Marko 16 - Nuevo Testamento Romané 2007

O Jesus ustel katar o meripe

¹ Kana peli e riat ta nakklo o sabado, e Maria Magdalena, e Maria e dei e Santiagoki ta e Salome, chinde merisura te ttoven pe esnaga e Jesuseki.

² Ttiarinako rano kana pparrona e zor katar o purvo llive katar e efta, llele kai o limori.

³ Ta ppenena iek averiake: —¿Ko ka ikanel o barr katar o udar e limoreko?

⁴ A kana dikkle, ttode sama kai gua barr kai saia but baro, ni saia pe po ttan.

⁵ Ta kana die ando limori dikkle, kai pe rig e chachi besela iek lleno terno kai saia furiado ande patave parne ta lunge. Ta e diskinie daraile,

⁶ a gua lleno ppenda lenge: —Na daran. Tumen roden e Jesuse katar o Nazaret, gole kai krustosarde le. Vou ustilo katar o meripe ta inai talo kate. Dikken o ttan kai ttode le.

⁷ Llan ta ppenen leke disipulonenge ta e Pedroke kai o Jesus llal ande Galilea te chidel tumen pale; ta kote ka dikken le, isto gia sar ppenda tumenge.

⁸ Ondaka e diskinie nasle katar o limori, soke izdrana daratar. Ta ni ppende niso nikake, soke darana.

E Maria Magdalena dikkel e Jesuse

⁹ Kana o Jesus ustilo katar o meripe ttiarinako rano ando purvo llive katar e efta, mai anglal sikadilo e Mariake e Magdalena, kai tradiaia latar efta llavolonen.

¹⁰ Voi avili kai e disipulura ta von rovena soke o Jesus muloa, a voi ppenda lenge kai o Jesus saia llundo.

¹¹ Kana von asunde kai o Jesus zivila ta kai voi dikkla le, ni pachaie la.

Dui disipulura dikken e Jesuse

¹² Mapalal o Jesus sikadilo duie disipulonenge kai ppirena karing e droma.

¹³ Gala dui disipulura llele ta ppende ogolenge; a ni len ni pachaie.

¹⁴ Mapalal, o Jesus sikadilo e desuiekke disipulonenge, kana von besena pe sinia. Vou dia pe lende soke ni saia len pachape ta ni kandena, soke ni pachaie golen kai dikklea le kana ustilo katar o meripe.

¹⁵ Ta ppenda lenge: “Llan ande sa e ppuvia ta ppenen saurrenge e lachi viasta.

¹⁶ Gua kai ka pachal ta ka avel kristime ka avel braduime; a gua kai ni ka pachal, ni ka avel braduime.

¹⁷ Ta gola llene kai ka pachan ka cheren bare ezgode ande mo anau, ka traden e llavolonen; ka den orba ande neve chibia;

¹⁸ ka istaren ande pe va e sapen; ta te piena vareso kai sai mundarel len, ni ka cherel lenge niso; ka ttoven pe va pe nasuale ta e nasuale ka saston.”

O Jesus llaltar ando miloso

¹⁹ A kana o Gazda o Jesus dia lenchar orba, avilo vazdino ando miloso ta beslo pe rig e chachi e Devleki.

²⁰ Von llele te ppenen e lachi viasta pe suako rig; ta o Gazda pomozila len e bare ezgodenchar Devlikane kai cherena.