Mateo 13 - Nuevo Testamento Romané 2007

E paramichi katar o simichari

¹ Isto gua llive o Jesus likisto katar gua cher ta beslo pasa e mora.

² Ta sar avilo pasa le but sueto likisto ande llimia ta beslo, a sa o sueto saia pe chisai.

³ Ondaka o Jesus dia lenge but orbe ande paramiche ta ppenela: “Iek simichari llelo te ttovel e simiche ande ppuv.

⁴ Ta kana ttovela e simiche, nesave peletar pasa o drom; avile e chiriklia ta jale e simiche.

⁵ Aver simiche peletar maskar e barra, kote kai ni saia but chik; goleke goia simicha barili oma;

⁶ a kana o kkam likisto, ppabarda la ta sukili, soke ni saia la zile.

⁷ Aver simiche peletar maskar e karrne, ta kana e karrne barile tasade la.

⁸ A nesave peletar pe lachi ppuv ta barili ta dia septelie, nesave die stotina, aver sovardes, aver tranda katar iek.

⁹ Ko si le kan te asunel.”

Pala so si e paramiche

¹⁰ Ondaka e disipulura avile pasa o Jesus ta puche le: —¿Soke de orba lenchar ande paramiche?

¹¹ O Jesus ppenda lenge: “O Del sikavel tumenge so si gurudino katar e charoina e milosoki a lenge inai chinado.

¹² Goleke, gole kai si le, ka avel leke dino mai but; ta ka avel le but a gole kai inai le, i so si le ka avel letar ikando.

¹³ Goleke lenchar dau orba ande paramiche, soke dikken a ni dikken, asunen a ni ka asunen ta ni acharen.

¹⁴ Goleke lenge cherdili e porouka katar o Isaias kana ppenda: ‘E kanenchar ka asunen, ta e akkenchar ka dikken a niso ni ka acharen.

¹⁵ Soke o lio gale foroko cherdilo zuralo, ta pe kanenchar asunen ppare, ta ppangle pe akka te na dikken, ta ppangle pe kan te na asunen cherdele te na acharen te na irinpe mande te sastarau len.’

¹⁶ “Blagosime tumare akka soke dikken, ta tumare kan soke asunen.

¹⁷ Chachimaia ppenau tumenge, kai but poraukura ta i chache manusa mangle te dikken so tumen dikken ta ni dikkle, ta te asunen so tumen asunen ta ni asunde.

O Jesus ppenel so si e paramichi katar o simichari

¹⁸ “Asunen akana so mangel te ppenel e paramichi katar o simichari:

¹⁹ Kana vareko asunel e orba katar e charoina ta ni acharel la, avel o bilacho ta lel so saia ttodo ande leko lio; gaia si e simicha kai pelitar pasa o drom.

²⁰ E simicha kai peli maskar e barra si sargo gola llene kai: Asunen e lachi viasta ta len la veselimaia,

²¹ a sar inai len zile, oma muken o drom e Devleko ta kana avel e patnia ta kana mangen te maren len cheres e orba e Devleki, oma peren.

²² A e simicha kai peli maskar e karrne si sargo gola llene kai asunen e Devleki orba, a e briga te cheren love ande gava sueto, ta o volipe kai si len po barvalipe kojaven len ta sa gala ezgode tasaven e orba e Devleki, ta ni muken len te den septelie ande lende.

²³ A e simicha kai peli pe lachi ppuv, si sargo gola llene kai asunen e orba e Devleki ta acharen la ta den septelie; ta den stotina, sovardes, ta tranda pe iek.”

E paramichi katar e bilache patra maskar o lliu

²⁴ O Jesus ppenda lenge aver paramichi ta ppenela: “E charoina e Devleki si sargo iek manus kai chudia lachi simicha ande pi umal.

²⁵ Ta kana sa e llene sovena avilo leko dusmano ta chudia bilache simiche maskar o lliu ta llelotar,

²⁶ ta kana barilo o lliu, i e bilache patra barile;

²⁷ ondaka llele e esluge kai o gazda e umaliako ta ppende leke: gazda ¿ni ttodan lachi simicha ande chi umal a katar likiste gala bilache patra?

²⁸ Vou ppenda lenge: ‘Iek dusmano cherda gava.’ A e esluge ppende leke: ‘¿Mange te lla te ikana gola patra?’

²⁹ A o gazda ppenda lenge: ‘Iok soke sai avelpe kai kana ka chirden e bilache patra tumen sai chirden i o lliu.

³⁰ Mai sukar muken te barion e dui pe iek ttan lligo ni ka avel o vreme te chiden o lliu, ondaka ka ppenau e eslugenge: mai anglal chiden e bilache patra ta ppanden len pe umpe ta ppabaren len; a o lliu chiden le ande mi soba.’ ”

E paramichi katar e simicha mostasaki

³¹ O Jesus ande aver paramichi ppenda lenge gia: “E charoina e milosoki si sargo e simicha katar e mostasa kai iek manus lia la ta ttoda la ande chik katar pi umal.

