Lukas 9 - Nuevo Testamento Romané 2007

O Jesus bichalel e disipulonen te ppenen e charoina e Devleki

¹ O Jesus chidia pe desuduie disipulonen, ta dia len zor ta o gazdaripe te traden suako llavolonen ta i te sastaren suako nasualipe.

² Bichalda len te ppenen e lachi viasta katar e charoina e Devleki ta te sastaren e nasualen.

³ Ppenda lenge: —Na inllaren niso e dromeke: Ni rovli, ni galavo ni marrno ni love, ni premena.

⁴ Kana ka aven ande varesavo cher, achen kote lligo ni ka llantar katar gua ttan.

⁵ A ande varesavo foro te na mukle tumen te achen, liken letar ta chinosaren o prajo katar tumare porrne, te dikken kai ni avila tumenge drago so cherde tumenchar.

⁶ Von likiste ta llele kai sa e forichira, ta ppenena e lachi viasta ta sastarena e nasualen.

O Erodes ni llanel ko si o Jesus

⁷ O charo o Erodes asunda kai dena orba katar sa so cherela o Jesus; ta ni llanela so ka mislil, soke nesave llene ppenena kai o Juan ustiloia katar o meripe,

⁸ aver llene ppenena kai avilo o porauko o Elias, a aver llene ppenena kai saia iek katar e purane poraukura. Kai ustiloia katar o meripe.

⁹ A o Erodes ppenda: —Isto me bichaldem te chinen e Juaneko soro. ¿Ko si gava lleno? Goleke o Erodes mangela te dikkel e Jesuse.

O Jesus del te jal iekke bare sueto

¹⁰ Kana e apostolura irisaile ta ppende e Jesuseke sa so von cherde. Vou, ikkarda len pe iek rig, inllarda len ande iek foro kai ikkardol Betsaida.

¹¹ A kana e llene llangle, llele pala le; ta o Jesus avila lenchar pachivalo ta dia lenge orba katar e charoina e Devleki ta sastarda e nasualen.

¹² Kana lela te perel e riat, avile e desudui disipulura pasa o Jesus ta ppende leke: —Ppen e llenenge te llantar, te roden kai te nakken e riat ta te roden so te jan ande forichura ta pe droma kai si pase, soke kate inai niso.

¹³ O Jesus ppenda lenge: —Den len tumen te jan: Von ppende leke: —Samo panch marrne ta dui mache si amen, a te jan sa gala llene morabi te lla te china.

¹⁴ A kote sea preko panch milie murusa. A o Jesus ppenda pe disipulonenge: —Ttoven len te besen po pinda llene.

¹⁵ Von cherde so ppenda o Jesus, ta cherde te besen sa e llene.

¹⁶ Ta o Jesus lia ande pe va e panch marrne ta e dui mache, dikkla ando miloso, molisailo pe lende, ppagla len ta dia len kai pe disipulura te fulaven len maskar e llene.

¹⁷ Saurre jale ta chalile, ta chidie ande desudui kotariche e kotora kai achile.

O Pedro ppenel kai o Jesus si o Mesias

¹⁸ Iek llive kana o Jesus molilape korkorre ta leke disipulura sea lea, puchla len: —¿Ko ppenen e llene kai sem me?

¹⁹ Von ppende: —Nesave llene ppenen kai tu san o Juan gua kai kristil, aver llene ppenen kai san o Elias, a aver llene ppenen kai san iek katar e purane poraukura, kai ustilo katar o meripe.

²⁰ —A tumen, ¿ko ppenen kai sem me? O Pedro ppenda leke: —Tu san o Mesias e Devleko.

O Jesus ppenel kai si te merel

²¹ A o Jesus mangla lendar te na ppenen gua nikake.

²² Ta ppenda lenge: —O Chavo e manuseko si te nakkel but patnia, ta e ppure, ta e gazda e poponenge ta e kovacha e zakonoke ni ka mangen le. Ta ka mundaren le, a pala e trin llive ka ustel katar o meripe.

²³ Mapalal ppenda saurrenge: —Vareko te mangela te avel mo disipulo, si te bristarelpe vou petar, ta te inllarel po krusto suako llive ta te llal pala ma.

²⁴ Soke o lleno kai mangela te braduil po zivoto, ka jasarel le; a lleno kai jasarel po zivoto pala ma, ka braduil le.

²⁵ ¿So blazil e manuseke te dobil sogo si po sueto, ta te jasaol ta te zatrila isto vou pe?

²⁶ Vareko te avel leke lallao mandar ta katar me alava, i o Chavo e manuseko ka avel leke lallao letar kana ka avel ande po blagosipe ta ando blagosipe leke Dadeko ta e santone suechonengo.

²⁷ Chachimaia ppenau tumenge kai nesave llene kai si kate, mai anglal te meren ka dikken e charoina e Devleki.

E Jesuseki esnaga cherdol aver

²⁸ Nakkle preko ojto llive katar goia orba, ta o Jesus likisto pe iek burdo te molilpe, llelo e Pedroia, e Santiagoia ta e Juanea.

²⁹ Kana molilape, leko mui cherdilo aver, ta leke patave cherdile but parne ta klichina;

³⁰ ta dui llene kai dene orba lea. Gola sea o Moises ta o Elias,

³¹ ta truial lendar saia iek villelo blagosime ta ppenena kai o Jesus ka llaltar katar gava sueto, ta goia ezgoda saia te avelpe ando Jerusalem.

