Mateo 22 - Nuevo Testamento Romané 2007

O jape e biaveko

¹ O Jesus pale dia lenge orba paramichenchar ta ppenela:

² “E charoina e milosoki si sargo iek charo kai cherda iek baro biau pe chaurreke.

³ Ta bichalda pe eslugen te ikkaren e llenen po biau, a von ni kamle te aven.

⁴ Pale bichalda avere eslugen ta ppenda lenge: ‘Ppenen e llenenge kai si ikkarde po biau kai e sinia si ttodi. Bichaldem ta mundarde me guruven ta i me zivirinien ta sa cherdo si; aven po biau.’

⁵ A von ni ttode leke sama. Iek lendar llelotar te radil e ppuv, aver llelotar te radil ande aver buchi;

⁶ ta aver, lie e eslugen marde len ta mundarde len.

⁷ Kana o charo asunda gala ezgode, jolailo, ta bichalda pe boñikonen, ta mundarda gole bilache llenen ta ppabarda lengo foro.

⁸ Ondaka ppenda pe eslugenge: ‘E sinia si ttodi, a e gostura ni sea lache.

⁹ Llan pe droma ta ikkaren po biau saurren.’

¹⁰ Ondaka e esluge llele pe droma ta chidie sa golen kai malade, lachen ta i bilachen, ta o biau pperdilo gostura.

¹¹ Kana o charo dia te dikkel e llenen kai avile, dikkla iekke manuse kai ni saia furiado e biaveke,

¹² ta ppenda leke: Amala ¿Sar dian kate bi te ave furiado e biaveke? A gua lleno ni ppenda niso.

¹³ Ondaka o charo ppenda e eslugenge: ‘Ppanden leke porrne ta i leke va ta chuden le avri ando truñariko, kote kai ka avel o roipe ta e bari dar.’

¹⁴ Soke but llene si ikkarde, a cherricha esvirime.”

E love kai chiden e kralioke

¹⁵ Ondaka lleletar e fariseura ta puchena sar ka cheren te istaren e Jesuse pe varesavo alau te dosaren le.

¹⁶ Ta bichalde leke pire disipulonen ta lenchar llele i e erodianura te ppenen leke: Kovachi, llana kai san chacho ta kai sikave chachimaia o drom e Devleko, ta ni dara katar e llene kai asunen, ta ni ppene lenge alava te perel lenge drago.

¹⁷ Ppen amenge akana, so misli: ¿Ppen amenge si orta te pochina e love kai mangel o Sesar o iok?

¹⁸ A o Jesus, sar pinllerela lengo kojaipe, ppenda lenge: —¿Soke zumaven man?

¹⁹ Sikaven mange o tolari kai morabi te den kai o Sesar. Von sikade leke iek denario.

²⁰ Ondaka vou puchla len: —¿Kako mui ta kako anau si pisime po tolari?

²¹ Von ppende: —E Sesareko. A o Jesus ppenda lenge: —Den e Sesare so si e Sesareko, a den e Devle so si e Devleko.

²² Kana asunde gaia orba chudisaile, ta lleletar.

Puchen sar ka usten e mule

²³ Isto gua llive, nesave saduseura llele te dikken e Jesuse. E saduseura ppenen kai ni ka usten e mule; goleke puchle le.

²⁴ —Kovachi, o Moises ppenda: Vareko te na avelale chaurre ta te merela, leko pplal morabi te zinilpe leke romiaia te sai del chaurre pe pplale kai mulo.

²⁵ Kate maskar amende sea efta pplal: O purvo zinisailo ta ni avila le minone ta mulo. Sar ni saia le minone lia la leko pplal.

²⁶ A i gua pplal mulo, mapalal o trito pplal, ta gia llik kai efta pplal.

²⁷ Pala sa gala ezgode muli i e romi.

²⁸ Kana ka usten katar o meripe ¿Kaki romi ka avel katar e efta pplal?

²⁹ O Jesus ppenda lenge: —Tumen ni llanen, soke ni pinllarden o Pisipe ta ni e Devleki zor.

³⁰ Soke kana e mule ka usten, e murusa ta e diskinie ni ka zininpe, soke ka aven sargo e suechura kai si ando miloso.

³¹ A katar e orba kai e mule ka usten, ¿tumen ni chitisarden kai isto o Del ppenda:

³² ‘Me sem o Del katar o Abraam, katar o Isaak ta i katar o Jakob?’ ¡Ta vou inai Del e mulengo, vou si Del e llundengo!

³³ Kana e llene asunde gaia orba, chudisaile pala so sikavela o Jesus.

O zakono mai baro

³⁴ E fariseura chidinaile kana asunde kai o Jesus cherdaia te achen e saduseura,

³⁵ ta iek kai saia kovachi katar o zakono puchla le te sai zumavel le:

³⁶ —Kovachi ¿Savi si e orba e mai bari ando zakono?

³⁷ O Jesus ppenda leke: —‘Volisar che Devle sa che liea, sa che zivotoia ta sa che misloia.’

³⁸ Gaia si e mai bari orba ta o purvo ando zakono.

³⁹ Ta o duito si sargo o purvo, ppenel gia: ‘Volisar avere sar voli tu tut.’

⁴⁰ Ande gala dui orbe si sa o zakono ta i e poraukura.

Kako chavo si o Mesias

⁴¹ Kana e fariseura sea chidine,

⁴² o Jesus puchla len: —¿A so mislin tumen katar o Mesias? ¿Katar savi vicha avel? Von ppende leke: —Katar e vicha e Davideki.

⁴³ Ondaka o Jesus ppenda lenge: —¿A sar o David ando Duo ikkarda le Gazda? Soke o David ppenda:

⁴⁴ ‘O Gazda ppenda me Gazdake: Bes pe mi rig e chachi, llik kana me ka ttovau che dusmanonen telal tala che porrne.’

⁴⁵ ¿A sar sai avel o Mesias katar e vicha e Davideki kana isto o David ikkarel le Gazda?

⁴⁶ Niko nasti dela le anglal, ta katar gua llive angle niko ni tromala te puchel le niso.