Mateo 14 - Nuevo Testamento Romané 2007

O meripe e Juaneko

¹ Ande gua vreme o Erodes gua kai gazdarila ande Galilea, asunda kai dena orba katar o Jesus,

² ta ppenda pe eslugenge: Gava si o Juan gua kai kristila kai ustilo katar o meripe, goleke vou sai cherel gala bare ezgode.

³ O Erodes ppanglaia e lanchonenchar e Juane ta ttodaia le ande rubie cheres e Erodias kai saia pala o Felipe e Erodeseko pplal,

⁴ soke o Juan ppendaia e Erodeseke: “Tu nasti le la te avel chi romi.”

⁵ A o Erodes mangela te mundarel e Juane, a darala katar o foro, soke o foro mislilape kai o Juan saia porauko.

⁶ A kana dena pachiu pala iek burs ios katar o Erodes, e chei e Erodiaski chelda maskar sa e llene ta avila gia drago e Erodeseke,

⁷ kai vou jala lake sovel te del la sogo voi mangela letar.

⁸ Voi, sar sikadaia la laki dei, ppenda: —De man kate ande tepsia o soro katar o Juan kai kristil.

⁹ Ondaka o Erodes tristosailo, a pala po alau kai diaia la ta i pala e llene kai sea lea pe sinia, ppenda te den la so mangel.

¹⁰ Ta ppenda te llan te chinen e Juaneko soro ande rubie.

¹¹ Ande leko o soro ande iek tepsia ta diele e cheake, ta e chei diale kai pi dei.

¹² Ondaka avile e disipulura e Juaneke, inllarde leki esnaga, prajosarde le ta llele te ppenen e Jesuseke so nakklaia.

O Jesus pravarel panch milie llenen

¹³ Kana o Jesus asunda gala ezgode, llelotar kotar vou korkorre ande iek llimia pe iek rig, dur katar o sueto. Kana o sueto llangla, llele pala le peske katar e forura.

¹⁴ Kana o Jesus fulisto katar e llimia, dikkla e sueto, ta avila leke zao lendar ta sastarda golen kai sea nasuale.

¹⁵ Kana perela e riat, avile pasa le leke disipulura ta ppende leke: —Gava ttan kai sam si pusto ta lel te perel e riat. Ppen e llenenge te llantar ande forichura te chinen fiso te jan.

¹⁶ O Jesus ppenda lenge: —Inai soke te llantar; den len tumen te jan.

¹⁷ Von ppende: —Sa so si amen kate si panch marrne ta dui mache.

¹⁸ Vou ppenda lenge: —Anen len kate.

¹⁹ Ondaka ppenda e suetoke te inzon pe char; ta lia e panch marrne ta e dui mache, vazdia pe akka po miloso, ta molisailo. Ppagla e marrne ta dialen kai pe disipulura, ta e disipulura dielen kai o sueto.

²⁰ Saurre jale ta chalile; ta katar e kotora kai achile, pperde lenchar desudui kotariche.

²¹ Ta gola kai jale sea preko panch milie llene, bi te llindol e diskinien ta e minonen.

O Jesus ppirel upral pe mora

²² Mapalal, o Jesus cherda te liken leke disipulura ande llimia te nakken e mora mai oma neko vou ta te resen pe o goia rig, a vou achilo e llenenchar kai llanatar.

²³ Ta kana lleletar e llene o Jesus likisto pe iek burdo, te sai molilpe korkorre; ta kana peli e riat, vou saia kote korkorre.

²⁴ A e llimia saia po maskaral katar e mora, ta e valura chalavena la soke e balau chalavela lenge anglal.

²⁵ A kana lena te pparron e zor o Jesus llelo lende ppirindo upral pe mora.

²⁶ E disipulura kana dikkle kai ppirela upral pe mora, daraile ta ppenena: —¡Avilpe! ta urkina daratar.

²⁷ A o Jesus ppenda lenge: —¡Cheren tumenge zor! ¡Me sem: na daran!

²⁸ Ondaka o Pedro ppenda: —Gazda, te san tu ppen i me te llau tute upral pe mora.

²⁹ A vou ppenda: Aide. Ta kana fulisto o Pedro katar e llimia ppirda upral pe mora ta llala karing o Jesus.

³⁰ A kana dikkla e bari balau, avila leke dar ta ttoda te tasol. Ondaka urkisarda: —¡Gazda braduisar man!

³¹ Isto kote o Jesus, inzarda po va, ta istardale ta ppenda leke: —¡Manus bi pachamako! ¿Soke darailan?

³² Kana von likiste ande llimia e balau achili.

³³ Ondaka e llene kai sea ande llimia die changa angla o Jesus ta ppenena: —¡Chachimaia tu san o chavo e Devleko!

O Jesus sastarel e nasualen katar o Jenesaret

³⁴ Nakkle pe o goia rig katar e mora, ta avile kai e ppuv katar o Jenesaret.

³⁵ Kana e llene katar gua foro llangle ko saia o Jesus, inllarde e viasta truial katar sa goia ppuv ta ande lete sa e nasualen;

³⁶ ta molinape leke te mukel len samo te dodin iek rig katar leko gertachi; ta sa gola kai dodina le, sastona.