Marko 14 - Nuevo Testamento Romané 2007

Ppanden e Jesuse

¹ Achena dui llive te avel e Paskua, kana jalpe o marrno kai inai le levadura. Ta e gazda e poponenge ta e kovacha e zakonoke rodena sar te ppanden e Jesuse kojaimaia, ta te mundaren le.

² Soke nesave llene ppenena: —Cherale kana ka nakkel e Paskua, te na avelpe burkania maskar e llene.

Iek diskinia ttovel meriso po Jesus

³ O Jesus lleloia ande Betania, kai o cher e Simonoko, gua kai ppenena leke o leproso. Kana beslo pe sinia, avili iek diskinia kai inllarela iek taso alabastrako pperdo meriso kai molale but, ppagla o taso ta mukla te perel o meriso pe Jesuseko soro.

⁴ Nesave llene kai sea kote jolaile, ta ppenena iek avereke: —¿Soke chudiniaol gava meriso?

⁵ Sai bichindilloia pe so mol o rado iekke burseko ta te pomozilpe gole lovenchar e llenen kai si chorre. A von jolaile laia ta dena laki orba.

⁶ A o Jesus ppenda lenge: —Muken la; ¿soke den la joli? Voi cherda manchar iek lachi ezgoda.

⁷ Soke e chorre ka aven tumenchar suako llive, ta sai ka pomozin len kana tumen mangena; a me ni ka avau tumenchar sa o vreme.

⁸ Gaia diskinia cherda sa so sai cherel: Soke sigarda te ttovel pe ma o meriso me limoreke.

⁹ Chachimaia ppenau tumenge kai ande varesavi ppuv kana ka ppenen e lachi viasta, ka den orba i katar so cherda gaia diskinia, ta gia ka denpe golli latar.

O Judas ppukavel e Jesuse

¹⁰ O Judas Iskariote, iek katar e desudui disipulura, llelo kai e gazda e zakonoke te ppukavel e Jesuse

¹¹ Kana asunde le, veselisaile ta diele po alau kai ka den le love e Judase, ta o Judas kotar angle rodela te sai ppandel e Jesuse.

E sinia e Gazdaki

¹² O purvo llive katar e Paskua kana jalpe o marrno kai inai le levadura, ta kana mundardol o bakro katar e Paskua, e disipulura puchle e Jesuse: —¿Kai mange te chera o jape katar e Paskua?

¹³ Ondaka bichalda duien katar pe disipulura, ta ppenda lenge: —Llan ando foro. Kote ka malaven iekke llene kai inllarel iek bure paieko. Llan pala le,

¹⁴ ta kote kai ka del, ppenen e lleneke kai si gazda katar gua cher, kai o Kovachi ppenel gia: ¿Savi si e soba kai ka jau me disipulonenchar o jape katar e Paskua?

¹⁵ Vou ka sikavel tumenge iek soba bari kai si upre ando cher, kai si lachardi. Kote cheren o jape.

¹⁶ E disipulura llele ando foro. Ta malade sa sar ppendaia lenge o Jesus, ta cherde o jape katar e Paskua.

¹⁷ Kana peli e riat o Jesus avilo pe disipulonenchar.

¹⁸ Ta kana besle pe sinia ta jana, o Jesus ppenda lenge: —Chachimaia ppenau tumenge kai iek lleno tumendar, kai jal manchar, ka ppukavel man

¹⁹ Von tristosaile, ta ttode te puchen le iek po iek: —¿Sem me gua lleno?

²⁰ O Jesus ppenda lenge: —Si iek katar e desudui kai chingarel o marrno isto ande gua charo kai me chingarau.

²¹ O Chavo e manuseko morabi te llal po drom kai ppenel o Pisipe; a tesko goleke kai bichinel le. Mai sukar avilaia leke te na biandiloia.

²² Kana jana, o Jesus lia o marrno ande pe va ta dia fala e Devle, ppaglale ta diale kai pe disipulura ta ppenda: —Len, gaia si mi esnaga.

²³ Mapalal lia iek taso, dia fala e Devle, diale lende, ta saurre pile.

