Mateo 17 - Nuevo Testamento Romané 2007

O Jesus cherdol sargo aver

¹ Nakkle sou llive kotar ta o Jesus inllarda e Pedro, e Santiago ta e Juane pplal e Santiagoko upre pe iek burdo but baro.

² Kote angla lende cherdilo sargo aver, ta leko mui klichisarda sargo o kkam, ta leke patave cherdile parne sargo o villelo.

³ Ta sikadile lenge o Moises ta e Eliase kai dena orba e Jesusea.

⁴ Ondaka o Pedro ppenda e Jesuseke: —Gazda, ¡Gia sukar kai sam kate! Te mangea, ka cherau kate trin cherorra e patrenchar: Iek chuke, aver e Moiseseke ta aver e Eliaseke.

⁵ Kana o Pedro dela orba, iek oblako villeloko ucharda len ta asundilo iek avazi katar o oblako, kai ppenela: “Gava si mo Chaurro kai voliu le ta kai esvirisardem; le asunen.”

⁶ Kana von asunde gaia orba, e disipulura ttodepe tele moia pe ppuv ta saia lenge bari dar.

⁷ Ondaka o Jesus avilo pasa lende ta dodisarda len, ta ppenda lenge: —Usten ta na daran.

⁸ Kana ustile ni dikkle nika, samo e Jesuse.

⁹ Kana fuliena katar o burdo, o Jesus ppenda lenge: —Na ppenen nikake so dikklen lligo ni o Chavo e manuseko ka ustel katar o meripe.

¹⁰ Ondaka e disipulura puchle e Jesuse: —¿Soke e kovacha e zakonoke ppenen kai mai anglal si te avel o Elias?

¹¹ O Jesus ppenda lenge: —Gua si o chachipe, o Elias avel mai anglal ta ka lacharel sa e ezgode.

¹² A me ppenau tumenge kai o Elias ia avilo, ta von ni pinllarde le, ta cherde lea sogo mangle; isto gia o Chavo e manuseko ka nakkel patnia pala lende.

¹³ Ondaka e disipulura llangle kai o Jesus dela lenge orba katar o Juan kai kristila.

O Jesus sastarel iekke chaurre bengalo

¹⁴ Kana avile kote kai saia o sueto, avilo iek lleno pasa o Jesus ta dia changa angla le, ta ppenda leke:

¹⁵ —Gazda, te avel chuke zao me chaurretar soke perel bengendar ta nakkel bari patnia ta but droma perel pe iag ta but droma ando pai.

¹⁶ Andem le kai che disipulura, a von nasti sastarde le.

¹⁷ O Jesus ppenda lenge: —¡Ioi manusalen kai inai tumen pachape ta sen bilache! ¿Pe gachin ios morabi te avau tumenchar? ¿Pe gachin ios morabi te terpiu tumen? Anen mange kate e chaurre.

¹⁸ Ondaka o Jesus dia po llavolo, ta o llavolo likisto katar o chaurro, ta kotar angle achilo sasto ande goia doba.

¹⁹ Ondaka e disipulura avile pasa o Jesus ta puchle le po chorial: —¿Soke amen nasti tradiam gole llavolo?

²⁰ O Jesus ppenda lenge: —Soke si tumen cherricha pachape. Chachimaia ppenau tumenge kai te avela tumaro pachape sargo iek simicha mostasaki ka ppenen gale burdoke: ‘Le tut kotar ta ttou tut pe aver rig’ ta gua burdo ka cherel le, ta tumen ka cheren suako ezgoda.

²¹ A gaia buchi nasti cherdol te na avela molipe ta alluno.

Pale o duito ppenel o Jesus kai ka merel

²² Kana von sea ande Galilea, o Jesus ppenda lenge: —O Chavo e manuseko si te avel dino ande va e manusenge,

²³ ta ka mundaren le; a ando trito llive ka ustel katar o meripe. A von tristosaile but.

E love kai si dine ando cher e Devleko

²⁴ Kana o Jesus ta leke disipulura avile ando foro katar o Kafernaum, avile pasa o Pedro e llene kai chidena e dui drakme kai denpe ando cher e Devleko ta puchle le: —¿Tumaro kovachi ni pochinel e dui drakme?

²⁵ O Pedro ppenda: Ea vou pochinel. Kana o Pedro dia ando cher, o Jesus mai anglal dia orba lea ta ppenda leke: —¿A tu Simon so misli? E charura, ¿katar len e love; katar gola kai si katar leki ppuv o katar gola kai inai katar leki ppuv?

²⁶ O Pedro ppenda leke: —Katar gola kai inai katar leki ppuv. O Jesus ppenda leke: —Goleke gola kai si katar leko foro ni pochinen.

²⁷ A te na joliaon, lla ande mora, chude e mreza ta le o purvo macho kai ka ikane, putar leko mui ta ka malave iek tolari. Le le ta de le pala ma ta i pala tu.