoko, inai niso; a vareko te jala sovel po kurbano, ondaka kote mol leke e sovel.

¹⁹ ¡Korralen! ¿So si mai baro, o kurbano, o o ttan e kurbanoko kai cherel te avel santo o kurbano?

²⁰ Ko jala sovel po ttan e kurbanoko, jal sovel po kurbano ta pe sa so si kote;

²¹ a ko jala sovel po cher e Devleko ni jal sovel samo po cher e Devleko, i po Del jal sovel, kai zivil kote;

²² a ko jala sovel po miloso, jal sovel i po trono e Devleko ta i po Del kai besel po trono.

²³ “¡Tesko tumenge, kovacha e zakonoke ta tumen fariseura, manus kojamne! kai ikanen e Devleke e desengo katar e menta, eneldo ta i o komino, a ni ttoven sama katar o sikadipe mai baro katar o zakono kai si o chachipe, e zalba, o pachape. Gava si te cheren, ta te na muken te cheren i ogola ezgode.

²⁴ ¡Tumen kovacha korre kai chiston e mol katar e makkorra a nakkaven e deva!

²⁵ “¡Tesko tumenge, kovacha e zakonoke ta tumen fariseura, manus kojamne!, kai jalaven avrial o taso ta o charo, a andral sen pperde choripe ta bilachipe.

²⁶ ¡Fariseo korro: Mai anglal jalau o taso andral ta i o charo te sai achel jalado i avrial!

²⁷ “¡Tesko tumenge, kovacha e zakonoke ta tumen fariseura, manus kojamne!, kai sen sargo limoria parniarde, kai si sukar avrial a andral si pperde kokala mulenge ta pperde llubri.

²⁸ Gia sen tumen: avrial sikadon lache angla e manusa, a andral sen pperde kojaipe ta bilachipe.

²⁹ “¡Tesko tumenge, kovacha e zakonoke ta tumen fariseura, manus kojamne!, kai cheren e limoria e poraukonenge ta lacharen e limoria katar e llene kai sea chache manus.

³⁰ A tumen ppenen: “Te zivisardama ande llivesa amare dadenge, ni pomozisardama te mundaren e porauken.”

³¹ Gale ezgodenchar isto tumen ppenen kai sen chave katar gola kai mundarde e porauken.

³² ¡Gotovin so ttodepe te cheren tumare dada!

³³ “¡Sapalen, vicha sapengi!, ¿Sar ka nasen katar e dos e tufanoki?

³⁴ Goleke, me bichalau tumenge poraukura, manusa bizai ta i kovacha e zakonoke; a tumen ka mundaren nesave llene lendar ta i ka kruston len, a averen ka maren ande kkanllira e judionenge ta ka llan pala lende te roden len foro forote.

³⁵ Gia ka perel pe tumende sa o rat chacho kai chordilo pe ppuv, katar o rat e Abeleko llik kai o rat katar o Zakarias chaurro katar o Berekias kai tumen mundarden maskar o cher e Devleko ta o ttan e kurbanoko.

³⁶ Chachimaia ppenau tumenge kai sa gala ezgode ka aven pe gaia vicha.

O Jesus rovel pala o Jerusalem

³⁷ “¡Jerusalem Jerusalem, kai mundare e porauken chalave e barrenchar e llenen kai o Del bichalel chuke! ¡Pe gachin droma manglem te chidau che chaurren gia sar e kkañi chidel pe pilichonen telal tala pe pakka, a tu ni kamlan!

³⁸ Tumaro cher ka achel pusto,

³⁹ ta ppenau tumenge kai katar angle ni ka dikken man pale lligo ni ka ppenen tumen: ‘¡Blagosime gua kai avel ando anau e Devleko!’ ”