³² Chachimaia voi si e mai minoni katar sa e simiche; a kana bariol cherdol e mai bari katar o vostano, ta cherdol sargo iek kas, gia baro kai e chiriklia llan ta cheren pe kuibura pe leke krangura.”

E paramichi katar e levadura

³³ O Jesus ande aver paramichi ppenda lenge gia: “E charoina e Devleki si sargo e levadura kai lia iek diskinia ta ttoda la ande iek umpa arina ta sa goia arina ppukkili.”

Sar sikavel paramichenchar

³⁴ Sa gala orbe ppenda o Jesus ande paramiche, a bi e paramichenchar ni dela lenge orba.

³⁵ Te sai cherdol so ppendaia o porauko: “Ka dau orba ande paramiche; ka ppenau ezgode gurudine sar kana o Del cherda e sueto.”

E bilache patra

³⁶ Ondaka kana o Jesus mukla e llenen ta dia ando cher, avile pasa le leke disipulura ta ppende leke: Sikau amen so ppenel e paramichi katar e patra e bilache.

³⁷ O Jesus ppenda lenge: “Gua kai chudel e lachi simicha, si o Chavo e manuseko.

³⁸ E umal si o sueto; e lachi simicha si e chave e charoinake, a e bilache patra si e chave e bilacheke.

³⁹ O dusmano kai chudia e bilachi simicha si o llavolo; o vreme kana chidelpe o lliu si kana ka avel o son e ppuviako, a e llene kai chiden o lliu si e suechura.

⁴⁰ Goleke, gia sar chidelpe e bilache patra ta ppabardon ande iag, isto gia ka avelpe kana ka avel o son e ppuviako.

⁴¹ O Chavo e manuseko ka bichalel pe suechonen, ta ka chiden katar pi charoina sa golen kai cheren te peraven averen ta golen kai cheren o bilachipe,

⁴² ta ka chuden len ande furnava iagaki; kote ka avel o roipe ta e bari dar.

⁴³ Ondaka e llene chache ka klichin sargo o kkam ande pe Dadeki charoina. Ko si le kan te asunel.

E paramichi katar o barvalipe gurudino

⁴⁴ “Ta i e charoina e milosoki si sargo iek barvalipe gurudino ande iek umal kai iek lleno malavel ta guruvel le pale, ta llal veselimaia ta bichinel sa so si le ta chinel goia umal.

E but sukar klen

⁴⁵ “I e charoina e milosoki si sargo iek lleno kai chinel ta i bichinel lache klea,

⁴⁶ ta kana malavel iek klen but sukar, llal ta bichinel sa so si te sai chinel la.

E paramichi katar e mreza

⁴⁷ “E charoina e milosoki si sargo iek mreza, kai kana chuden la ande mora chidel katar sa e mache.

⁴⁸ Ta kana si pperdi, ikanen la katar e mora pe iek rig, ta ttovenpe besindo ta chiden e mache lache ande kotariche a e bilachen chuden avri.

⁴⁹ Isto gia ka avelpe kana ka avel o son e ppuviako: Ka liken e suechura ta ka ikanen e bilachen katar e lache,

⁵⁰ ta ka chuden e bilachen ande furnava iagaki; kote ka avel o roipe ta e bari dar.”

O barvalipe nevo ta i purano

⁵¹ O Jesus pucha len: —¿Tumen acharden gala ezgode? —Von ppende: Ea, Gazda.

⁵² O Jesus ppenda lenge: —Goleke suako kovachi e zakonoko llanglo ande charoina e milosoki si sargo iek dad kai si le porodo kai ikanel katar po barvalipe ezgode neve ta i purane.

O Jesus ando Nazaret

⁵³ Kana o Jesus ppenda gala paramiche llelotar kotar.

⁵⁴ Ta avilo kai pi ppuv, ta sikavela ande kkanllira e judionenge kai sea kote. Ta e llene chudinape ta ppenena: —¿Katar lel gua bizaipe ta cherel gala bare ezgode Devlikane?

⁵⁵ ¿Inai gava o chavo katar gua kai cherel ezgode kastune? ¿Ni ikkardol leki dei Maria, ta leke pplal, o Santiago, o Jose, ta i o Simon ta o Judas?

⁵⁶ ¿Ta ni si sa leke ppiorra amenchar? ¿Katar ikanel gava sa gala ezgode?

⁵⁷ Ta saurre joliaona cheres lete. A o Jesus ppenda lenge: —Inai porauko te den le pachiu isto ande piri ppuv ta i ande piro cher.

⁵⁸ Ta kote ni cherda but bare ezgode Devlikane soke von ni pachana.