Marko 5 - Nuevo Testamento Romané 2007

O gadareno kai ande le sea llavolula

¹ Avile pe o goia rig katar e mora, ande ppuv katar e Jerasa.

² Samo so fulisto o Jesus katar e llimia, avilo lete iek lleno kai saia ande le iek duo bilacho, gava lleno likistoia katar e limoria,

³ soke vou zivila andre. Ta niko nasti istarela le, ni lanchonenchar.

⁴ But droma ppanglea leke va ta i leke porrne lanchonenchar, a vou suako drom drobosarela e lanchura, ta niko nasti achavela le.

⁵ Ta sorro llive ta sorro riat urkila maskar e burdura ta maskar e limoria ta chalavelape e barrenchar.

⁶ A kana dikkla e Jesuse duratar, prastio, ta dia changa angla le,

⁷ ta urkisarda zurale: —¡Na amisao manchar, Jesus, Chavo katar o Del e milosoko! ¡Mangau tutar ando anau e Devleko te na patisare man!

⁸ Vou dela orba gia soke o Jesus ppenela leke: —¡Like katar gava lleno, duo bilacho!

⁹ Ta puchla le: —¿Sar ikkardo? Vou ppenda: —Mo anau si lejion, soke sam but.

¹⁰ Ta mangla but e Jesusetar te na bichalel e duonen avri katar gua foro.

¹¹ A sar kotar pase, pe iek rig e burdoki, sea but bale kai jana,

¹² e duura mangle letar, ta ppende leke: —Bichal amen ande bale ta muk amen te da ande lende.

¹³ O Jesus mukla len te den ande bale, ta gola duura likiste katar gua lleno ta die ande bale. Ta e bale sea preko dui milie, prastie karing e mora katar iek jar, ta kote ande mora tasile.

¹⁴ E llene kai arakkena e balen nasle, ta llele te ppenen ando foro ta pe droma so von nakkle ta e llene avile te dikken so avilaiape.

¹⁵ Ta kana avile kai o Jesus, dikkle gole llene kai saia ande le o llavolo ta e lejion e Duonengi, kai saia besindo, furiado, ta ande pi golli, ta e llene daraile,

¹⁶ ta gola llene kai dikkle so nakkla o lleno kai saia ande le e llavolura, ta so avilape e balenchar, ppende avere llenenge so nakkle.

¹⁷ Ondaka mangle e Jesusetar te llaltar kotar.

¹⁸ Kana o Jesus irisailo kai e llimia, o lleno kai saia ande le e llavolura mangla letar te llal lea.

¹⁹ A o Jesus nikamla, ta ppenda leke: —Llatar kai cho cher, kai chi familia, ta ppen lenge sa so cherda chuke o Gazda, ta sar avila leke zalba tutar.

²⁰ Gua lleno llelotar ta ttodape te ppenel ande forura katar e Dekapolis so cherda o Jesus pala le; ta sa chudisaile.

E diskinia kai saia nasuali ta e chorri e Jairoki

²¹ Kana o Jesus irisailo ande llimia pe o goia rig katar e mora, chidinaile but llene, ta vou achilo pasa e mora.

²² Ta avilo iek katar gola kai gazdarin ande kkanlliri e judionengi kai ikkardola Jairo; ta kana dikkla e Jesuse chudiape pe leke porrne,

²³ ta mangla letar but, ta ppenela leke: —Mi chorri merel; aide te ttove che va pe late, te sai sastol ta te zivil.

²⁴ O Jesus llelo lea, ta but llene llana truial letar.

²⁵ A maskar o sueto saia iek diskinia kai saia nasuali, ta cherela desudui burs kai peravela rat.

²⁶ Nakkla bari patnia bute doktorenchar, ta jalaia sa pe love lenchar, ta nasti sastarde la, ta llala lake ios mai gore.

²⁷ Kana asunda kai dena e Jesuseki orba, goia diskinia avili maskar e llene ta ttodape pase pala o Jesus ta dodisarda leko gertachi.

²⁸ Soke ppenela voi peke: “Samo te dodiu leko gertachi ka sastivau.”

²⁹ Ta isto kote o rat achilo, ta acharda pe pi esnaga kai sastili katar po nasualipe.

³⁰ Ondaka o Jesus ttoda sama kai likista letar zor, boldinailo te dikkel pe llene, ta puchla: —¿Ko dodisarda mo gertachi?

³¹ Leke disipulura ppende leke: —Dikke kai o sueto espidel tut katar suako rig, a puche: ‘¿Ko dodisarda tut?’

³² A o Jesus pale prezola truial pe, te dikkel ko dodisardaia le.

³³ Ondaka e diskinia, izdrala daratar, soke llanela so avilape laia, lleli ta dia changa angla le, ta ppenda leke sa o chachipe.

³⁴ A o Jesus ppenda lake: —Chorrie, pala cho pachape avilan sastardi. Llatar esmiro ta sasti katar cho nasualipe

³⁵ Ta kana o Jesus dela orba, avile nesave llene katar o cher e Jairoko; O Jairo saia iek katar e llene kai gazdarina ande kkanlliri e judionengi, ta ppende e Jairoke: —Chi chorri mulitar. ¿Na joliar ios e Gazda?

³⁶ A o Jesus ni ttoda lenge sama, ta ppenda e Jairoke: —Na dara; samo pacha.

³⁷ Ta ppenda te llan lea samo o Pedro, o Santiago ta o Juan, o pplal e Santiagoko.

³⁸ Kana avile kai o cher e Jairoko ta dikkle e burkania ta e llenen kai rovena ta urkina,

³⁹ o Jesus dia andre ta ppenda lenge: —¿Soke cheren gachin burkania ta roven gia? E minoni inai muli, voi sovel.

⁴⁰ E llene asaie e Jesusetar, a vou cherda te liken sa avri, ta lia e dade, ta e dea ta e llenen kai sea lenchar, ta die andre kote kai saia e minoni.

⁴¹ Istarda la e vastetar ta ppenda lake: —Talita, kumi (kai gua si: “Chorrie, chuke ppenau, uste”).

⁴² Ondaka e chorri, kai sea lake desudui burs, ustili ta ttoda te ppirel. Ta e llene chudisaile but.

⁴³ A o Jesus ppenda lenge te na ppenen le nikake, ta mapalal ppenda te den la te jal.