Marko 6 - Nuevo Testamento Romané 2007

O Jesus ando Nazaret

¹ O Jesus llelotar kotar karing po foro o Nazaret, ta leke disipulura llele lea.

² Kana avilo o sabado, ttoda te sikavel ande kkanlliri e judionengi. Ta but llene kana asunde e Jesuse, chudisaile ta puchenape: —¿Kai sikilo gava lleno pe gachin ezgode? ¿Ta katar ikanda gua bizaipe ta gola bare ezgode kai cherel?

³ ¿Inai gava o lleno kai cherel ezgode kastune, ta si chavo e Mariako ta pplal e Santiagoko, e Joseeko, e Judaeko ta e Simonoko? ¿Ta ni zivin kate maskar amende i leke pplal? Ta ni pachana ande lete.

⁴ A o Jesus ppenda lenge: —Pe suako rig den liubao iekke porauko. Samo ande leki ppuv ni den le liubao, ni maskar pi familia ta ni ande leko cher.

⁵ Kote nasti cherda ni iek bari ezgoda Devlikani, samo ttoda pe va pe nesave nasuale ta sastarda len.

⁶ Ta chudisailo soke gola llene ni pachana ande le ta o Jesus llala kai e forichura kai sea truial ta sikavela.

⁷ Ikkarda e desuduie disipulonen, ta ttoda te bichalel len po dui llene, ta dia len te gazdarin pe duura bilache.

⁸ Ta ppenda lenge te na inllaren niso e dromeke, samo iek rovli. Ta saia te na inllaren ni jape ni love.

⁹ Sai ttovena sinele, a nasti inllarena premena.

¹⁰ Ta i ppenda lenge o Jesus: —Kana tumen ka den ande iek cher, racharen kote lligo ni ka llantar katar gua ttan.

¹¹ A varende te na avile tumenchar pachivale, ta te na mangle ni te asunen tumen, liken kotar ta chinosaren o prajo katar tumare porrne te dikken kai ni avila tumenge drago so cherde tumenchar.

¹² Ondaka e disipulura llele te ppenen e llenenge te irinpe karing o Del.

¹³ Ta i tradie bute llavolonen, ta ttovena zeitino pe but nasuale ta sastarena len.

O meripe e Juaneko gua ka kristila

¹⁴ O charo o Erodes asunda kai dena orba katar o Jesus, soke leki viasta llelia pe suako rig. A Nesave llene ppenena: “O Juan gua kai kristila ustilo katar o meripe, ta goleke vou sai cherel gala bare ezgode.”

¹⁵ Aver llene ppenena: “Vou si o porauko o Elias” A aver ppenena: “Vou si iek porauko, sargo e purane poraukura.”

¹⁶ Kana o Erodes asunda so ppenena e llene, ppenda: —Gua lleno si o Juan. Me bichaldem te chinen leko soro ta akana ustilo katar o meripe.

¹⁷ O Erodes cheres e Erodias, bichaldaia te ppanden e Juane, ta ppenda te ppanden le lanchonenchar ande rubie. E Erodias saia zinime e Filipoia, pplal e Erodeseko, a o Erodes zinisailoa laia.

¹⁸ A o Juan ppendaia e Erodeseke: “Tu nasti chere chiri e romi che pplaleki.”

¹⁹ Goleke e Erodias murzila po Juan, ta mangela te mundarel le; a nasti cherela le,

²⁰ soke o Erodes darala letar, soke llanela kai o Juan saia iek manus chacho ta Santo, ta vou arakkela le. Kana o asunela le ni acharela leke so ppenela, a e Erodeske saia drago kana asunela le.

²¹ A e Erodias dikkla kai sai cherel pe piro soke o Erodes nakkela iek burs ios sar kana biandiloia, ta cherda iek baro jape pe mai bare sudonenge ta e llenenge kai sea mai asunde ande Galilea.

²² Ondaka e chei e Erodiaski dia kote kai jana ta chelda, ta avila gia drago e Erodeseke ta e llenenge kai besena lea pe sinia, kai o charo ppenda e cheake: —Mang mandar sogo kamea, ta me ka dau le chuke.

²³ Ta jala lake sovel but droma kai ka del la sogo voi mangela letar, i dopas katar o foro kai vou gazdarila.

²⁴ E chei likisti kotar, ta puchla pe da: —¿So ka mangau letar? A laki dei ppenda lake: —Mang letar o soro katar o Juan kai kristil.

²⁵ E chei lleli oma kai o charo, ta ppenda leke: —Mangau te ane isto akana ande iek tepsia o soro katar o Juan kai kristil.

