Marko 8 - Nuevo Testamento Romané 2007

O Jesus del te jan bute llenen

¹ Iek llive kana chidinailea pale but llene ta ni saia len so te jan, o Jesus ikkarda pe disipulonen ta ppenda lenge:

² —Si mange zao katar gala llene, soke cherel trin llive kai von si kate manchar ta inai len so te jan.

³ A te bichaldem len bokkale kai pe chera, sai baldinpe e dromea, soke nesave llene avile duratar.

⁴ Leke disipulura ppende leke: —¿A sar ka da len te jan pe iek ttan sargo gava, kana kate ni zivil niko?

⁵ O Jesus puchla len: —¿Pe gachin marrne si tumen? —Von ppende: Efta.

⁶ Ondaka o Jesus ppenda e llenenge te besen pe ppuv, lia ande pe va e efta marrne ta dia fala e Devle, ppagla len, ta dia len kai pe disipulura, te fulaven len von maskar e llene, ta von cherde sar ppenda lenge o Jesus.

⁷ Ta I saia len nesave machorre; molisailo pe lende ta ppenda te fulaven i gola machorre.

⁸ Saurre jale ta chalile, ta chidie e kotora kai achile ande efta kotariche.

⁹ Gola kai jale sea preko star milie llene. Mapalal o Jesus ppenda lenge te llantar,

¹⁰ likisto ande llimia pe disipulonenchar ta llelotar ande ppuv katar e Dalmanuta.

E fariseura mangen iek bari ezgoda Devlikani

¹¹ Avile e fariseura ta ttode te janpe e Jesusea, te sai cheren le te kojadol, ta mangle letar te cherel iek bari ezgoda Devlikani ta gia te sikavel kai vou avela bichaldo e Devletar.

¹² O Jesus lia peke duo zurale ta ppenda: —¿Soke mangen gala llene iek bari ezgoda Devlikani? Chachimaia ppenau tumenge kai ni ka cherau so von mangen.

¹³ Ondaka mukla len kote, likisto ande llimia ta llelotar pe o goia rig katar e mora.

E levadura e fariseonengi

¹⁴ E disipulura bristrailea te inllaren vareso te jan, ta saia len samo iek marrno ande llimia.

¹⁵ O Jesus ppenda lenge: —Arakken tumen katar e levadura e fariseonengi ta katar e levadura e Erodeki.

¹⁶ E disipulura denape orba maskar pete ta ppenena kai ni saia len marrno.

¹⁷ O Jesus acharda ta ppenda lenge: —¿Soke ppenen kai inai tumen marrno? ¿Llik akana ni acharen? ¿Gia ppangle si tumare mislura?

¹⁸ ¿Si tumen akka ta ni dikken? ¿Si tumen kan ta ni asunen? ¿Ni den tumen golli?

¹⁹ Kana fuladem e panch marrne maskar e panch milie llene, ¿pe gachin kotariche pperdem e kotorenchar kai achile? Von ppende: —Desudui

²⁰ —Ta kana fuladem e efta marrne maskar star milie llene, ¿pe gachin kotariche pperde chidien? Von ppende: —Efta.

²¹ Ondaka o Jesus ppenda lenge: —¿Ni ios ni acharen?

O Jesus sastarel iekke korre ande Betsaida

²² Kana avile ande Betsaida, nesave llene inllarde iekke korre kai o Jesus, ta molisaile leke te dodil le.

²³ O Jesus istarda e korre e vastetar ta inllarda le avri katar o foro. Chingarda leke akka e chungarea, ttoda pe va pe lete ta puchla le dal dikkela vareso.

²⁴ O korro lia te dikkel, ta ppenda: —Dikkau e manusen, kai dikkon sargo kasta kai ppiren.

²⁵ O Jesus ttoda pale pe va pe leke akka, ta o korro ttoda sama, ta dikkla ta sastilo. Ta dikkla sa bristomaia.

²⁶ Ondaka o Jesus bichalda le chere, ta ppenda leke: —Na irisao ando foro.

O Pedro ppenel kai o Jesus si o Mesias

²⁷ O Jesus ta leke disipulura llele ande forichura kai sea pasa ppuv katar e Sesarea katar o Filipo. E dromea o Jesus puchla pe disipulonen ta ppenda lenge: —¿Ko ppenen e llene kai sem me?

²⁸ Von ppende leke: —Nesave llene ppenen kai tu san o Juan, gua kai kristil, aver llene ppenen kai tu san o Elias, a aver llene ppenen kai tu san iek katar e poraukura.

²⁹ Ondaka o Jesus puchla len —A tumen ¿ko ppenen kai sem me? O Pedro ppenda leke: —Tu san o Mesias.

³⁰ A o Jesus ppenda lenge te na den leki orba nikake.

O Jesus ppenel kai si te merel

³¹ O Jesus ttodape te sikavel kai o Chavo e manuseko ka nakkel but bari patnia, ta kai ka avel tradino katar e ppure, katar e gazda e poponenge ta i katar e gazda e zakonoke. Ta ppenda lenge kai ka mundaren le, ta kai pala e trin llive ka ustel katar o meripe.

³² Sa goia orba dia lenge bristomaia. Ondaka o Pedro inllarda e Jesuse pe iek rig, ta ttoda te del pe lete.

³³ A o Jesus boldinailo, dikkla pe disipulura ta dia po Pedro, ta ppenda leke: —¡Le tut mandar Satanas! Tu ni dikke e ezgode sargo o Del, tu dikke len sargo manus.

³⁴ Ondaka o Jesus ikkarda pe disipulonen ta e llenen, ta ppenda lenge: —Vareko te mangela te avel mo disipulo, si te bristarelpe vou petar, ta te inllarel po krusto ta te llal pala ma.

³⁵ Soke o lleno kai mangela te braduil po zivoto, ka jasarel le: A a lleno kai jasarel o zivoto pala ma ta pala e lachi viasta kai lia, ka braduil po zivoto.

³⁶ ¿So blazil e manuseke te dobil sogo si po sueto, ta te jasarel po zivoto?

³⁷ O ¿pe gachin sai pochinel o manus pala po zivoto?

³⁸ Vareko te avel leke lallao mandar ta katar me alava angla gala llene kai inai chache ta si bilache, i o Chavo e manuseko ka avel leke lallao lendar kana ka avel ando blagosipe leke Dadeko ta e santone suechonenchar.