Marko 3 - Nuevo Testamento Romané 2007

O Jesus sastarel iekke nasuale ando llive sabado

¹ O Jesus pale dia ande kkanlliri e judionengi; ta kote saia iek lleno kai leko va saia bango.

² Ta prezona e Jesuse te dikken dal ka sastarel le ando llive sabado, ta gia te avel len iek orba te dosaren le.

³ O Jesus ppenda e lleneke kai saia leko va bango: —Uste ta ttou tut po maskaral.

⁴ Ta puchla ogole llenen: —¿So sai cherdol ando sabado: o lachipe o o bilachipe? ¿Te bradui iek zivoto o te zatri le? A von ni ppende niso.

⁵ Ondaka dikkla jolinaia pe llene kai sea truial ta i zalbaia soke lenge lie sea zurale, ta ppenda gole manuseke: —Inzar cho va. Ta gua manus inzarda po va, ta leko va sastilo.

⁶ Samo so e fariseura lleletar, diepe orba e llenenchar kai llana pala o Erodes te sai mundaren e Jesuse.

But llene katar e Galilea pasa e mora.

⁷ O Jesus llelo pasa e mora pe disipulonenchar, ta but llene katar e Galilea llele pala le.

⁸ Kana llangle katar e bare ezgode kai cherela, llele te dikken le but llene katar e Judea, katar o Jerusalem, katar e Idumea, katar o goia rig e Jordaneki, ta i truial katar o Tiro ta o Sidon.

⁹ Goleke, o Jesus ppenda pe disipulonenge te lacharen leke iek llimia, te na espiden le soke sea but llene.

¹⁰ O Jesus sastarda pe gachin llenen, kai sa e nasuale chidinaile truial letar ta mangena te dodin le te sai saston.

¹¹ Kana dikkena le e duura bilache, dena changa angla le ta urkina ta ppenena: —¡Tu san o Chavo e Devleko!

¹² A o Jesus dela pe lende silnomaia te na den orba letar angla e llene.

O Jesus esviril desudui disipulura

¹³ Mapalal likisto po burdo, ta ikkarda golen kai vou mangla, ta avile lete.

¹⁴ Esvirisarda desuduien te aven lea, ta te bichalel len te ppenen e lachi viasta. Ta ttoda lengo anau apostolura.

¹⁵ Ta dia len e zor te chuden avri e llavolonen:

¹⁶ Gala si e desudui kai esvirisarda o Jesus: e Simono, kai ttoda leko anau Pedro.

¹⁷ E Santiago, chavo e Zebedeoko, ta e Juane pplal e Santiago, ta ttoda lengo anau Boanerjes (kai gua si, “Chave katar o Girmipe”);

¹⁸ e Andrese, e Felipe, e Bartolomee, e Mateo, e Tomase, e Santiago chavo e Alfeoko, e Tadeo, e Simono o kananeo,

¹⁹ ta e Judase o Iskariote, gua kai ppukada e Jesuse.

Dosaren e Jesuse

²⁰ Mapalal o Jesus dia ande iek cher, ta pale chidinaile pe gachin llene kai vou ta leke disipulura nasti jana ni marrno.

²¹ Kana e familia e Jesuseki asunda so cherela, avile te inllaren le pea, soke ppenena kai dilailo.

²² Ta i e kovacha e zakonoke kai avile katar o Jerusalem ppenena: “O Beelzebu, isto o gazda e llavolonengo diale e zor te chudel avri e llavolonen.”

²³ Ondaka o Jesus ikkarda len, ta ppenda lenge ande iek paramiche: —¿Sar o Satanas ka chudel avri isto vou pe?

²⁴ Iek ppuv kai si fuladi voi pea zatrilpe, ta nisavo foro kai si fulado vou pea ni ka achel;

²⁵ ta iek familia kai si fuladi voi pea ni ka achel.

²⁶ A isto gia, o Satanas te marelpe ta te fuladol isto vou pea, vou ka zatrilpe, ta ka merel.

²⁷ “Niko nasti del ando cher katar iek lleno zuralo ta te lel leke ezgode, te na ppandelale mai anglal; a te ppanglale, ondaka sai ka lel leke ezgode katar leko cher.

²⁸ “Chachimaia ppenau tumenge kai o Del prostil sa lengo bilachipe ta e bilache alava kai ka ppenen:

²⁹ A o lleno kai ka del orbe bilache katar o Santo Duo, ni ka avel prostime nikada, ta si dosalo ostade.”

³⁰ O Jesus ppenda gua soke von ppende kai ande le saia iek duo bilacho.

¿Ko si mi dei ta me pplal?

³¹ Ondaka avili e dei ta e pplal e Jesuseke, ta achile avri ta bichalde te ikkaren le.

³² A e llene kai besena truial katar o Jesus ppende leke: —Chi dei ta che pplal etalen avri ta roden tut.

³³ Vou ppenda lenge: —¿Ko si mi dei ta me pplal?

³⁴ Ta dikkla e llenen kai besena truial letar, ta ppenda: —Etalen kate mi dei ta me pplal.

³⁵ Soke varesavo lleno kai cherel e volia e Devleki, gola si mo pplal, mi ppei, ta mi dei.