Marko 15 - Nuevo Testamento Romané 2007

O Jesus angla o Pilato

¹ Ttiarinako rano chidinaili e mai bari kris kai sea e gazda e poponenge, e ppure, ta e kovacha e zakonoke, ta inllarde e Jesuse ppanglo ta die le kai o Pilato.

² O Pilato puchla le: —¿San tu o Charo e judionengo? O Jesus ppenda leke: —Tu ppendanle.

³ A e gazda e zakonoke dosarena le katar but ezgode,

⁴ O Pilato pale puchla le: —¿Ni ppene niso? Dik pe gachin orbe ikanen pe tute.

⁵ A sar o Jesus ni ppenda leke niso, o Pilato chudisailo.

Chinade e Jesuseke o meripe

⁶ Pe suako Paskua, o Pilato mukliarela iekke ppangle, gole kai o foro mangela.

⁷ Ondaka saia ppanglo iek lleno kai ikkardola Barrabas, vou saia ppanglo ande rubie avere llenenchar soke mundardea iekke llene kana mardepe cheres e murzania kai saia len pe sudura romanura.

⁸ Avile e llene kai o Pilato ta ttode te mangen letar te cherel isto gia sar cherela suako burs.

⁹ A o Pilato ppenda lenge: —¿Mangen te mukliarau e Charo e judionengo?

¹⁰ Soke vou acharela kai cheres e murzania kai saia len po Jesus dieale lete.

¹¹ A e gazda e zakonoke divosarde e llenen te sai mangen te mukliaren e Barrabase.

¹² O Pilato pucha len: —¿A so mangen te cherau gale llenea kai tumen ppenen leke o Charo e judionengo?

¹³ Von ppende leke urkindo: —¡Krustosaren le!

¹⁴ O Pilato ppenda lenge: —¿Savo bilachipe cherda? A von pale urkisarde: —¡Krustosaren le!

¹⁵ Ondaka o Pilato, sar mangela te achel lacho e llenenchar, mukliarda e Barrabase ta bichalda te maren e Jesuse e bichoia, ta mapalal diale te krustosaren le.

¹⁶ Ondaka e boñikura inllarde e Jesuse ande chereki barr kai ikkardol pretorio, ta chidie sa e boñikonen.

¹⁷ Ta ttode pe lete iek chiti lolo, kkuvde iek korona e karrnenchar ta ttodela pe leko soro.

¹⁸ Mapalal ttode te urkin: —¡Te avel bajtalo o Charo e judionengo!

¹⁹ Chalavena le ando soro iekke kastea, chungardena le, dena changa angla le, ta i dena tenemava.

²⁰ Ta kana marde letar espurnia ikande letar o chiti lolo, ta ttode pe lete isto leke patave ta inllarde le avri te krustosaren le.

Krustosaren e Jesuse

²¹ Iek lleno katar o Sirene, kai ikkardola Simono, o dad e Alejandroko ta e Rufoko, kai avela katar e droma. Kana nakkela kotar, ttode le pe zor te inllarel o krusto e Jesuseko.

²² Inllarde e Jesuse pe iek ttan kai ikkardol Golgota (kai gua si: “O ttan e kokalengo”);

²³ ta dena le te piel mol ta e mirra amime, a o Jesus ni pila

²⁴ Ondaka krustosarde le. Ta e boñikura fulade maskar pete leke patave, ta chelenape te dikken ko ka achel leke patavenchar.

²⁵ Saia ande inia e ttiarinake kana krustosarde le.

²⁶ Ta ttode po krusto pisime “O Charo e judionengo.” Soke von ppenena kai goia saia leki dos.

²⁷ Ta krustosarde pasa le duie llenen kai sea kochkaria, iek pe leki chachi, ta o gua pe leko estingo.

²⁸ Ta gia cherdilo so ppenel ando Pisipe kote kai ppenel gia: ‘Ta saia llindo e bilachenchar.’

²⁹ E llene kai nakkena kusena le, miskona po soro ta ppenena: —¡Bre, tu kai perave o cher e Devleko ta ande trin llive vazdele pale,

³⁰ braduisar isto tu tut, ta fulie katar o krusto!

³¹ Ta isto gia marena letar espurnia i e gazda e poponenge ta e kovacha e zakonoke. Ta ppenena: —¡Braduisarda averen, a vou pe nasti braduil!

³² ¡Te fuliel katar o krusto gua Mesias Charo katar o Israel, te dikka ta te pacha! Ta i gola kai sea krustome pasa le kusena le.

O meripe e Jesuseko

³³ Kana saia ande desudui e ttiarinake, sa e ppuv achili ando truñariko trin saiata.

³⁴ Isto ande gua saiato o Jesus urkisarda zurale, ta ppenda: “Eloi, Eloi, ¿lama sabaktani?” (gua si: “Devla, Devla, ¿soke muklan man?”)

³⁵ A Nesave llene kai sea kote, asunde le, ta ppende: —Asunen, ikkarel e porauko e Eliase.

³⁶ Ondaka iek lendar prastio, chingarda iek pamuko ande mol cherki, ppanglala pe iek kas ta resadale kai o Jesus te piel, ta ppenda: —Muken le te dikka dal o Elias ka fuliarel le katar o krusto.

³⁷ A o Jesus urkisarda ando baro avazi, ta mulo.

³⁸ Ta o chiti kai si andre ando cher e Devleko chindilo po dopas, upral tele.

³⁹ Ta kana o sudo romano kai saia angla o Jesus dikkla kai mulo, ppenda: —Gava manus chachimaia saia e Devleko Chavo.

⁴⁰ Ta i kote sea nesave diskinie kai dikkena duratar; maskar lende saia e Maria Magdalena, e Maria e dei e Santiagoki o mai terno ta i e Joseeki, ta e Salome.

⁴¹ Gala diskinie llelea pala o Jesus ta pomozisardea le kana vou saia ande Galilea. Ta i sea kote but aver diskinie kai llelea lea ando Jerusalem.

Ttoven e Jesuse ando limori

⁴² Gua llive saia iek llive palal katar o sabado pasa e riat ta lacharena sa e ezgode soke saia pase o sabado.

⁴³ O Jose katar e Arimatea kai vou saia but glamno ande lengi kris, ta i vou aduricharela e charoina e Devleki, llelo tromanimaia kai o Pilato ta mangla e esnaga e Jesuseki.

⁴⁴ O Pilato, chudisailo kai gia oma muloa o Jesus, ta ikkarda e sudo te puchel le gachin cherela kai muloa.

⁴⁵ Ta kana o sudo ppenda leke, o Pilato dia e esnaga e Jesuseki kai o Jose.

⁴⁶ Ondaka o Jose chinda iek chiti parno, fuliarda e Jesuse katar o krusto, ta ulisarda le ando chiti. Mapalal ttoda le ande iek limori kai saia anado ande iek pechina, mapalal ppangla o limori iekke barrea.

⁴⁷ E Maria Magdalena ta e Maria e dei e Joseeki, dikkena kai ttovena le.