²⁴ O Jesus ppenda lenge: —Gava si mo rat katar o nevo alau, kai chordol pala but llene te sai aven braduime.

²⁵ Chachimaia ppenau tumenge kai ni ka piau ios katar so del e drak lligo ni ka avel o llive kai ka piau e nevi mol ande charoina e Devleki.

O Jesus ppenel kai o Pedro ka ppenel kai ni pinllarel le

²⁶ Kana von llilabie e salmura, lleletar kai o burdo e Maslinkengo.

²⁷ Ondaka o Jesus ppenda lenge: —Sa tumen ka jasaren tumaro pachape ande mande. Gia ppenen o Pisipe: ka mundarau e chobano, ta e bakre ka rispinpe.

²⁸ A kana me ka ustau katar o meripe, ka chidau tumen pale ande Galilea.

²⁹ O Pedro ppenda leke: —I te jasarena sa po pachape, me ni ka jasarau le.

³⁰ O Jesus ppenda leke: —Chachimaia ppenau chuke kai mai anglal te basel o basno pale o duito, tu ka ppene kai ni pinllare man trin droma.

³¹ A vou pale ppenela leke: —I te trubula te merau tuia, ni ka ppenau kai ni pinllarau tut Ta saurre ppenena leke isto gola alava.

O Jesus molilpe ando Getsemani

³² Mapalal llele pe iek ttan kai ikkardol Getsemani, ta o Jesus ppenda pe disipulonenge: —Besen kate, so me llau te moliuman.

³³ Ta inllarda e Pedro, e Santiago ta e Juane, ta avila leke but bari zalba.

³⁴ Ondaka o Jesus ppenda lenge: —Si ande mo zivoto iek zalba merimaki. Achen tumen kate, ta achen llungade.

³⁵ Ondaka o Jesus llelo mai angle, bangilo llik te ttovel po chikat pe ppuv, ta mangla e Devletar te na nakkel goia patnia.

³⁶ Ta kana molilape ppenela: “Abba, Dade, tu sa sai chere, le mandar gaia buka cherki; a te na cherdol so me mangau, te cherdol so tu mange.”

³⁷ Mapalal irisailo lende, ta malada len kai sovena, ondaka ppenda e Pedroke: —Simono, ¿sove? ¿nasti achilan llungado ni iek saiato?

³⁸ Achen llungade ta molintumen, te na peren ando zumadipe. Tumen mangen, a e esnaga inai la zor.

³⁹ Ondaka o Jesus pale llelo, ta molisailo isto gole alavenchar.

⁴⁰ Kana irisailo, malada pale kai e disipulura sovena, soke lenge akka ppangliona lindratar. Ta ni llanena so ka ppenen leke.

⁴¹ Kana avilo pale o trito drom, ppenda lenge: —¿Pale inzon ta soven? Dosta, avilo o vreme kai o Chavo e manuseko ka avel dino ande va e bilachenge.

⁴² Usten, aven; soke avel gua kai ka ppukavel man.

Ppanden e Jesuse

⁴³ O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura, e gazda katar e kovacha e zakonoke, ta e ppure.

⁴⁴ O Judas, gua kai ppukavela le, ppendaia lenge gia: “Gole kai ka chumidau, gua si. Ppanden le ta arakken le te na nasel.”

⁴⁵ Kana avilo o Judas llelo pasa o Jesus ta ppenda leke: —¡Kovachi! Ta chumidia le.

⁴⁶ Ondaka istarde e Jesuse, ta inllarde le ppanglo.

⁴⁷ A iek katar e llene kai sea kote, ikanda po jarni ta chinda o kan katar o esluga e mai bare popoko.

⁴⁸ Ondaka o Jesus puchla e llenen: —¿Soke avilen jarnienchar ta kastenchar te ppanden man, sargo kana me sema iek kochkari?

⁴⁹ Suako llive sema maskar tumende ta sikavava ando cher e Devleko, ta nikada ni inllarden man ppanglo. A sa gala ezgode nakken te sai cherdol so si pisime ando Pisipe.

