Marko 11 - Nuevo Testamento Romané 2007

O Jesus del ando Jerusalem

¹ Kana avile pasa o Jerusalem, pasa e forura katar o Betfage ta e Betania, po burdo e Maslinkengo, o Jesus bichalda duien katar pe disipulura,

² ta ppenda lenge: —Llan ando forichi kai si anglal, ta kana ka aven ka malaven iek magarcho ppanglo, kai niko ni likisto pe lete. Putaren le ta anen le.

³ A te puchla tumen vareko soke cheren gua, ppenen leke kai trubul e Gazda, ta kai ka iril le oma.

⁴ Von llele, ta malade e magarcho ppanglo avri po drom, pasa iek udar, ta purtarde le.

⁵ Nesave llene kai sea kote ppende lenge: —¿So cheren? ¿Soke putaren e magarcho?

⁶ Ondaka von ppende isto gia sar ppendaia lenge o Jesus. Ta mukle len te llantar.

⁷ Von inllarde e magarcho kai o Jesus, ta ttode pe gertacha upral po magarcho ta o Jesus likisto upral.

⁸ Ta but llene inzarde pe gertacha po drom, a aver llene chinde krangura katar e kasta ta ttode len po drom.

⁹ E llene kai llana anglal ta i e llene kai llana palal, ttode te urkin: —¡Blagosime gua kai avel ando anau e Devleko!

¹⁰ ¡Blagosime e charoina kai avel, e charoina katar amaro dad o David! ¡Blagosime te avel o Del!

¹¹ O Jesus dia ando Jerusalem, ta i ando cher e Devleko dikkla pe suako rig ta mapalal llelotar e desuduie disipulonenchar ande Betania, soke lela te perel e riat.

O Jesus del armaia iekke kaste simochinengo

¹² Ttiarinako, kana likena katar e Betania, o Jesus bokkailo.

¹³ Dikkla duratar iek kas simochinengo kai saia le patra, ta avilo pase te dikkel dal saia le simochine, a malada samo e patra, soke ni saia o vreme e simochinengo.

¹⁴ Ondaka o Jesus ppenda e kasteke: —¡Daboida te na jal niko nikada che simochine! Leke disipulura asunde so ppenda.

O Jesus chistol o cher e Devleko

¹⁵ Kana avile ando Jerusalem, o Jesus dia ando cher e Devleko ta ttoda te tradel sa e llenen kai chinena ta bichinena ta dia tele moia e stalia golenge kai pparruvena e love e suetoke, ta i e ttana golenge kai bichinena e gulubura;

¹⁶ ta ni mukela nika te nakkel katar o cher e Devleko ezgodenchar,

¹⁷ Ta ttodape te sikavel, ta ppenela: —Ando Pisipe ppenel gia: ‘Mo cher ka ikkardol cher e molimako sa e ppuvienge’ a tumen cherden letar iek ttan kai gurudon e chorane.

¹⁸ A e gazda e poponenge ta e kovacha e zakonoke asunde e Jesuse ta ttode te roden sar te mundaren le, pala e dar kai saia lenge letar, soke sa e llene chudisailea katar leko sikadipe.

¹⁹ Kana peli e riat o Jesus ta leke disipulura lleletar katar o foro.

O kas e simochinengo sukol

²⁰ Ttiarinako rano, nakkle pasa o kas e simochinengo ta dikkle kai sukiloia sa llik leke zile.

²¹ Ondaka o Pedro diape golli, ta ppenda e Jesuseke: —Kovachi, dik, o kas kai dian le armaia, sukilo.

²² O Jesus ppenda lenge: —Pachan ando Del.

²³ Soke chachimaia ppenau tumenge, kai varesavo lleno te ppenela gale burdoke: “Le tut kotar, ta chude tut ande mora,” ta te pachala ande po lio kai gua sai avelpe, ta pachala kai so ppenda ka cherdol, ondaka gia ka avelpe.

²⁴ Goleke ppenau tumenge kai sogo tumen mangena ando molipe, pachan kai ia si tumenge dino, ta gia ka avelpe.

²⁵ Ta kana ka molintumen, ta te si tumen varesavi joli pe vareka, prostisaren le, te prostil i tumaro bilachipe tumaro Dad kai si ando miloso.

²⁶ Soke tumen te na prostisaren, ni tumaro Dad kai si ando miloso ni ka prostil tumenge tumaro bilachipe.

O gazdaripe e Jesuseko

²⁷ Mapalal katar gala ezgode irisaile ando Jerusalem. Ta kana o Jesus ppirela ando cher e Devleko, avile lete e gazda e poponenge, e kovacha e zakonoke ta e ppure,

²⁸ ta puchle le: —¿Save gazdarimaia chere gala ezgode? ¿Ta ko dia tut o gazdaripe te cherele?

²⁹ O Jesus ppenda lenge: —I me ka puchau tumen iek ezgoda: Ta te ppenden mange, i me ka ppenau tumenge save gazdarimaia cherau gala ezgode.

³⁰ ¿Ko bichalda e Juane te kristil, o Del, o e manusa? Ppenen mange.

³¹ Von ttode te den orba iek averea ta ppenena: Te ppendam kai bichalda le o Del, vou ka ppenel: ¿A soke ni pachaien le?

³² ¿A sar ka ppena kai bichalde le e manusa? Von ppenena gua soke darana katar o foro, soke sa pachana kai o Juan saia iek porauko.

³³ Goleke von ppende e Jesuseke: —Ni llana. Ondaka o Jesus ppenda lenge: —Ni me ni ka ppenau tumenge save gazdarimaia cherau gala ezgode.