Mateo 16 - Nuevo Testamento Romané 2007

E bari ezgoda Devlikani katar o porauko Jonas

¹ Avile kai o Jesus e fariseura ta i e saduseura te zumaven le, ta mangle letar te cherel iek bari ezgoda Devlikani ta gia te sikavel kai vou avela bichaldo e Devletar.

² A o Jesus ppenda lenge: “Kana perel e riat, tumen ppenen: ‘Ttiara ka cherel iek sukar llive, soke o miloso si lolo’;

³ ta ttiarinako rano tumen ppenen: ‘Allive ka del peke, soke o miloso si lolo ta si oblakura.’ Kojamnalen, soke tumen llanen prema o miloso sar ka avel o llive a ni llanen te acharen e bare ezgode Devlikane kai nakken ande gava vreme.

⁴ E llene bilache ta kurvaria mangen te dikken iek bari ezgoda Devlikani, a so ka delpe lenge te dikken si so avilape e Jonasea. Ta o Jesus mukla len ta llelotar.

E levadura katar e fariseura

⁵ E disipulura avile pe o goia rig katar e mora e Galileaki, ta bristraile te inllaren marrno.

⁶ Ondaka o Jesus ppenda lenge: —Arakken tumen katar e levadura e fariseonengi ta i katar e saduseura.

⁷ A e disipulura ttode te janpe maskar pete, ta ppenena: —¡O Jesus ppenel gua soke amen ni andam marrno!

⁸ O Jesus acharda ta ppenda lenge: —¿Soke ppenen kai inai tumen marrno, gia cherricha pachape si tumen?

⁹ ¿Llik akana ni acharen? ¿ni den tumen golli katar e panch marrne maskar e panch milie llene, ta pe gachin kotariche chidien?

¹⁰ ¿Ta katar e efta marrne kai fuladen maskar e star milie llene, ta pe gachin kotariche chidien?

¹¹ ¿Sar ni acharen kai me ni diem tumenge orba katar o marrno kana ppendem te arakken tumen katar e levadura e fariseonengi ta i e saduseonengi?

¹² Ondaka acharde kai ni ppendaia lenge te arakkenpe katar e levadura e marneki, ta acharde kai ppenela lenge te arakkenpe katar so sikavena e fariseura ta i e saduseura.

O Pedro ppenel kai o Jesus si o Kristo

¹³ Kana o Jesus avilo ande ppuv katar e Sesarea katar o Filipo, puchla pe disipulonen ta ppenda lenge: —¿Ko ppenen e llene kai o Chavo e manuseko?

¹⁴ Von ppende leke: —Nesave llene ppenen kai tu san o Juan kai kristil; aver llene ppenen kai san o Elias, ta i aver ppenen kai san o Jeremias o varesavo aver porauko.

¹⁵ Ondaka o Jesus puchla len: —A tumen, ¿Ko ppenen kai sem me?

¹⁶ O Simon Pedro ppenda leke: —Tu san o Mesias, o Chavo katar o Del o llundo.

¹⁷ Ondaka o Jesus ppenda leke: —Blagosime san Simon, chavo e Jonaseko soke goia orba ni sikadala chuke ni iek manus, samo mo Dad kai si ando miloso.

¹⁸ Ta me ppenau chuke kai tu san o Pedro, ta pe gava barr ka cherau mi kkanlliri, ta e udara katar o meripe ni ka dobin la.

¹⁹ Ta tut ka dau e kluchura katar e charoina e milosoki: Sa so ppandea pe ppuv, ka avel ppanglo ando miloso, ta sa so putarea pe ppuv, ka avel putardo ando miloso.

²⁰ Ondaka o Jesus ppenda pe disipulonenge te na ppenen nikake kai vou saia o Mesias.

O Jesus ppenel kai ka merel

²¹ Kotar angle o Jesus ttoda te ppenel pe disipulonenge kai trubula te llal ando Jerusalem ta te jal bari patnia ande va e ppurege, ta i katar e gazda e poponenge ta i katar e kovacha e zakonoke, ta te merel, ta te ustel katar o meripe pala e trin llive.

²² Ondaka o Pedro inllarda e Jesuse pe iek rig ta ttoda te del pe lete ta ppenela leke gia: —Gazda, te avel chuke zao tu tutar, ¡Te na avelpe gava nikada chuke!

²³ A o Jesus boldinailo ta ppenda e Pedroke: —¡Le tut mandar, Satanas soke tu mange te chere man te perau! Tu ni dikke e ezgode sargo o Del, tu dikke len sargo manus.

²⁴ Ondaka o Jesus ppenda pe disipulonenge: —Te avela vareko pala ma, morabi te bristraol vou petar, te lel po krusto ta te llal pala ma,

²⁵ soke kogo mangela te braduil po zivoto, ka jasarel le; ta kogo jasarela po zivoto pala ma, ka malavel le.

²⁶ ¿So blazil e manuseke te dobil sogo si po sueto, ta te jasarel po zivoto? ¿O pe gachin sai pochinel o manus pala po zivoto?

²⁷ Soke o Chavo e manuseko ka avel ande pe Dadeko baripe ta pe suechonenchar; ondaka ka pochinel suakone lleneke prema so cherda pe gaia ppuv.

²⁸ Chachimaia ppenau tumenge kai nesave llene kai si kate ni ka meren lligo ni ka dikken sar avel o Chavo e manuseko ande pi charoina.