Marko 2 - Nuevo Testamento Romané 2007

O Jesus sastarel iekke bange

¹ Nakkle nesave llivesa, ta o Jesus dia pale ando Kafarnaum. Ta asundilo kai vou avilo chere.

² Ta chidinaile but llene, gachin kai ni resena ni kai o udar; ta vou ppenela lenge e lachi viasta.

³ Ondaka avile star llene ta inllarde lete iekke llene kai nasti ppirela.

⁴ Ta sar nasti ttovena le pasa o Jesus soke sea but llene chidine, cherde iek putardipe upral po cher ta fuliarde gole bange ande iek postelia.

⁵ Kana o Jesus dikkla lengo pachape, ppenda e bangeke: —Chavea, cho bilachipe si prostime.

⁶ A nesave llene katar e kovacha e zakonoke kai besena kote, mislisaile:

⁷ “¿Soke gava del gola orbe? Pe alavenchar kusel e Devle. Samo o Del sai prostil o bilachipe.”

⁸ A o Jesus llangla so mislina, ta puchla len: —¿Soke mislin tumen gia?

⁹ ¿So si mai lesno, te ppene e bangeke: ‘Cho bilachipe si prostime’, o te ppene leke: ‘Uste, le chi postelia ta ppir’?

¹⁰ Goleke ka sikavau tumenge kai o Chavo e manuseko si le e zor pe ppuv te prostil o bilachipe. Ondaka ppenda e bangeke:

¹¹ —Chuke ppenau, uste, le chi postelia ta llatar kai cho cher.

¹² Ondaka isto kote ustilo o nasualo, lia pi postelia ta llelotar kotar, angla sa e llene. Saurre chudisaile, ta blagosisarde e Devle, ta ppenena: —Nikada ni dikklam iek ezgoda sargo gaia.

O Jesus ikkarel e Mateo

¹³ Mapalal o Jesus pale llelo pasa e mora; ta sa e llene avena lete, ta vou sikavela len.

¹⁴ Kana nakkela, dikkla e Mateo o chavo e Alfeoko, kai besela po stali, kote kai pochindol e love e ppuviake. O Jesus ppenda leke: —Aide pala ma. O Mateo ustilo ta llelo pala le.

¹⁵ Iek llive kai o Jesus saia besindo pe sinia ande Mateoko cher, ta publikanura ta i bilache llene besena lenchar, soke but llene llana pala le.

¹⁶ Nesave kovacha e zakonoke, kai sea fariseura, kana dikkle kai o Jesus jala gole llenenchar, puchle e disipulonen: —¿Soke tumaro kovachi jal e publikanonenchar ta i e bilache llenenchar?

¹⁷ Kana o Jesus asunda len, ppenda lenge: —E llene kai si saste ni trubul len doktori, ka trubul doktori, si e nasualen. Me ni avilem te ikkarau e chachen, me avilem te ikkarau e bilachen.

O Jesus ta o alluno

¹⁸ Iek llive e disipulura katar o Juan kai kristila ta e disipulura katar e fariseura allunina, ta avile nesave llene kai o Jesus ta puchle le: —E disipulura e Juaneke ta i katar e fariseura allunin, ¿A soke chire disipulura ni cherenle?

¹⁹ O Jesus ppenda lenge: —¿Sai allunin gola kai si ikkarde pe iek biau kana si lenchar o chavo kai zinilpe? Kana si lenchar o chavo kai zinilpe nasti allunin.

²⁰ A ka avel o llive kana ka len lendar gole kai zinilpe, ondaka von ka allunin.

²¹ “Niko ni ttovel iek kotor chiti nevo pe iek fistano purano, soke o kotor o nevo chikniol ta chirdel, ta cherel te chindol ios mai but o chiti o purano.

²² Ta ni ttodol e mol nevi ande morcha purane, soke e mol e nevi cherel te pparron e morcha, ta jasaon e mol ta i e morcha. Goleke si te ttodol e mol e nevi ande morcha neve.”

E disipulura ikanen lliu ando llive sabado

²³ Iek llive sabado o Jesus ppirela maskar o lliu, leke disipulura ppirena ta chirdena ta ikanena o lliu.

²⁴ Ondaka e fariseura ppende leke: —¿Soke che disipulura cheren ando llive sabado so nasti cherdol?

²⁵ A vou ppenda lenge: —¿Nikada ni chitisarden so cherda o David kana vou ta i gola kai sea lea nakkena pe nuzda ta sea bokkale?

²⁶ Sar dia andre ando cher e Devleko kana o Abiatar saia o mai baro maskar e popura, ta jala e marrne kai sea chinade e Devleke, kai samo e popura sai jana gua marrno, a vou dia te jan gua marrnoi e llenen kai sea lea.

²⁷ Ta i ppenda lenge: —O sabado cherdilo e manusenge, a na e manusa e sabadoke.

²⁸ Goleke, o Chavo e manuseko si Gazda i po sabado.