Marko 7 - Nuevo Testamento Romané 2007

So cherel e manuse te avel melalo angla o Del

¹ Avile e fariseura kai o Jesus, iekke llenenchar kai sea kovacha e zakonoke kai avilea katar o Jerusalem.

² Gala llene, kana dikkle kai nesave disipulura e Jesuseke jana ta lenge va sea melale, soke ni jaladea pe va gia sar ppenel o zakono (te cherenle).

³ (Soke e fariseura ta sa e judiura cheren prema o zakono e puranengo, ni jan lligo ni jalaven pe va but droma sar si te cherdol.

⁴ Ta kana irinpe katar o foro ni jan lligo ni jalaven pe va sar ppenel o zakono e jaladimako. Ta si sikade te cheren i aver but zakonura, te jalaven e tasura, e bralla, e piria sastrune ta i o ttan kai soven)

⁵ Goleke, e fariseura ta e kovacha e zakonoke puchle le ta ppende leke: —¿Soke che disipulura ni cheren prema so sikade amen e purane, ta jan a lenge va si melale?

⁶ O Jesus ppenda lenge: —Orta dia orba o porauko Isaias kana ppenda kai sen kojamne ta pisisarda gia: “Gava foro del man liubao pe alavenchar, a lengo lio si dur mandar.

⁷ Samo gia den man liubao, soke so tumen sikaven si zakonura manusenge.”

⁸ Tumen ppagen o zakono e Devleko te sai llan pala e zakonura e manusenge.

⁹ Ta i ppenda lenge: —Tumen nakklen upral po zakono e Devleko te sai cheren tumare zakonura.

¹⁰ Soke o Moises ppenda “De liubao che dade ta i che da,”, a “ko dela armaia pe dade o pe da trubul te merel.”

¹¹ A tumen ppenen kai iek manus sai ppenel pe dadeke o pe dake: “Nasti pomoziu tut, soke sa so si man si te daule kurbano e Devleke.”

¹² Ta i ppenen kai ko ppenel gola alava inai soke te del liubao pe dade ta ni pe da.

¹³ Ta gia sar tumen cheren, ppagen e o zakono e Devleko gale zakonoia kai tumen sikaven iek avere, ta cheren ios mai but ezgode sargo gala.

¹⁴ Mapalal o Jesus ikkarda e llenen, ta ppenda lenge: —Asunen man saurre ta acharen:

¹⁵ Niso katar so jal o manus nasti meliarel e manuse. So likel katar e manuseko lio gua si so meliarel le.

¹⁶ Vareka te si kan, te asunel.

¹⁷ Kana o Jesus mukla e llenen ta dia ando cher, leke disipulura puchle le katar e orba kai ppendaia lenge.

¹⁸ Vou ppenda lenge: —¿A ni tumen ni acharen? ¿kai niso katar so si avri ta del ando manus nasti meliarel e manuse,

¹⁹ soke ni del ando lio, del ando lli, ta mapalal likel katar e esnaga? Gale orbaia o Jesus mangla te ppenel kai sa o jape si chisto.

²⁰ Ta i ppenda: —So likel katar o manus, gua si so cherel le te avel melalo.

²¹ Soke andral katar o lio e manusengo liken e bilache mislura, o kurvaluko, o vazdinipe, o mundaripe,

²² o zelnipe pe averenge ezgode, o bilachipe, o kojaipe, o blagosipe pe bilache ezgode, e joli kana avere si vareso, e bune, o istardipe ta o dilipe.

²³ Sa gala ezgode bilache liken andral, ta gua si so meliarel e manuse.

O pachape katar iek diskinia kai ni saia judia

²⁴ O Jesus llelotar kotar ande ppuv katar o Tiro. Dia ande iek cher, ta ni kamela te llanel niko kai vou saia kote; a nasti gurudilo ande gua cher.

²⁵ Iek diskinia kai ande laki chei saia iek duo bilacho, llangla kai o Jesus avilo kote ta lleli ta dia changa angla le.

²⁶ Goia diskinia ni saia judia, voi saia katar e ppuv katar e Fenisia. Lleli ta molisali e Jesuseke te tradel katar laki chorri e llavolo.

²⁷ A o Jesus ppenda lake: —Muk te jan mai anglal e chave, soke inai sukar te lelpe o marrno katar e chaurre ta te chudelpe e llukelorrenge.

²⁸ Voi ppenda leke: —Gazda, gua si o chachipe, a llik e llukelorra jan telal katar o stali e kotora kai muken te peren e chaurre.

²⁹ O Jesus ppenda lake: —Soke dian orba gia, llatar esmiro. O llavolo likisto katar chi chorri.

³⁰ Ta kana e diskinia avili kai po cher, malada e minona pe postelia; soke o llavolo likistoia latar.

O Jesus sastarel iekke manuse kai saia kasuko ta i nemao

³¹ O Jesus pale likisto katar o Tiro ta nakklo katar o Sidon ta avilo kai e mora e Galileaki, ande ppuv katar e Dekapolis.

³² Kote ande lete iekke manuse kai saia kasuko ta i nemao ta mangle katar o Jesus te ttovel po va pe lete ta te sastarel le.

³³ O Jesus inllarda le pe iek rig, dur e llenendar, ttoda pe naia ande leke kan ta ttoda pe leki chib chungar.

³⁴ Ondaka, dikkla upre ando miloso, lia peke duo, ta ppenda e nemaveke: “¡Efata!” (Gua si: “¡Putao!”)

³⁵ Ondaka, e kan e kasukeke putaile, ta putaili leki chib ta dia orba sukar.

³⁶ O Jesus ppenda lenge te na ppenen le nikake; a von ios mai but ppenena le e llenenge.

³⁷ A von chudisaile but, ta ppenena: “Sogo cherel si sukar. ¡Cherel llik e kasuke te asunen ta e nemave te den orba!”