³² O Pedro ta leke amal saia lenge but lindri, a achile llungade, ta dikkle o blagosipe e Jesuseko ta e duie llenen kai sea lea.

³³ Kana gala llene llanatar katar o Jesus, o Pedro ppenda leke: —Kovachi, ¡Gia sukar kai sam kate! Ka chera trin cherorra e patrenchar: Iek chuke, aver e Moiseseke ta aver e Eliaseke. A o Pedro dela orba ta ni llanela so ppenel.

³⁴ Kana dela orba iek oblako ucharda len, ta kana dikkle kai i von sea andre ando oblako daraile.

³⁵ Ondaka katar o oblako likisto iek avazi kai ppenda: “Gava si mo Chavo, kai me esvirisardem: asunen le.”

³⁶ Kana asundilo gua avazi, o Jesus achilo korkorre. A von mukle maskar pete sa gala ezgode, ta ande gola livesa ni ppende nikake so von dikklea.

O Jesus sastarel iekke terne kai saia ande le iek duo bilacho

³⁷ Ttiarinako, kana fuliste katar o burdo, but sueto likisto te maladol e Jesusea.

³⁸ Ta iek manus maskar e llene bare avazea ppenda: —Kovachi, me moliuman chuke, dik pe mo chaurro kai si o edino kai si man;

³⁹ iek duo istarel le ta cherel le te urkil ta te perel bengendar ta te chudel katar po mui o chungar, chalavel le ta ni kamel mukel le.

⁴⁰ Manglem but katar che disipulura te traden letar gole duo, a von nasti cherde le.

⁴¹ O Jesus ppenda: —¡Ioi manusalen kai inai tumen pachape ta sen bilache! ¿Pe gachin ios si te avau tumenchar ta te terpiu tumen? An kate che chaurre.

⁴² Kana o terno avela pasa le, o llavolo perada le pe ppuv ta cherda pale te perel bengendar; a o Jesus dia po duo bilacho, sastarda e terne ta diale kai leko dad.

⁴³ Ta sa chudisaile katar e Devleki zor. Kana sa chudinape katar so cherela o Jesus, vou ppenda pe disipulonenge:

O Jesus pale ppenel kai ka merel

⁴⁴ —Asunen so ka ppenau ta na bristaren tumen: —O Chavo e manuseko si te avel dino ande va e manusenge.

⁴⁵ A von ni acharena so ppenela lenge, soke ni ios ni putailoa lengo mislo te acharen le; ta darana te mangen letar te ppenel lenge so saia gua.

¿Ko si o mai baro?

⁴⁶ Ondaka e disipulura ttode te den pe orba te llanen ko ka avel o mai baro maskar lende.

⁴⁷ O Jesus kana ttoda sama so mislinape, lia pasa pe iekke minone

⁴⁸ ta ppenda: —Ko lela gale minone ande mo anau, lel man; ta ko lel man lel i gole kai bichalda man. Goleke o mai minono tumendar, gua si o mai baro.

Ko ni marelpe amenchar si amenchar

⁴⁹ O Juan ppenda leke: —Kovachi, dikklam iekke llene kai tradela e llavolonen ande cho anau, ta amen achavaia le, soke gua lleno inai iek amarendar.

⁵⁰ O Jesus ppenda leke: —Na achaven le, soke ko ni marelpe amenchar, si amenchar.

O Jesus del po Santiago ta po Juan

⁵¹ Kana avela pase o vreme kai o Jesus saia te llal ando miloso, llelo karing o Jerusalem tromanimaia.

⁵² Ta bichalda llene, te llan ande iek forichi katar e Samaria samo te malaven kai ka te nakkel e riat.

⁵³ A e Samaritanura ni kamle te avel lende soke llanena kai llala karing o Jerusalem.

⁵⁴ Kana ppende leke gua o Santiago ta o Juan kai sea leke disipulura dikkle so nakklaia, ppende leke: —Gazda. ¿Mange te ppene te fuliel iag katar o miloso, ta te mundarel len gia sar cherda o Elias?

⁵⁵ A o Jesus boldinailo ta dia pe lende.

⁵⁶ Mapalal llele ande aver forichi.

Te lla pala o Jesus

⁵⁷ Kana llana e dromea, iek lleno ppenda e Jesuseke: —Gazda, mangau te llau pala tu kai go te llaia.

⁵⁸ O Jesus ppenda leke: —E lisiche si len kai te gurudon, ta i e chiriklia e milosoke si len kuibura; a o Chavo e manuseko inai le kai te ttovel po soro.

⁵⁹ O Jesus ppenda avereke: —Aide pala ma. A vou ppenda leke: —Gazda, muk man mai anglal te prajou me dade.

⁶⁰ O Jesus ppenda leke: —Muk e llene kai si mule te prajon pire mulen; a tu lla ta de orba katar e charoina e Devleki.

⁶¹ Aver lleno ppenda leke: —Gazda, mangau te llau pala tu, muk te llau mai anglal kai mi familia te ppenau lenge kai ka llautar.

⁶² O Jesus ppenda leke: —Gua kai lel o kas te putarel lea e ppuv ta dikkel pala pe, inai letar e charoina e Devleki.