Marko 10 - Nuevo Testamento Romané 2007

O Jesus sikavel te sai putaren o drom kana mukenpe

¹ O Jesus likisto katar o Kafernaum, ta llelo karing e ppuv katar e Judea ta pe ppuv kai si pe o goia rig katar o Jordan. Ta kote pale chidinailo o sueto te asunel le, ta sikavela len sar cherela suako drom.

² Ondaka nesave fariseura avile pasa o Jesus ta te zumaven le puchle le dal o rom sai mukelpe katar pi romi.

³ Vou ppenda lenge: —¿So ppenda o Moises te cheren?

⁴ Von ppende: —O Moises mukla te chinen kris, ta gia te del la iek lil kai mukelpe latar.

⁵ Ondaka o Jesus ppenda lenge: —O Moises dia tumen gua zakono soke tumaro lio si zuralo.

⁶ A kana o Del iakom cherela e sueto “cherda len murus ta diskinia.

⁷ Pala gaia ezgoda o murus ka mukel pe dade ta pe da te avel pe romiaia,

⁸ ta e dui ka aven sargo iek manus.” Goleke von inai dui, akana von si iek.

⁹ Goleke o manus morabi te na fulavel so o Del ttoda ande iek ttan.

¹⁰ Kana avile ando cher, e disipulura pale puchle le katar goia orba.

¹¹ Ondaka o Jesus ppenda lenge: —Gua kai mukelpe katar pi romi ta zinilpe averiaia, cherel kurvaluko golake kai saia leki romi mai anglal;

¹² a e romi te mukel pe rome ta te zinilpe averea, i voi cherel kurvaluko.

O Jesus blagosil e minonen

¹³ Ondaka ande kai o Jesus nesave minonen te ttovel pe va pe lengo soro ta te blagosil len; a e disipulura die pe llene kai anena e minonen.

¹⁴ Kana o Jesus dikkla so cherena, jolailo ta ppenda lenge: —Muken e minonen te aven mande, ta na achaven len, soke e charoina e Devleki si golengi kai si sargo minone.

¹⁵ Chachimaia ppenau tumenge, kai kogo ni lel e charoina e Devleki sargo iek minono, ni ka del andre.

¹⁶ Ta lia e mimonen ande pe va ta ttoda upral pe lende pe va ta blagosisarda len.

Iek terno barvalo del orba e Jesusea

¹⁷ Kana o Jesus llalatar kotar, avilo lete iek lleno prastindo ta dia changa angla le ta puchla le: —Kovachi lachea, ¿so morabi te cherau te lau o zivoto ostade?

¹⁸ O Jesus ppenda leke: —¿Soke ikkare man lacho? Samo iek si lacho, o Del.

¹⁹ Tu llane e zakonura: ‘Na mundar, na cher kurvaluko, na chor, na ikan bune, na kojau, de liubao che dade ta che da.’

²⁰ Gua lleno ppenda leke gia: —Kovachi, sa gola ezgode cherdemlen sar kana sema ternorro.

²¹ O Jesus dikkla pe lete volimaia, ta ppenda leke: —Iek ezgoda trubul tut te chere: Lla, ta bichin sa so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.

²² Gua manus tristosailo kana asunda gaia orba; llelotar zalbaia, soke saia but barvalo.

²³ O Jesus ondaka dikkla truialpe, ta ppenda pe disipulonenge: —¡Gia trudno ka avel e barvalenge te den ande charoina e Devleki!

²⁴ Gala alava cherde te chudinpe e disipulura, a o Jesus pale ppenda lenge: —Chavalen, ¡gia trudno si te den ande charoina e Devleki sa gola kai uzdinpe ande love!

²⁵ Mai lesno si iekke devake te nakkel katar e iak iekke suviaki, neko te del iek barvalo ande charoina e Devleki.

²⁶ Kana asunde le, chudisaile ios mai but, ta puchena iek avere: —¿A ko ka avel braduime?

²⁷ O Jesus dikkla pe lende ta ppenda lenge: —E manusa nasti cheren gaia ezgoda, a o Del sai, soke o Del sa sai cherel.

²⁸ O Pedro ttoda te ppenel e Jesuseke: —Amen muklam sa so saia amen, ta llelam pala tu.

