Lukas 7 - Nuevo Testamento Romané 2007

O Jesus sastarel iekke sudoko esluga

¹ Kana o Jesus dia orba e llenenge, llelo ando Kafernaum.

² Ande gua foro zivila iek sudo romano kai saia le iek esluga kai vou volila but, ta saia nasualo po meripe.

³ Kana o sudo asunda kai dena e Jesuseki orba, bichalda nesave ppuren katar e judiura te molinpe leke te llal te sastarel leke esluga.

⁴ Von llele kai o Jesus ta molisaile leke but ta ppenena: —Gale sudoke blazil te pomozi le,

⁵ soke volil amare ppuvia ta chereda amenge iek kkanlliri.

⁶ O Jesus llelo lenchar, ta kana sea pasa o cher, o sudo bichalda nesave amalen te ppenen leke: “Gazda, na brigisao, soke ni sem lacho te de ande mo cher.

⁷ Ni kamlem ni te avau te maladivau tuia. Samo ppen te sastol mo esluga.

⁸ Soke i me sem manus kai si man zor, ta si tala mo va boñikura, ta ppenau goleke lla, ta vou llal; a ogoleke: aide; ta vou avel. Ta kana me ppenau me eslugake cher gaia ezgoda, vou cherel la.”

⁹ O Jesus chudisailo kana asunda gaia orba, ta dikkla pe llene kai llana pala le ta ppenda: —Chachimaia ppenau tumenge ka ni ando Israel ni maladem pe gachin pachape sargo ande gava manus.

¹⁰ Kana irisaile kai o cher e llene kai o sudo bichaldaia, dikkle kai o esluga ia sastiloia.

O Jesus cherel te ustel katar o meripe iekke ppivliake chaurre

¹¹ Mapalal, o Jesus llelo karing o foro o Nain. Llana lea leke disipulura ta but llene.

¹² Kana avile pasa o foro, dikkla kai inllarena te prajon iekke llene, edino chavo pe dako, kai saia ppivli. Ta but llene katar o foro avena laia.

¹³ Ta kana o Jesus dikkla la, avila leke zalba latar ta ppenda lake: —Na rou.

¹⁴ Avilo pase ta istarda e postelia kote kai inllarena e mule, ta e llene kai inllarena le achile. Ondaka o Jesus ppenda e lleneke kai muloia: —Ternea, chuke ppenau: ¡Uste!

¹⁵ Ondaka o lleno kai saia mulo beslo ta dia orba, ta o Jesus diale kai leki dei.

¹⁶ Sa e llene kai sea kote daraile ta blagosina e Devle, ta ppenena: —Avilo iek baro porauko maskar amende. Ta i ppenena: —O Del avilo te pomozil pe foro.

¹⁷ Ta ande sa e Judea ta ande forura kai sea truial llangle so cherda o Jesus.

E bichalde e Juaneke

¹⁸ O Juan llangla katar sa gola ezgode, soke e llene kai llana pala le ppenena leke so cherela o Jesus, goleke Ikkarda duien katar pe disipulura

¹⁹ ta bichalda len kai o Gazda, te puchen le: ¿San tu gua kai saia te avel o si te adurichara avere?

²⁰ E llene kai bichaldaia o Juan avile pasa o Jesus ta ppende leke: —O Juan gua kai kristil bichalda amen te pucha tut dal san tu gua kai saia te avel o si te adurichara avere.

²¹ Isto kote o Jesus sastarda bute llenen katar lengo nasualipe ta katar lengi patnia, ta katar e duura bilache, ta cherda bute korren te dikken.

²² Ta ppenda lenge: —Llan ta ppenen e Juaneke so dikklen ta so asunden. Ppenen leke kai e korre dikken, e bange ppiren, e leprosura saston, e kasuke asunen, e mule llundinpe ta e chorrenge ppendol e lachi viasta.

²³ ¡Ta blagosime gua kai ni jasarel po pachape ande ma!

²⁴ Kana lleletar e llene kai bichalda o Juan, o Jesus dia orba e llenenge katar o Juan, ta ppenela: “¿So llelen tumen te dikken po pusto? ¿Iek ran chinome e balaviatar?

²⁵ A te inai gia ¿So llelen te dikken? ¿Iekke manuse furiado barimaia? Tumen llanen kai e llene kai furiadon gia ta si ande dragostia zivin samo ande chera e charoke.

