Marko 9 - Nuevo Testamento Romané 2007

¹ Ta i ppenda lenge o Jesus: —Chachimaia ppenau tumenge kai nesave llene kai akana si kate, ni ka meren lligo ni ka dikken sar ka avel zoriaia e charoina e Devleki.

E Jesuseki esnaga cherdol sargo aver

² Nakkle sou llive kotar, ta o Jesus llelotar pe iek burdo baro ta inllarda pea samo e Pedro, e Santiago ta e Juane. Kote angla lende cherdilo sargo aver.

³ Leke patave klichisarde ta cherdile gia parne kai niko i mai te jalavel len nasti muklaia len gia parne.

⁴ Ta dikkle e Eliase ta e Moisese kai dena orba e Jesusea.

⁵ Ondaka o Pedro ppenda e Jesuseke: —Kovachi, ¡Gia sukar kai sam kate! Ka chera trin cherorra e patrenchar: Iek chuke, aver e Moiseseke ta aver e Eliaseke.

⁶ E disipulura daraile but, ta o Pedro ni llanela so ppenela.

⁷ Ondaka avilo iek oblako ucharda len. Ta asundilo iek avazi katar o oblako, kai ppenela: “Gava si mo Chaurro kai voliu le. Le asunen.”

⁸ Ondaka kana dikkle truial petar ni dikkle nika, samo e Jesuse.

⁹ Kana fuliena katar o burdo, o Jesus ppenda lenge te na ppenen nikake so dikkle, lligo ni ka ustel katar o meripe o Chavo e manuseko.

¹⁰ Goleke gurude goia orba maskar pete, a puchena iek avere so sai avel goia orba kai ka ustel katar o meripe.

¹¹ Ondaka puchle e Jesuse: —¿Soke e kovacha e zakonoke ppenen kai mai anglal si te avel o Elias?

¹² O Jesus ppenda lenge: —Gua si o chachipe, o Elias avel mai anglal ta ka lacharel sa e ezgode. ¿A soke e Devleke alava ppenen kai o Chavo e manuseko ka nakkel patnia ta, niko ni ka mangel le?

¹³ A me ppenau tumenge kai o Elias ia avilo, ta von ni pinllarde le, ta cherde lea sogo mangle, isto gia sar ppenen e Devleke alava.

O Jesus sastarel iekke chaurre kai saia ande le iek duo bilacho

¹⁴ Kana irisaile kote kai sea e disipulura, dikkle kai truial lendar sea but llene, ta nesave kovacha e zakonoke janape e disipulonenchar.

¹⁵ Kana dikkle e Jesuse, sa e llene veselisaile ta prastie lete te den lea orba.

¹⁶ O Jesus puchla len: —¿Pala savi orba jan tumen lenchar?

¹⁷ Iek katar e llene kai sea kote ppenda: —Kovachi, andem tute me chaurre, soke ande lete si iek duo kai mukla le nemao.

¹⁸ Kai go te avela vou, o duo istarel le ta peravel le pe ppuv; ta chudel o chungar katar po mui, kirchin leke danda, ta chapenilpe leki esnaga. Manglem katar che disipulura te traden letar gole duo, a von nasti cherde le.

¹⁹ O Jesus ppenda: —¡Manusalen bi pachamake! ¿Pe gachin ios morabi te avau tumenchar? ¿Pe gachin ios morabi te terpiu tumen? Anen mange kate e chaurre.

²⁰ Ondaka inllarde e chaurre kai o Jesus. A kana o duo dikkla e Jesuse, cherda e chaurre te perel bengendar, ta te taulilpe pe ppuv ta te chudel chungar katar po mui.

²¹ O Jesus puchla e chaurreke dade. —¿Sar kana si gua che chaurreke? O dad e chaurreko ppenda: —Sar kana saia minono.

²² Ta but droma gua duo chudela le ande iag ta ando pai, te mundarel le. A te sai chere vareso pala le, te avel chuke zalba amendar ta pomozisar amen.

²³ O Jesus ppenda leke: —¿Soke ppene “te sai chere”? ¡Sa sai cherdol gole lleneke kai pachan!

²⁴ Ondaka o dad e chaurreko urkisarda: —Me pachau ¡Pomozisar man te pachau mai but!

