Marko 12 - Nuevo Testamento Romané 2007

E paramichi katar e llene kai radin e ppuv

¹ O Jesus ttoda te del lenge orba e paramichenchar. Ta ppenda lenge: “Iek lleno ttoda te barion drakka ande iek vostano, ta ppangla o vostano truial; ta lacharda iek ttan te cherel mol ta vazdia iek cher ta mukla gua vostano drakkako kai iek manus te cheren buchi ta llelotar dur.

² Kana avilo o vreme, bichalda iekke esluga te mangel katar e llene kai radina e ppuv o chari kai perela le.

³ A von ttode o va po esluga, marde le, ta tradie le chuche vastengo.

⁴ Ondaka o gazda bichalda avere esluga, a gole chalade le ando soro ta kusle le.

⁵ Bichalda avere, ta gole mundarde le; mapalal bichalda bute llenen ios, nesaven marde len a averen mundarde len.

⁶ “Ondaka achela samo iek kai saia isto leko chavo, gole kai volila but: Ta bichalda le, ta mislilape gia: Chachimaia ka den liubao me chaurre.

⁷ A e llene kai radina e ppuv ppenena iek avereke: ‘Gava si o lleno kai kana ka merel leko dad vou ka cherdol gazda; aven te mundara le ta goia ppuv ka avel amari.’

⁸ Istarde le, mundarde le, ta chudie leki esnaga avri katar e ppuv kai sea e drakka.

⁹ “¿A tumen so mislin kai ka cherel o gazda gole ppuviako? Ka llal te mundarel gole llenen kai radina goia ppuv, ta ka del e ppuv e drakkenchar kai aver llene.

¹⁰ “¿Ni chitisarden so ppenel ando Pisipe? Ppenel gia: ‘O barr kai mukle le pe iek rig ta ni ttode leke sama, e llene kai cheren chera cherdilo o barr mai glamno e chereko.

¹¹ Gaia ezgoda cherdala o Gazda, ta chudiamen katar so dikka.’ ”

¹² Ondaka mangle te ppanden e Jesuse, soke llanena kai dela orba lendar ande goia paramichi, a sar darana katar e llene mukle le, ta lleletar.

E love e foroke

¹³ Bichalde kai o Jesus nesave llene katar e fariseura ta i nesave llenen kai sea e Erodeseke te sai dosaren le pe fisavi orba.

¹⁴ Gola llene llele ta ppende leke gia: —Kovachi, llana kai san chacho, ta ni dara katar e llene kai asunen tut, soke ni ppene lenge alava te perel lenge drago. Tu sikave chachimaia o drom e Devleko. ¿Ppen amenge si orta te pochina e love kai mangel o Sesar o iok? ¿Ka pochina o ni ka pochina?

¹⁵ A o Jesus, sar pinllerela lengo kojaipe, ppenda lenge: —¿Soke zumaven man? Anen mange iek tolari te dikkaule,

¹⁶ ande o tolari lete, ta o Jesus ppenda lenge: —¿Kako mui ta kako anau si pisime po tolari? Von ppende: —E Sesareko.

¹⁷ Ondaka o Jesus ppenda lenge: —Den e Sesare so si e Sesareko, ta den e Devle so si e Devleko. A von chudisaile letar.

E Saduseura den orba e Jesusea

¹⁸ Nesave Saduseura, kai ni pachan kai e mule ka usten katar o meripe, llele te dikken e Jesuse, ta ppende leke gia:

¹⁹ —Kovachi, o Moises mukla amenge pisime kai kana iek murus zinime merel ta ni avila le porodo pe romiaia, gole muruseko pplal morabi te lel pala pe gole ppivlia, ta te del minonen pe pplale kai mulo.

²⁰ Ondaka e saduseura ppende gia e Jesuseke: sea efta pplal, o purvo lendar zinisailo, ta mulo ta ni mukla porodo.

²¹ O duito zinisailo e ppivliaia, ta i vou ni mukla porodo. Ta isto gola ezgode nakkla o trito,

²² ta isto gia avilape i ogole pplalenchar; ta ni iek lendar ni avila le porodo. Mapalal muli i e romi.

