Mateo 21 - Nuevo Testamento Romané 2007

O Jesus ando Jerusalem

¹ Kana avile pasa o Jerusalem llele ande Betfage kai o burdo e Maslinkengo, o Jesus bichalda duie disipulonen,

² ta ppenda lenge: —Llan ando forichi kai si angla tumende ta oma ka malaven iek magarcha ppangli ta iek magarchichi laia. Mukliaren la ta anen len mande;

³ a vareko te ppenela tumenge vareso, ppenen leke kai e gazda trubun le ta oma vou ka iril len.

⁴ Sa gala ezgode nakkle te sai cherdol so ppendaia o porauko:

⁵ “Ppenen e chaurrenge katar o Sion: ‘Dikken tumaro Charo, ni avel tumende barimaia avel besindo pe iek magarcho, pe iek magarchichi.’ ”

⁶ Ondaka e disipulura llele ta cherde sar ppendaia lenge o Jesus te cheren.

⁷ Ande e magarcha ta lake minone ta ttode upral pe lende pe gertacha ta o Jesus beslo upral.

⁸ But llene sea kote ta inzarena pe gertacha po drom; a aver chinena krangura katar e kasta ta inzarena len po drom.

⁹ Ta o sueto kai llala anglal katar o Jesus ta i o sueto kai llala palal urkina ta ppenena —¡Hosana Chavo e Davideko! ¡Blagosime gua kai avel ando anau e Devleko! ¡Hosana upre ando miloso!

¹⁰ Kana o Jesus dia ando Jerusalem sa o foro jolailo ta ppenena: —¿Ko si gava?

¹¹ A o sueto ppenela: —Gava si o Jesus, o porauko katar o Nazaret katar e Galilea.

O Jesus chistol e Devleko cher

¹² O Jesus dia andre ando cher e Devleko ta tradia avri sa golen kai chinena ta bichinena ta dia tele moia e stalia golenge kai pparruvena e love e suetoke, ta i e estoliche golenge kai bichinena e gulubura,

¹³ ta ppenda lenge: —Ando Pisipe ppenel gia: ‘Mo cher ka ikkardol cher molimako,’ a tumen cherden letar iek ttan kai gurudon e chorane.

¹⁴ Avile pasa o Jesus ando cher e Devleko korre ta i bange ta vou sastarda len.

¹⁵ A e mai preche popura ta i e kovacha e zakonoke jolaile kana dikkle e bare ezgode kai cherela ta sar blagosina le e ternorre ando cher e Devleko ta sar ppenena: “¡Hosana e Chaveke katar o David!”.

¹⁶ Ta ppende e Jesuseke: —¿Asune so ppenen gala? O Jesus ppenda lenge: Ea ¿a tumen nikada ni chitisarden?: ‘Katar o mui e ternorrengo ta katar o mui e minonengo kai pien chuchi, tu ttodan o blagosipe.

¹⁷ Ta kana o Jesus mukla len, llelo avri katar o foro ande Betania, ta kote nakkla e riat.

O Jesus del armaia

¹⁸ Ttiarinako kana irisailo ando foro, bokkailo.

¹⁹ Ta kana dikkla iek kas simochinengo pasa o drom, avilo pasa le ta dikkla kai ni saia niso po kas samo patrina; ondaka ppenda e kasteke: —¡Te na barion nikada pe tute septelie!

²⁰ Kana e disipulura dikkle gaia ezgoda, chudisaile ta ppenena: —¿Sar sukilo o kas isto kote?

²¹ Ondaka o Jesus ppenda lenge: —Chachimaia ppenau tumenge kai te avela tumen pachape ta te na avela tumen o mislo kai nasti cherdol, ni ka cheren samo gava katar o kas simochinengo, soke ka ppenen gale burdoke: ‘Le tut ta chude tut ande mora’ ta gia ka avelpe.

²² Ta sa so mangena ando molipe pachamaia, ka len le.

O Jesus ta leki zor

²³ Mapalal katar gala ezgode o Jesus dia ando cher e Devleko. Ta kana vou sikavela e llenen, e mai preche popura ta e ppure katar o foro avile pasa le ta puche le: —¿Save gazdarimaia chere gala ezgode? ¿Ta ko dia tut gava gazdaripe?

