Marko 4 - Nuevo Testamento Romané 2007

E paramichi katar o simichari

¹ O Jesus pale sikavela pasa e mora, ta sar chidinaile but llene, o Jesus likisto ande iek llimia kai saia ande mora, ta beslo andre, a e llene besena pe ppuv.

² Ondaka ttoda te sikavel len but ezgode ande paramiche. Kana sikavela len ppenela lenge gia:

³ “Asunen: Iek simichari llelo te ttovel e simiche ande ppuv.

⁴ Ta kana ttovela len, nesave simiche peletar pasa o drom, ta avile e chiriklia ta jale e simiche.

⁵ Aver simiche peletar maskar e barra, kote kai ni saia but chik; goleke goia simicha barili oma soke ni saia but chik,

⁶ a kana o kkam likisto, ppabarda la ta sukili, soke ni saia la zile.

⁷ Aver simiche peletar maskar e karrne, ta kana e karrne barile tasade la ta ni dia septelie.

⁸ A aver simiche peletar ande lachi ppuv, ta dia septelie soke barili; ta nesave die stotina, aver sovardes, aver tranda katar iek.”

⁹ Ta o Jesus ppenda lenge: Ka si len kan te asunen.

¿Soke o Jesus sikavela e paramichenchar?

¹⁰ Kana o Jesus achilo korkorre, gola kai sea pasa e desudui disipulura puchle le so mangela te ppenel gole paramichaia.

¹¹ Vou ppenda lenge: “O Del sikavel tumenge so si gurudino katar pi charoina; a golenge kai si avri ppendolpe sa e ezgode ande paramiche.

¹² Ta gia, mai te dikken, ni ka dikken, ta mai te asunen, ni ka acharen, te na irin pe kai o Del te prostil len.”

O Jesus sikavel lenge so ppenel e paramichi katar o simichari

¹³ O Jesus ppenda lenge: “¿Ni acharen so ppenel gaia paramichi? ¿A sar ka acharen so ppenen sa ogola paramiche?

¹⁴ O simichari si sargo o lleno kai inllarel o ppenel e lachi viasta.

¹⁵ Si llene kai si sargo e simicha kai pelitar po drom: Asunen e lachi viasta ta samo so asunen la, avel o Satanas ta ikanel lendar e lachi viasta kai saia ttodi ande lengo lio.

¹⁶ Aver llene si sargo e simicha kai pelitar maskar e barra: Asunen e lachi viasta ta len la veselimaia,

¹⁷ a sar inai len zile, oma muken o drom e Devleko ta kana avel e patnia ta kana mangen te maren len cheres e orba e Devleki, jasaren po pachape.

¹⁸ Aver llene si sargo e simicha kai pelitar maskar e karrne: asunen e lachi viasta,

¹⁹ a e bucha gale zivotoke brigin len but, ta kojadon soke volin o barvalipe ta mangen te avel len sa e ezgode. Ta sa gala ezgode den ande lengo lio, ta tasaven o alau ta ni mukel len te den septelie.

²⁰ A si llene kai asunen e lachi viasta, ta len la, ta den petar lache septelie, sargo e lachi simicha kai pelitar ande lachi ppuv. Katar gola simiche nesave den petar tranda, ta sovardes, ta stotina katar iek.”

Sogo si gurudino ka sikadol

²¹ O Jesus ppenda lenge: “¿A so, tu ppabare iek memeli te uchare la varesoia o te ttovela telal tala o kerveto? Iok, iek memeli si te ttodol upre te kletosarel.

²² Soke sogo si gurudino ka sikadol, ta sa so cherdol po chorial ka llangliolpe.

²³ Gola kai si len kan, te asunen.”

²⁴ Ta i ppenda lenge: —Ttoven sama so asunen. Gia sar tumen den averen, isto gia o Del ka del tumen, ta ios mai but.

²⁵ Soke gole kai si le, ka avel leke dino mai but; a gole kai inai le, i so si le ka avel letar ikando.

E paramichi katar e simicha kai bariol

²⁶ O Jesus ppenda: “Isto gia si e charoina e Devleki, sargo iek manus kai ttovel e simiche ande ppuv:

²⁷ ta ni chitilpe te sovela o te avela llungado o simichari, avela ollivesea o avela orachaia, e simicha sa iek bariol, ta vou ni llanel sar.

²⁸ Gua si soke e ppuv del petar korkorre: Mai anglal likel o zelenipe, mapalal galbenil, ta ondaka pperdol kucha ta dikkol o lliu.

²⁹ Ta kana o lliu si reslo, ondaka chiden le soke avilo o vreme kai si te chindol o lliu.”

E paramichi katar e simicha mostasaki

³⁰ Ta i ppenela o Jesus: —“¿Pe so mizil e charoina e Devleki, o prema so ka ppena kai si?

³¹ E charoina e Devleki si sargo e simicha katar e mostasa, voi si e mai minoni katar sa e simiche kai si pe ppuv:

³² a kana si ttodi ande ppuv, bariol ta cherdol e mai bari katar o vostano, ta cherdon bare krangrura gia bare kai e chiriklia cheren pe kuibura telal katar laki senka.”

Sar sikavela o Jesus e paramichenchar

³³ Ta o Jesus sikavela len e porouka ande but paramiche sargo gaia, prema so sai acharena.

³⁴ Suako drom kai sikavela len cherelale samo e paramichenchar, a pe disipulone sikavela len sa po chorial.

O Jesus achavel o bursin

³⁵ Isto gua llive, kana peli e riat, o Jesus ppenda pe disipulonenge: —Aven pe o goia rig e moraki.

³⁶ Ondaka mukle e llenen ta inllarde e Jesuse isto ande llimia kai vou saia, ta i sea aver llimie kai llana lea.

³⁷ Ta avilo iek baro bursin balaviaia kai cherela te den e valura andre ande llimia, pe gachin kai pperdola.

³⁸ A o Jesus sovela palal pe iek serand. Llungade le ta ppende leke: —¡Kovachi! ¿Inai chuke briga kai tasiva?

³⁹ O Jesus ustilo ta dia pe balavia, ta ppenda e morake: —¡Achi! ¡Na miskosao! Ta ni asundili ios e balau, ta avilape iek baro esmiripe.

⁴⁰ Ta o Jesus ppenda e disipulonenge: —¿Soke darailen? ¿Llik kate inai tumen pachape?

⁴¹ Ondaka avila lenge but bari dar, ta chudinape ta ppenena iek avereke: —¿Ko si gava kai llik e balau ta e mora kanden le?