Marko 13 - Nuevo Testamento Romané 2007

O Jesus ppenel kai o cher e Devleko ka avel zatrime

¹ Kana o Jesus likisto katar o cher e Devleko, iek katar leke disipulura ppenda leke: —¡Kovachi, dik save barra ta save chera!

² O Jesus ppenda leke: —¿Dikke gala bare chera? Ni ka achel lendar ni iek barr upral pe aver. Sa ka avel zatrime.

So si te avelpe mai anglal katar o son

³ Mapalal lleletar po burdo e Maslinkengo, kai si angla o cher e Devleko. O Jesus beslo, ta o Pedro, o Santiago, Juan ta o Andres puchle le po chorial

⁴ kana saia te aven gala ezgode, ta pe savi ezgoda ka llangliolpe kai gola ezgode si te getonpe.

⁵ A o Jesus ppenda lenge: “Arakken tumen te na kojavel tumen niko.

⁶ Soke ka aven but llene kai ka ppenen kai sem me. Ta ka ppenen: ‘Me sem; ta ka kojaven bute llenen.

⁷ “A kana tumen ka asunen kai marenpe e ppuvia pe suako rig, na daran. Gia trubul te nakken sa gala ezgode; a ni ios inai o son

⁸ Soke iek charoina ka marelpe averiaia ta iek ppuv ka marelpe avere ppuviaia; ta e ppuv ka dermolpe pe but ttana, ta ka avel bok. Ta gua si samo e purve dukka e suetoke.

⁹ “Arakken tumen soke ka den tumen kai e sudura; ta ka maren tumen ande kkanllira e judionenge. Ta ka ttoven tumen angla e sudura ta angla e kraliura te sai ppenen e orba e chachi mandar te sai asunen von.

¹⁰ A mai anglal te avel o son e suetoko, morabi te ppendol e lachi viasta ande sa e ppuvia.

¹¹ A tumen na brigin tumen katar so si te ppenen kana ka den tumen ande va e sudonenge, soke ande gua vreme o Del ka ppenel tumenge so si te ppenen ta tumen ni ka den orba, ko ka ttovel alava ande tumaro mui si o Santo Duo.

¹² E pplal ka den ando meripe isto pe pplalen, ta e dada pe chaven; ta e chave ka murzin pe pe dada ta ka mundaren len.

¹³ Sa o sueto ka murzil pe tumende pala mo anau; a ko llala llik kai o son ta ni achela, ka avel braduime.

¹⁴ “Kana ka dikken kai cherdol o baro bilachipe po ttan kai ni trubulpe te cherdol —gua kai chitil, te acharel—, ondaka gola kai si ande Judea, morabi te nasen pe burdura;

¹⁵ ta o lleno kai si upral pe po cher, te na ni fuliel te ikanel niso andral.

¹⁶ Ta o lleno kai si ande umalia, te na irilpe ni te lel pe patave.

¹⁷ ¡Tesko gole diskinienge kai ande gola llivesa ka aven kkamne, o avela len minone kai pien kolin!

¹⁸ Mangen e Devletar te na aven gala ezgode ando viend,

¹⁹ soke ande gola llivesa ka avel iek patnia sar kai ni avila nikada; sar kana o Del cherda e sueto llik akana, ta sar ni ka avel nikada.

²⁰ A o Gazda te na chikniavela gua vreme, niko ni avela braduime, a gua vreme chikniardale pala o volipe kai si le e llenendar kai vou esvirisarda.

²¹ Ta ondaka, vareko te ppenela tumenge: ‘Dikken, etalo kate o Mesias’, o ‘Dikken etalo incha’, te na pachan.

²² Soke ka aven kojamne mesias ta kojamne poraukura: Ta ka cheren bare ezgode, te sai kojaven te avelape llik e llenen kai isto o Del esvirisarda.

²³ ¡Arakken tumen! Soke sa gaia orba ppendemla tumenge mai anglal te nakkel.”

O Chavo e manuseko irilpe

²⁴ “A ande gola llivesa, kana ka nakkel o vreme katar e patnia, o kkam ka cherdol truñariko, ta o chon ni ka klichil,

²⁵ e cheraia ka peren katar o miloso ta e zor e milosoki ka izdral.

²⁶ Ondaka ka dikkol o Chavo e manuseko kai avel pe oblakura, bare zoriaia ta barimaia.

²⁷ Vou ka bichalel e suechonen, ta ka chidel e llenen kai esvirisarda katar e star riga e ppuviake katar suako ttan e ppuviako ta e milosoko.

²⁸ “Sikon katar o kas e simochinengo: Kana leke krangura si kovle, ta zelenil ta liken e patra, tumen llanen kai o milai si pase.

²⁹ Isto gia, kana tumen ka dikken sa gala ezgode, ka llanen kai o Chavo e Devleko si po udar.

³⁰ Chachimaia ppenau tumenge kai sa gala ezgode ka avenpe bi te nakkel gaia vicha.

³¹ O miloso ta e ppuv ni ka aven ios, a me alava si te cherdon.

³² “A cheres o llive ta o saiato, niko ni llanel le, ni e suechura e milosoke, ni o Chavo. Samo mo Dad llanel le.

³³ “Goleke tumen morabi te aven llungade ta te prezon, soke ni llanen kana ka avel gua vreme.

³⁴ Tumen morabi te cheren sargo iek lleno kai mai anglal te llaltar ande aver foro, ppenda pe eslugenge te arakken leko cher. Suakone diale iek rado, ta ppenda te prezol goleke kai arakkela o udar.

³⁵ Achen llungade, soke ni llanen kana ka avel o gazda e chereko, sai avel kana perel e riat, o po dopas katar e riat, o ttiarinako rano.

³⁶ Ta gia kana ka avel, te na malavel tumen sovindo.

³⁷ So ppenau tumenge, ppenaule saurrenge: ¡Achen llungade!”