²³ Kana ka usten katar o meripe ta ka zivin pale, ¿save pplaleki romi ka avel voi, kana e efta sea zinime laia?

²⁴ O Jesus ppenda lenge: —Tumen sen ando kojaipe, soke ni pinllaren o Pisipe ta ni e Devleki zor.

²⁵ Soke kana e mule ka usten katar o meripe, e murusa ta e diskinie ni ka zininpe, soke ka aven sargo e suechura kai si ando miloso.

²⁶ A katar e orba kai e mule ka usten, ¿tumen ni chitisarden so pisisarda o Moises katar e karrne kai ppabona? O Del ppenda e Moiseseke: ‘Me sem o Del katar o Abraam, katar o Isaak ta i katar o Jakob.’

²⁷ ¡Ta vou inai Del e mulengo, vou si Del e llundengo! Tumen sen ande iek baro kojaipe.

O zakono mai baro

²⁸ Kana dikkle kai o Jesus dia orba sukar, iek katar e kovacha e zakonoke, kai asundaia kana denape orba, avilo pasa le, ta puchla le: —¿Savo katar sa si o zakono mai baro?

²⁹ O Jesus ppenda leke: —O zakono mai baro si gava: Asun, Israel: O Gazda amaro Del si o edino Gazda.

³⁰ Volisar e Gazda kai si cho Del sa che liea, sa che duoia, sa che misloia ta sa che zoriaia.

³¹ A si iek zakono ios: Volisar avere sar voli tu tut. Nisavo aver zakono inai mai baro neko gala.

³² O kovachi e zakonoko ppenda leke: —So ppene si o chachipe ta si sukar: Samo iek Del si ta inai aver.

³³ Ta te voli e Devle sa che liea, sa che misloia ta sa che zoriaia, ta te voli suakone llene sar voli isto tut, mol le mai but neko sa e kurbanura.

³⁴ Kana o Jesus dikkla kai o kovachi dia orba bizaimaia, ppenda leke: —Ni san dur katar e charoina e Devleki. Ta niko ni tromala te puchel le niso.

¿Katar savi vicha si o Jesus?

³⁵ O Jesus sikavela ando cher e Devleko, ta puchla: —¿Soke ppenen e kovacha e zakonoke kai o Mesias avel katar e vicha e Davideki?

³⁶ Soke isto o David ando Santo Duo ppenda: ‘O Gazda ppenda me Gazdake: Bes pe mi rig e chachi, llik kana me ka ttovau che dusmanonen telal tala che porrne.’

³⁷ ¿A sar sai avel o Mesias katar e vicha e Davideki, kana isto o David ikkarel le Gazda? —Kote sea but llene ta asunena e Jesuse dragostimaia.

O Jesus ppukavel golen kai sea gazda e zakonoke

³⁸ Kana o Jesus sikavela ppenela gia: arakken tumen katar e kovacha e zakonoke, soke drago lenge te ttoven patave barikane pe pete, ta te den lenchar orba liubaimaia ando foro.

³⁹ Ta roden e estoliche mai anglune ande kkanlliri e judionengi ta e mai lache ttana kana si varesavo jape;

⁴⁰ ta len katar e ppivlia lengo lachipe, ta molinpe but te na achardol o bilachipe kai cheren. Von si te len mai bari duk.

E love kai dia e ppivli chorri

⁴¹ Iek llive o Jesus besela angla e baulia kote kai chidena e love katar o cher e Devleko, ta dikkela sar ttovena e love. Ta but barvale ttovena but love.

⁴² Ta avili iek ppivli chorri, ta ttoda dui tolaricha jarkune, kai ni mol len but.

⁴³ Ondaka o Jesus ikkarda pe disipulonen, ta ppenda lenge: —Ppenau tumenge kai gaia ppivli chorri dia mai but neko sa ogola llene kai ttovena e love ande baulia;

⁴⁴ soke sa die katar so ni trubul len, a voi ande po chorripe, dia sa so saia la te pravarelpe.