²⁴ O Jesus ppenda lenge: —I me ka puchau tumen iek ezgoda: a te ppenena so si, i me ka ppenau tumenge ko dia man o gazdaripe te cherau gala ezgode.

²⁵ ¿Ko bichalda e Juane te kristil, o Del, o e manusa? Von ttode te janpe maskar pete, ta ppenena: “Te ppendam, katar o del, ka ppenel amenge: ‘¿A soke ni pachaien le?

²⁶ A nasti ppena kai bichalde le e manusa, soke si amenge dar katar o foro, soke sa pachan kai o Juan saia iek porauko.”

²⁷ Goleke von ppende e Jesuseke: —Ni llana. Ondaka vou ppenda lenge: —Ni me ni ka ppenau tumenge save gazdarimaia cherau gala ezgode.

E paramichi katar e dui pplal

²⁸ O Jesus puchla len: —¿So mislin tumen katar gaia paramichi? iek manus saia le dui chaurre ta avilo pasa iek ta ppenda leke: ‘Chaurrea lla allive te radi ande mo vostano drakkako.’

²⁹ Vou ppenda: ‘¡Ni kamam!’ A mai angle keime llelo.

³⁰ Ta kana avilo o dad kai o gua chaurro ppenda leke isto gola alava, a o chaurro ppenda leke: ‘Ea, gazda, ka llau.’ A ni llelo.

³¹ ¿Savo chaurro katar e dui cherda e volia pe dadeki? Von ppende: —O purvo. O Jesus ppenda lenge: —Chachimaia ppenau tumenge kai e publikanura ta i e kurvichke llan mai anglal tumendar ande charoina e Devleki.

³² Soke avilo tumende o Juan po drom chachimako ta ni pachaien le; a e publikanura ta e kurvichke pachaie le. A tumen i kana dikklen sa gala ezgode ni keisailen te sai pachan le.

E paramichi katar e bilache esluge

³³ “Asunen aver paramichi: saia iek manus kai saia dad katar iek familia kai ttoda te barion drakka ande iek vostano, ta ppangla o vostano truial ta lacharda iek ttan te cherel mol ta vazdia iek cher ta mukla gua vostano drakkako kai iek manus te cheren buchi ta llelotar dur.

³⁴ Kana avilo o vreme katar e septelie bichalda pe eslugen te sai lel so perelale katar gola drakka.

³⁵ A e llene kai radina ande gua vostano drakkako lie gole eslugen, iekke marde, avere mundarde ta avere chalade le e barrenchar.

³⁶ Bichalda pale avere eslugen, mai but neko o gola; ta cherde isto gia sar cherde ogolenchar.

³⁷ “Pala sa gala ezgode bichalda pe chaurre, ta ppenda: ‘Chachimaia ka den liubao me chaurre.’

³⁸ A e llene kai radina ando vostano drakkako kana dikkle leke chaurre, ppende maskar pete: ‘Gava si o lleno kai ka achel leke sa e love leke dadeke; aide, mundara le ta la sa leke love.’

³⁹ Ta istarde le, chudie le avri katar o vostano drakkako ta mundarde le.

⁴⁰ “Kana ka avel o gazda katar gua vostano drakkako, ¿So ka cherel gole eslugenge?”

⁴¹ Von ppende leke: —E bilachen ka zatril bi zalbako, ta po vostano drakkako ka del le kai aver llene kai radin te sai den le ando vreme so perel le.

⁴² Ondaka o Jesus pucha len: —¿Nikada ni chitisarden so ppenel o Pisipe? ‘O barr kai ni ttode leke sama e llene kai vazden chera cherdilo o barr mai preche. Gava cherda o Del, ta amen chudi amen.’

⁴³ Goleke me ppenau tumenge kai e charoina e Devleki ka avel ikandi tumendar ta ka avel dini e llenenge kai ka den septelie.

⁴⁴ Ko perela pe gava barr ka achel sa pe kotora, ta o barr te perela pe vareka, ka cherel le prajo.

⁴⁵ Kana asunde leki paramichi e mai preche popura ta e fariseura acharde kai dela orba lendar.

⁴⁶ A kana mangle te ppanden le, daraile katar o foro soke o sueto pachala kai o Jesus saia porauko.