²⁵ Kana dikkla o Jesus kai chidiniaona but llene, dia pe gua duo bilacho ta ppenda leke: —Duo nemavo ta kasuko, me ppenau chuke te like katar gava chaurro ta te na de ios ande lete.

²⁶ O duo urkisarda ta cherda e chaurre te perel pale bengendar. Ondaka likisto letar, ta mukla le sargo mulo, ta but llene ppenena kai saia mulo.

²⁷ A o Jesus, istarda le e vastetar, vazdia le; ta o chaurro ustilo pe porrne.

²⁸ Mapalal o Jesus dia ande iek cher, ta leke disipulura puchle le korkorre ta ppende leke: —¿Soke amen nasti tradiam gole duo?

²⁹ A o Jesus ppenda lenge: —Gala duura sai tradiniaon samo e molimaia.

Pale o duito ppenel o Jesus kai ka merel

³⁰ Kana lleletar kotar, nakkle katar e Galilea. A o Jesus ni kamla te llanel le niko,

³¹ soke sikavela pe disipulonen ta ppenela lenge gia: —O Chavo e manuseko si te avel dino ande va e manusenge, ta ka mundaren le; a pala e trin llive ka ustel katar o meripe.

³² Von ni acharena so ppenela lenge o Jesus, ta darana te puchen le.

¿Ko si o mai glamno?

³³ Avile ando Kafernaum. Ta kana sea ando cher, o Jesus puchla len: —¿Save orbe dena tumen e dromea?

³⁴ A von ni ppende niso, soke e dromea janape ko saia maskar lende o mai baro.

³⁵ Ondaka o Jesus beslo, ikkarda e desuduien ta ppenda lenge: —Vareko te mangela te avel o mai angluno, morabi te avel o mai paluno, ta te radil saurrenge.

³⁶ Mapalal ttoda iekke minone po maskaral lendar, istarda le ande pe va ta ppenda lenge:

³⁷ —Ko lela ande mo anau iekke minone sargo gale, man lel, ta ko lel man, ni lel samo man, lel i gole kai bichalda man.

Ko ni marelpe amenchar, si amenchar

³⁸ O Juan ppenda leke: —Kovachi, dikklam iekke llene kai tradela e llavolonen ande cho anau, ta amen achavaia le, soke inai iek amarendar.

³⁹ O Jesus ppenda leke: —Muken le, soke nisavo lleno kai cherel iek bari ezgoda Devlikani ande mo anau, ni del bilache orbe mandar mapalal.

⁴⁰ Ko ni marelpe amenchar, si amenchar.

⁴¹ Vareko te del tumen, makar avela iek taso pai, samo soke sen manusa e Kristoke, chachimaia ppenau tumenge kai ka avel le so te dobil.

O zumadipe

⁴² “A vareko te cherela te perel ando bilachipe iek katar gala minone kai pachan ande ma, avela leke mai lache te chuden le ande mora ppanglo e korratar pe iek baro barr.

⁴³ Te si cho va kai cherel tut te pere ando bilachipe, chin le; soke mai lache si te de ando zivoto iekke vastea, neko te ave ando tufano e duie vastenchar, kote kai e iag nasti mundardol,

⁴⁴ kote kai e cherme ni meren ta e iag nikada ni merel.

⁴⁵ A te cherela tut cho porrno te pere ando bilachipe, chin le; soke mai lache si te de iekke porrnea ando zivoto neko te ave chudino e duie porrnenchar ando tufano, kote kai e iag nikada nasti mundardol,

⁴⁶ kote kai e cherme ni meren ta e iag nikada ni merel,

⁴⁷ A chi iak te cherel tut te pere ando bilachipe, ikanla; soke mai lache si te de iekke akkaia ande Devleki charoina, neko e duie akkenchar te ave chudino ando tufano,

⁴⁸ kote kai e cherme ni meren ta e iag ni merel.

⁴⁹ “Soke sa e manusa si te aven londe e iagaia.

⁵⁰ O lon si lacho, a te jasarel po londipe, ¿sar ka cheren te avel londo pale? Isto gia si te avel lon ande tumende, ta ka avel tumen pas iek averea.”