Marko 1 - Nuevo Testamento Romané 2007

O Juan gua kai kristil

¹ Gia si sar lleli angle e lachi viasta e Jesukristoki, e Devleko Chavo.

² Gia sar pisisarda o porauko o Isaias: “Bichalau me porauko angla tu, te lacharel chuke o drom.

³ Iek lleno urkil po pusto: ‘Lacharen o drom e Gazdako; putaren leke iek drom orta.’ ”

⁴ Ande gola llivesa o Juan gua kai kristila sikadilo po pusto ta ppenela e llenenge kai saia te irinpe katar pe bilache droma ta te kristinpe, te sai avel prostime lengo bilachipe.

⁵ Ta avena lete sa e llene katar e ppuv e Judeaki ta katar o Jerusalem te asunen le, ta ppenena sa po bilachipe, ta o Juan kristisarela len ando pai katar e len kai ikkardol Jordan.

⁶ E Juaneke patave sea cherde katar e bal e devake, ta saia le iek kavisi morchako truial katar leke zea, ta jala langoste ta aullin kai malavala pe burdura.

⁷ Ta ppenela: Mapalal mandar avel iek kai si mai zuralo neko me, kai ni sem lacho ni te bangivau te putarau o kavisi katar leke sinele.

⁸ Me kristisardem tumen e paiea; a vou ka kristil tumen e Santone Duoia.

O kristope e Jesuseko

⁹ Ande gola llivesa, o Jesus avilo katar o Nazaret kai achela ande ppuv e Galileaki, ta o Juan kristisarda le ando Jordan.

¹⁰ Ta kana likisto katar o pai, o Jesus dikkla sar putailo o miloso, ta dikkla kai o Duo fuliela upral pe lete sargo iek gulubo.

¹¹ Ta asundilo iek avazi katar o miloso kai ppenela: “Tu san mo Chavo gole kai voliu; ande tu si man veselia.”

O Jesus po pusto

¹² Mapalal o Duo e Devleko inllarda e Jesuse po pusto.

¹³ Kote achilo saranda llive, ta o Satanas zumavela le, ta o Jesus saia maskar e zivirinie dive; ta e suechura arakkena le.

O Jesus ppenel e lachi viasta ande Galilea

¹⁴ Kana ppangle e Juane, o Jesus llelotar ande Galilea ta ppenela e lachi viasta katar e Devleki charoina,

¹⁵ ta ppenela: “Avilo o vreme ta e charoina e Devleki si pase; irin tumen karing o Del ta pachan ande lachi viasta.”

O Jesus pasa e mora e Galileaki

¹⁶ O Jesus nakkela pasa e mora e Galileaki ta dikkla e Simono ta leke pplale e Andrese. Von sea macharia ta chudena e mreza ande mora.

¹⁷ Ta o Jesus ppenda lenge: —Aven pala ma ta ka cherau tumen macharia manusenge.

¹⁸ Ondaka von mukle isto kote pe mreze, ta lleletar lea.

¹⁹ O Jesus llelo mai angle ta dikkla e Santiago ta e Juane chave e Zebedeoke, von sea ande iek llimia ta lacharena pe mreze.

²⁰ Kana ikkarda len, von mukle ande llimia pe dade e llenenchar kai radina leke, ta llele pala o Jesus.

Iek lleno kai saia ande le iek duo bilacho

²¹ O Jesus ta leke disipulura avile ando Kafarnaum, ta ando llive sabado o Jesus dia ande kkanlliri e judionengi ta sikavela.

²² E llene chudinape sar sikavela len, soke dela lenge orba gazdarimaia, a na sargo e kovacha e zakonoke.

²³ Ande lengi kkanlliri saia iek murus kai saia ande le iek duo bilacho kai urkila ta ppenela:

²⁴ —¡Ioi! ¿So si chuke amenchar Jesus katar o Nazaret? ¿Avilan te zatrisare amen? me llanau ko san: tu san o Santo e Devleko.

²⁵ A o Jesus silnosailo pe lete ta ppenda leke: —¡Ppande cho mui ta like letar!

²⁶ Ondaka o duo bilacho, dermosarda gole llene, ta urkisarda bare avazea, ta o duo bilacho likisto letar.

²⁷ Gia baro saia e llenengo chudo kai denape orba, ta ppenena: —¿So si gava? ¿Savo nevipe sikavel kai gazdaril llik pe duura bilache, ta kanden le?

²⁸ Ta but oma cherdilo pinllardo ande sa e ppuv e Galileaki.

O Jesus ta e sasui e Simonoki

²⁹ Kana likiste katar e kkanlliri e judionengi, o Jesus llelo e Santiagoia ta e Juanea kai o cher e Simonoko ta e Andreseko.

³⁰ Ta e sasui e Simonoki ppabola ande postelia nasualimatar. Ta ppende e Jesuseke so saia lake.

³¹ Ondaka o Jesus avilo pasa la, istarda lako va, ta cherda la te ustel; ta isto kote liape latar o nasualipe, ta voi ttoda te radil leke.

O Jesus sastarel bute llenen

³² Kana peli e riat ande sa e nasualen kai o Jesus, ta i golen kai sea ande lende llavolura,

³³ ta sa o foro chidinailo po udar e chereko.

³⁴ Ta sastarda bute llenen kai sea nasuale katar but muke, ta ikanda but llavolura e llenendar; ta ni mukla len te den orba soke e duura pinllarena le.

O Jesus sikavel ande kkanllira e judionenge

³⁵ Ttiarinako rano, ande kale zore, o Jesus ustilo ta likisto katar o foro, ta llelo te molilpe korkorre pe iek ttan.

³⁶ O Simono ta e llene kai sea lea llele te roden le.

³⁷ Ta kana malade le ppende leke: —Sa roden tut.

³⁸ Vou ppenda lenge: —Aven kai aver forichura kai si pase te ppenau i kote e lachi viasta, soke goleke avilem.

³⁹ Ta o Jesus ppirda sa e Galilea, ta ppenela e lachi viasta ande kkanllira e judionenge pe suako rig, ta tradela e llavolonen.

O Jesus sastarel iekke llene kai saia pe lete e lepra

⁴⁰ Avilo lete iek leproso ta ttodape pe pe changa, ta ppenda leke: —Te mangea, sai sastare man katar mo nasualipe.

⁴¹ E Jesuseke avila but zalba letar; dodisarda le pe vastea, ta ppenda leke: —Mangau. ¡Sastiu!

⁴² Ta kana vou ppenda gua, isto kote sastilo.

⁴³ Ondaka ppenda leke so te cherel alau po alau, ta kana llalatar, o Jesus ppenda leke:

⁴⁴ —Na ppen nikake so avilape tuia, lla ta sikado e popoke, ta de kurbano pala cho sastipe gia sar ppenda o Moises te cheren, te sai dikken e popura kai sastilan.

⁴⁵ A samo llelotar, ttoda te ppenel saurrenge so vou nakkla, goleke o Jesus nasti dela ande forura, ta achela avri ande ttana puste, ta avena lete llene katar suako rig.