Mateo 2 - Nuevo Testamento Romané 2007

E bizai manus aven te dikken e Jesuse

¹ O Jesus biandilo ando Belen katar e Judea, ande llivesa kana o Erodes gazdarila goia ppuv. Ondaka avile katar o oriente ando Jerusalem nesave bizai manus; von sikona katar e cheraia.

² Ta puchena: —¿Kai talo o charo e judionengo kai biandilo? soke amen dikklam leki cherain ando oriente, ta avilam te blagosi le.

³ Kana o charo o Erodes asunda gaia orba, jolailo vou ta i sa o foro.

⁴ Ondaka o Erodes chidia sa e mai bare poponen, ta kote sea ikkarde i e kovache e zakonoke ta puchla len kai saia te biandol o Kristo.

⁵ Von ppende leke: —Ando Belen katar e Judea, soke o porauko pisisarda gia:

⁶ ‘A tu Belen katar e ppuv katar e Judea, ni san o mai minono katar e Judeaki charoina; soke tutar ka likel gua kai ka sikavel o drom ta ka arakkel me foro o Israel.’

⁷ Ondaka o Erodes ikkarda po chorial e bizaien ta llangla o vreme chachuno kana sikadili e cherain.

⁸ Ondaka bichalda len ando Belen, ta ppenda lenge: —Llan incha ta puchen bizaimaia katar o minono. Ta kana ka malaven le, ppenenle mange te sai llau i me te blagosiu le.

⁹ Kana von asunde e charo lleletar; a e cherain kai dikklea ando oriente llala angla lende lligo ni achili kote upral kai saia o minono.

¹⁰ Ta kana e bizai manus dikkle e cherain, veselisaile but.

¹¹ Kana die ando cher dikkle e minone leke da, e Mariaia; ta ttodepe changenchar ta blagosisarde le. Ondaka putarde pe baulia minone ta die le sunakai, taimano, ta i mirra.

¹² A o Del sikada lenge ande sune te na irinpe kai o Erodes, goleke von irisaile ande pi ppuv katar aver drom.

Kana nasle ando Ejipto

¹³ Kana e bizai manus lleletar, iek suecho e Devleko sikadilo e Joseeke ande sune, ta ppenda leke: “Uste, le e minone ta i leke da, ta nas ando Ejipto ta achi incha llik kana me ka ppenau chuke, soke o Erodes ka rodel e minone te mundarel le.”

¹⁴ Ondaka kana o Jose llungadilo, lia e minone ta i leke da, ta llelotar orachaia po drom kai llal ando Ejipto.

¹⁵ Ta achilo kote llik kana mulo o Erodes; te sai cherdol so ppendaia o Del katar o porauko kana ppenda: “Katar o Ejipto ikkardem me chaurre.”

O Erodes bichalel te mundaren e minonen

¹⁶ Ondaka kana o Erodes acharda kai e bizai manus kojade le, lia le iek bari joli ta bichalda te mundaren sa e minonen duie bursenge ta i e mai minonen kai sea ando Belen ta i truial letar, prema o vreme kai ppendea leke e bizai manus.

¹⁷ Gia cherdilo so ppendaia o porauko o Jeremias, kana ppenda:

¹⁸ “Asundilo iek avazi ande Rama, baro roipe ta kukipe. E Rakel saia kai rovela cheres pe chaurre ta ni kamela te den la zor, soke lake chaurre mulea.”

Kana irisaile katar o Ejipto

¹⁹ A kana mulo o Erodes, iek suecho e Devleko sikadilo e Joseeke ande sune ando Ejipto, ta ppenda leke:

²⁰ “Uste, le e minone ta i leke da, ta irisao ando Israel, soke mule gola kai rodena te mundaren e minone.”

²¹ Ondaka o Jose ustilo, lia e minone ta leke da, ta llelotar ando Israel.

²² A kana asunda kai o Arkelao gazdarila po ttan pe dadeko e Erodeseko, o Jose darailo te llal incha soke o Del sikadaia leke ande sune so te cherel; goleke llelotar ande Galilea,

²³ ta beslo ando foro kai ikkardol Nazaret, te sai cherdol so saia ppendo katar e poraukura, kai saia te ikkaren le nazareno.