²⁹ O Jesus ppenda lenge: —Chachimaia ppenau tumenge kai varesavo lleno kai pala ma ta pala e lachi viasta mukla cher, o pplalen, o ppiorren, o dea, o dade, o chaurren, o ppuvia,

³⁰ ka len akana ande gava zivoto stotina droma mai but chera, pplal, ppiorra, dea, chaurre ta ppuvia, makar nakkena patnia pe dusmanonenchar. Ta ando zivoto kai si te avel ka len o zivoto ostade.

³¹ A but llene kai akana si mai anglal, ka aven e mai palal; a but llene kai akana si mai palal, ka aven e mai anglal.

Pale o trito o Jesus ppenel kai si te merel

³² E disipulura ppirena karing o Jerusalem, ta o Jesus ppirela angla lende. Lenge saia chudo, ta ogola kai avena palal darana. O Jesus pale ikkarda pe iek rig e desuduie disipulonen, ta ttoda te ppenel lenge so saia te nakkel vou ta ppenda gia:

³³ Gia sar tumen dikken, akana lla ando Jerusalem, kote kai o Chavo e manuseko ka avel dino kai e gazda e poponenge ta kai e kovacha e zakonoke, ta ka chinaven leke o meripe ta ka den le kai e llene kai inai judiura.

³⁴ Ka maren letar espurnia, ka chungarden le, ka chalaven le ta ka mundaren le; a pala e trin llive ka ustel katar o meripe.

O Jesus del orba e Santiagoia ta e Juanea

³⁵ O Santiago ta o Juan, chave e Zebedeoke, avile pasa o Jesus ta ppende leke: —Kovachi, manga tutar te chere amenge o sebapi kai ka manga tutar.

³⁶ Vou ppenda lenge: —¿So mangen te cherau tumenge?

³⁷ Von ppende leke: —Cher te besa ande chi charoina e bari iek pe chi rig e chachi ta aver pe cho estingo

³⁸ Ondaka o Jesus ppenda lenge: —Tumen ni llanen so mangen. ¿Sai pien o cherkipe kai si te piau me, ta te len o kristope kai si te lau me?

³⁹ Von ppende: —Sai. O Jesus ppenda lenge: Tumen ka pien gava cherkipe, ta ka len o kristope kai me ka lau

⁴⁰ a te besen pe mi chachi ta pe mo estingo inai ande mo va te dau le, gua ka delpe e llenenge kai si lachardo te delpe.

⁴¹ Kana ogola des disipulura asunde goia orba, jolaile e Santiagoia ta e Juanea

⁴² A o Jesus ikkarda len, ta ppenda lenge: —Tumen llanen kai maskar e llene kai ni pachan ando Del si gazde kai misin kai sai gazdarin silnomaia pe llene kai zivin ande gola ppuvia ta e bare cheren sogo mangen lenchar.

⁴³ A maskar tumende nasti avelpe gia. A ko mangela te cherdol baro maskar tumende, morabi te avel tumaro esluga,

⁴⁴ a kogo mangela te avel mai anglal maskar tumende, morabi te avel esluga saurengo.

⁴⁵ Soke llik o Chavo e manuseko ni avilo te radin leke, vou avilo te radil, ta te del po zivoto, ta pe zivotoia te sai pochinel amen.

O Jesus sastarel iekke korre kai ikkardola Bartimeo

⁴⁶ O Jesus ta leke disipulura avile ando Jeriko. Ta kana o Jesus likela katar gua foro pe disipulonenchar ta bute llenenchar, iek lleno kai mangela esmola vou saia korro ta ikkardola Bartimeo chavo e Timeoko, ta besela pasa o drom.

⁴⁷ Kana asunda kai avela o Jesus o Nazareno, o korro ttoda te urkil: —¡Jesus, Chavo e Davideko, te avel chuke zalba mandar!

⁴⁸ A but llene dena po korro te achel, a vou urkila ios mai zurale: —¡Chavo e Davideko, te avel chuke zalba mandar!

⁴⁹ Ondaka o Jesus achilo, ta ppenda: —Ikkaren le. Ikkarde e korre ta ppende leke: —Cher chuke zor, uste, ikkarel tut.

⁵⁰ Ondaka o korro chudia pe patave ta, jutlo ta llelo pasa o Jesus.

⁵¹ O Jesus puchla le: —¿So mange te cherau pala tu? O korro ppenda leke: —Kovachi, mangau te dikkau.

⁵² O Jesus ppenda leke: —Sai llatar; pala cho pachape avilan sastardo. Ondaka o korro dikkla, ta llelo e dromea pala o Jesus.