Mateo 15 - Nuevo Testamento Romané 2007

So meliarel e manuse

¹ Ondaka avile pasa o Jesus nesave fariseura ta i kovacha e zakonoke kai avilea katar o Jerusalem te puchen le:

² —¿Soke che disipulura ppagen so sikade amen e purane? ¿Soke von ni jalaven pe e va mai anglal te jan marrno?

³ O Jesus ppenda lenge: —¿A soke i tumen ppagen o zakono e Devleko pala tumare zakonura?

⁴ Soke o Del ppenda “De liubao che dade ta i che da,” a “ko dela armaia pe dade o pe da trubul te merel.”

⁵ A tumen ppenen kai iek manus sai ppenel pe dadeke o pe dake: “Nasti pomoziu tut, soke sa so si man ppendem kai ka daule e Devleke.”

⁶ Ta vareko te ppenela gala alava, inai soke te del liubao pe dade o pe da. Gia i tumen ppagen o zakono e Devleko pala tumare zakonura.

⁷ Manusa kojamne sen, sukar dia orba o porauko Isaias kana ppenda tumendar gia:

⁸ ‘Gava foro del man liubao pe alavenchar, a lengo lio si dur mandar.

⁹ Samo gia den man liubao, soke so tumen sikaven si zakonura manusenge.’

¹⁰ Ondaka o Jesus ikkarda e llenen ta ppenda lenge: —Asunen ta acharen:

¹¹ E manuse ni meliarel so del ande leko mui; so meliarel le si so likel katar leko mui.

¹² Ondaka avile pasa le leke disipulura ta ppende leke: —¿Llane tu kai e fariseura jolaile kana asunde gala alava?

¹³ O Jesus ppenda lenge: —Suako zeledina kai mo dad ni ttoda pe ppuv te bariol ka avel ikandi zilenchar.

¹⁴ Muken len, von si korre ta inllaren averen korren. A iek korro te inllarel avere korre e dui ka peren ande varesavi jar.

¹⁵ O Pedro ppenda leke: —Ppen amenge so ppenel gaia paramichi.

¹⁶ O Jesus ppenda lenge: —¿Ni tumen ni acharen?

¹⁷ ¿Ni acharen kai sa so del ando mui llal ando lli ta pale likel katar e esnaga?

¹⁸ A so likel katar o mui likel andral katar o lio, gua si so meliarel e manuse.

¹⁹ Soke katar o lio liken e bilache mislura, o mundaripe, o kurvaluko, o choripe, o kojaipe, ta i kana kusen e Devle.

²⁰ Gala si e ezgode kai meliaren e manuse; a te jaia bi te jalavea che va gia sar ppenel o zakono katar o jaladipe gua ni meliarel e manuse.

O baro pachape katar e kananaki diskinia

²¹ Kana o Jesus likisto kotar, llelotar ande ppuv katar o Tiro ta katar o Sidon.

²² Ondaka iek diskinia katar o Kanaan kai likistia katar goia ppuv, ttoda te urkil ta ppenela leke: —¡Gazda, Chavo e Davideko, te avel chuke zalba mandar! ¡Iek llavolo cherel me chorra te nakkel bari patnia!

²³ A o Jesus ni ppenda lake ni iek alau. Ondaka, avile pasa le leke disipulura ta mangle letar ta ppende: —Tradela, soke avel pala amende ta urkil.

²⁴ O Jesus ppenda lenge: —Me sem bichaldo samo pala e bakre jasarde katar e Israeleko foro.

²⁵ Ondaka voi avili ttodape changenchar angla le, ta ppenda leke: —¡Gazda pomozisar man!

²⁶ O Jesus ppenda: —Inai sukar te lelpe o marrno katar e chaurre ta te chudelpe e llukelorrenge.

²⁷ Voi ppenda leke: —Ea, Gazda; a llik e llukelorra jan katar e kotora kai peren katar o stali lenge gazdengo.

²⁸ Ondaka o Jesus ppenda lake: —¡Diskinia, baro si cho pachape! Te cherdol chuke sar tu mange. Ta laki chorri sastili ande goia doba.

O Jesus sastarel but nasualen

²⁹ Nakklo o Jesus kotar ta llelotar pasa e mora e Galileaki; likisto po burdo ta kote beslo.

³⁰ Ta avilo but sueto pasa le. Ta anena pea bangen, korren, nemaven, chinde porrnenge, ta but ios nasualen. Ttode len kai e porrne e Jesuseke, ta vou sastardalen;

³¹ goleke sa o sueto chudilape kana dikkela kai e manusa kai nasti dena orba, dena orba; kai e llene kai sea chinde lenge porrne sastona, e bange ppirena, a e korre dikkena ta blagosina e Israeleke Devle.

O Jesus pravarel star milie llenen

³² O Jesus ikkarda pe disipulonen, ta ppenda lenge: —Si mange zao katar gala llene, soke cherel trin llive kai si manchar ta inai len so te jan. Ta ni kamam te bichalau len bokkale kai pe chera, sai baldinpe e dromea.

³³ Ondaka leke disipulura ppende leke: —¿Katar ka ikana amen pe gachin marrne kate po pusto te da te jal gachine llenen?

³⁴ O Jesus pucha len: —¿Pe gachin marrne si tumen? Von ppende: —Efta ta nesave machorre.

³⁵ Ondaka o Jesus ppenda e llenenge te besen pe ppuv,

³⁶ lia ande pe va e efta marrne ta i e mache, dia fala e Devle, ppagla len ta dia pe disipulonen, a e disipulura die e sueto.

³⁷ Saurre jale ta chalile, ta katar e kotora kai achile, pperde efta kotariche.

³⁸ Gola kai jale sea preko star milie murusa bi te llindol e diskinien ta ni e minonen.

³⁹ Ondaka kana ppenda e suetoke te llaltar, likisto ande llimia ta llelo ande ppuv katar e Magdala.