²⁶ O charo tristosailo but a pala po alau kai diaia la ta i pala e llene kai sea lea pe sinia, ni kamla te ppenel lake iok pe so voi mangla letar.

²⁷ Ondaka bichalda iekke boñiko te anen lete o soro e Juaneko. O boñiko llelo ande rubie, chinda e Juaneko soro

²⁸ ta inllarda o soro ande iek tepsia, ta diale e cheake, ta e chei diale kai pi dei.

²⁹ Kana e disipulura e Juaneke llangle kai vou mulo, lie leki esnaga ta inllarde le te prajon le.

O Jesus del te jal bute llenen

³⁰ Mapalal, e disipulura chidinaile e Jesusea ta ppende leke sa so von cherde ta so von sikade.

³¹ O Jesus ppenda lenge: —Aven, samo amen te lelpe amendar o chiñipe pe iek ttan mai esmiro. Soke sea pe gachin llene kai llana ta avena kai ni resela len o vreme ni te jan.

³² Ondaka o Jesus ta leke disipulura llele dur ande iek llimia.

³³ A but llene dikkle len kana llanatar, ta pinllarde len. Ondaka katar sa e forura prastie incha, ta avile mai oma neko von.

³⁴ Kana o Jesus fulisto katar e llimia, dikkla e sueto, ta avila leke zao lendar, soke sea sargo bakre kai inai len chobano; ta ttodape te sikavel len but ezgode.

³⁵ Pasa e riat, avile kai o Jesus leke disipulura ta ppende leke: —Gava ttan kai sam si pusto ta lel te perel e riat.

³⁶ Ppen e llenenge te llantar pe droma ta ande forichura kai si truial te chinen peke vareso te jan.

³⁷ A o Jesus ppenda lenge: —Den len tumen te jan. Von ppende leke: —¿Mange te lla te china marrno kai mol le o rado iekke burseko te da len te jan?

³⁸ O Jesus ppenda lenge: —¿Pe gachin marrne si tumen? Llan te dikken. Kana dikkle, ppende leke: —Panch marrne ta dui mache.

³⁹ Ondaka ppenda te cheren e llenen te besen pe char zeleni, nesave pe iek rig a averen pe aver rig.

⁴⁰ Ta besle po stotina ta po pinda llene.

⁴¹ Ta o Jesus lia ande pe va e panch marrne ta e dui mache, dikkla ando miloso ta molisailo, ppagla e marrne ta dia len kai pe disipulura te fulaven len e llenenchar. Ta fulada i e dui mache sa e llenenchar.

⁴² Saurre jale ta chalile;

⁴³ ta katar e kotora kai achile katar o marrno ta e mache pperde lenchar desudui kotariche.

⁴⁴ Gola kai jale katar e marrne sea preko panch milie murusa.

O Jesus ppirel upral pe mora

⁴⁵ Mapalal, o Jesus cherda te liken leke disipulura ande llimia te nakken pe o goia rig katar e mora mai oma neko vou, karing e Betsaida, a vou achilo e llenenchar kai llanatar.

⁴⁶ Ta kana lleletar e llene, llelo po burdo te molilpe.

⁴⁷ Kana peli e riat, e llimia saia po dopas katar e mora. A o Jesus achilo korkorre pe ppuv,

⁴⁸ ta dikkla kai nasti cherena te llal angle e llimia soke e balau chalavela lenge anglal. A kana lena te pparron e zore llelo lende o Jesus ppirindo upral pe mora, ta lela te nakkel pasa lende,

⁴⁹ kana dikkle kai ppirela upral pe mora, mislisaile kai saia iek chojano, ta urkisarde;

⁵⁰ soke sa dikkena le ta daraile. A o Jesus ppenda lenge: —¡Cheren tumenge zor! ¡Me sem: na daran!

⁵¹ Likisto ande llimia, ta e balau achili, ta von chudisaile but;

⁵² soke ni achardea e bari ezgoda kai cherdaia e marrnenchar, soke lengo mislo saia ando truñariko.

O Jesus sastarel e nasualen katar o foro o Jenesaret

⁵³ Nakkle pe o goia rig katar e mora ta avile ando Jenesaret, ta ppangle e llimia pasa e ppuv.

⁵⁴ Samo so fuliste katar e llimia, e llene pinllarde e Jesuse.

⁵⁵ Ppirde sa goia ppuv, ta anena e nasualen ande postelie kote kai asunena kai si o Jesus.

⁵⁶ Ta kai go llala o Jesus, ande forichura, forura o pe droma, ttovena e nasualen po drom ta molinape leke te mukel len samo te dodin iek rig katar leko gertachi; ta sa gola kai dodina le, sastona.