²⁶ A ¿So llelen te dikken? ¿Iekke porauko? Ea, chachimaia, ta mai but neko iek porauko.

²⁷ Soke o Juan si kai si pisime letar: ‘Me bichalau me porauko angla tu, te lacharel chuke o drom.’

²⁸ Ppenau tumenge kai maskar sa e manusa, ni iek ni saia mai baro neko o Juan; a o mai mimono ande charoina e Devleki si mai baro neko vou.”

²⁹ Sa e llene kai asunde e Juane ta i e publikanura, kristisarda len vou, ta cherena so mangela lendar o Del;

³⁰ a e fariseura ta e kovacha e zakonoke ni kamle te kristil len o Juan ta ni kamle te cheren so mangela lendar o Del.

³¹ “¿A pe ka ka ppenau kai si chuti gaia vicha? ¿Pe so mizil?

³² Von si sargo e minone kai besen po maskar katar o foro ta urkin ogole minonenge kai llan lenchar ta ppenen lenge. ‘Basaldan tumenge ande firura ta ni chelden; llilabiam tumenge llilia zalbake ta ni rovden.’

³³ Soke avilo o Juan gua kai kristil kai ni jal marrno ta ni piel mol, a tumen ppenen kai ande le si iek llavolo.

³⁴ Mapalal avilo o Chavo e manuseko kai jal ta piel ta ppenen letar, gava si iek lleno kai samo jal ta piel mol ta kai si amal e llenenchar kai si publikanura ta e manusenchar kai si bilache.

³⁵ A o chachipe e Devleko dikkol ande leke chave.”

O Jesus ande Simonoko cher

³⁶ Iek fariseo ikkarda e Jesuse te jal, ta o Jesus llelo ande leko cher. Ta beslo pe sinia,

³⁷ ondaka avili iek diskinia kai zivila isto ande gua foro ta llanglaia kai o Jesus lleloia te jal ando cher e fariseoko, anda pea iek taso alabastroko pperdo meriso.

³⁸ Rovindo ttodape kai e porrne e Jesuseke, pegachin rovela kai lake ausa perena pe jesuseke porrne. Ta mapalal sukarda len pe balenchar, chumidia len ta ttoda pe lende meriso.

³⁹ O fariseo kai ikkardaia e Jesuse te jal, kana dikkla gua, mislisailo: “Gava lleno te aviloia chachimaia iek porauko, llanglaia savi diskinia bilachi si gaia kai dodil le.”

⁴⁰ Ondaka o Jesus ppenda e fariseoke: —Simon, si te dau tuia iek orba. O fariseo ppenda leke: —Ppen mange, Kovachi.

⁴¹ O Jesus ppenda leke: —Dui llene sea unllile iekke lleneke kai dela unllile ta pe gua radila. Iek saia leke unllile panch stotine denariura, a o gua pinda;

⁴² ta sar nasti pochinena leke, o lleno kai dela unllile prostisarda e duienge lengo dugo. Akana ppen mange tu: ¿Savo katar e dui ka del le mai but fala?

⁴³ O Simon ppenda leke: —Me acharau kai gua kai saia leke unllile mai but. O Jesus ppenda leke: —O chachipe ppendan

⁴⁴ Ondaka, o Jesus dikkla pe diskinia ta ppenda e Simonoke: —¿Dikke gale diskinia? Kana diem ande cho cher tu ni diam man pai me porrnenge; a gaia diskinia jalada me porrne pe ausenchar ta sukarda len pe balenchar.

⁴⁵ A tu ni ppendan mange sar san ta ni chumidian man, a voi sar kai diem ande cho cher, ni achile te chumidel me porrne.

⁴⁶ Ni ttodan pe mo soro zeitino, a voi ttoda meriso pe me porrne.

⁴⁷ Goleke ppenau chuke kai lako bilachipe kai si but si prostime, soke dia mai but fala; a o manus kai inai but prostime ni del but fala.

⁴⁸ Mapalal ppenda e diskiniake: —Cho bilachipe si prostime.

⁴⁹ Ogola llene kai sea gostura kote, ppenena iek avereke: —¿Ko si gava, kai llik o bilachipe prostil?

⁵⁰ A o Jesus ppenda e diskiniake: —Tu avilan braduime soke pachaian; lla esmiro.