⁵⁰ Sa e disipulura mukle e Jesuse korkorre, ta nasle.

⁵¹ A iek lleno terno llala pala lende uchardo samo iekke chitea. Gole llene istarde le,

⁵² a vou mukla o chiti ta naslo nango.

Chinen kris e Jesuseke

⁵³ Ondaka inllarde e Jesuse kai o mai baro popo, ta chidinaile sa e gazda e poponenge, ta e ppure ta i e kovacha e zakonoke.

⁵⁴ O Pedro llelo pala le duratar llik andre ande barr katar o cher e mai bare popoko, ta achilo besindo e llenenchar kai arakkena o cher e Devleko, ta ttodepe pasa e iag te lelpe lendar o sil.

⁵⁵ E gazda e poponenge ta sa e mai bari kris rodela varesavi dos ando Jesus te sai mundaren le; a ni malavena niso.

⁵⁶ Soke but llene ikanena bune pe lete, ta isto von kojadona ande pe orbe kai dena iek averea.

⁵⁷ Ondaka nesave llene ustile pe porrne ta dosarena le kojaimaia, ta ppenena:

⁵⁸ —Amen asundam le kai ppenela: Me ka peravau gava cher e Devleko kai cherde e manusa, ta ande trin llive ka vazdau aver kai inai cherdo e manusendar.

⁵⁹ A gola kai dosarena e Jesuse nasti lacharena pe orbe maskar pete pe so ppenena.

⁶⁰ Ondaka o mai baro popo ustilo po maskaral katar sa e llene, ta puchla e Jesuse: —¿Ni ppene niso? ¿So si gava kai ppenen tutar?

⁶¹ A o Jesus ni ppenda niso. O mai baro popo puchla le pale ta ppenda: —¿San tu o Mesias, o Chavo katar o Del o blagosime?

⁶² O Jesus ppenda leke: —Ea, me sem. Ta tumen ka dikken sar o Chavo e manuseko besel pe rig e chachi katar o Del kai si le sa e zor, ta ka dikken le sar ka avel pe oblakura e milosoke.

⁶³ Ondaka o mai baro popo pparrada pe patave te sai llanen kai saia joliariko, ta ppenda: —Ni trubul amen ios te asuna avere llenen.

⁶⁴ Tumen asunden sar kusla e Devle gole alavenchar. ¿So ppenen tumen? Sa ppende kai saia dosalo ta kai saia te merel.

⁶⁵ Nesave llene ttode te chungarden le, ta ppandena leke akka ta chalavena le dumukkenchar ta ppenena leke: —¡Apogodisar ko chalada tut! Ta gola kai arakken e cher e Devleko chalade le pe leko mui.

O Pedro ppenel kai ni pinllarel e Jesuse

⁶⁶ O Pedro saia tele ande barr. Ta avili iek katar e esluge e mai bare popoke;

⁶⁷ ta kana dikkla e Pedro, kai tatola pe iag, dikkla pe lete, ta ppenda leke: —I tu llaia e Jesusea, gua lleno katar o Nazaret

⁶⁸ O Pedro ppenda: iok, ta ppenda: —Ni pinllarau le, ta ni llanau savi orba de. Ta likisto avri po udar. Ondaka baslo iek basno

⁶⁹ E esluga pale dikkla e Pedro ta ttoda te ppenel e llenenge kai sea kote: —Gava si iek lendar.

⁷⁰ A o Pedro pale ppenda kai ni pinllarel e Jesuse. Mapalal, e llene kai sea kote pale ppende e Pedroke: —Chachimaia tu san iek lendar, soke i tu san katar e Galilea.

⁷¹ Ondaka o Pedro ttoda te jal sovel ta ppenela: ¡Me ni pinllarau gole llene kai tumen den leki orba!

⁷² Ondaka isto kote baslo pale o duito o basno, ta o Pedro diape golli kana o Jesus ppendaia leke: “Trin droma ka ppene kai ni pinllare man, ta mapalal ka basel o basno pale o duito.” Ta vou ttoda te rovel.