Lukas 6 - Nuevo Testamento Romané 2007

E disipulura ikanen lliu ando llive sabado

¹ Iek llive sabado o Jesus ppirela maskar o lliu. Ta leke disipulura ikanena lliu ta jana e kuchorra.

² Ondaka nesave fariseura puchle len: —¿Soke cheren so nasti cherdol ando llive sabado?

³ O Jesus ppenda lenge: —¿Tumen ni chitisarden so cherda o David kana vou ta leke amale sea bokkale?

⁴ Dia ando cher e Devleko ta lia e marrne kai sea chinade e Devleke ta jala ta dia i pe amalen te jan, kana gola marrne saia te jan len samo e popura.

⁵ Ta i ppenda: —O Chavo e manuseko si Gazda i po llive sabado.

O Jesus sastarel iekke nasuale ando llive sabado

⁶ Aver llive sabado, o Jesus dia ande kkanlliri e judiononengi ta sikavela. Ta andre saia iek manus kai leko va o chacho saia suko ta bango;

⁷ ta e kovacha e zakonoke ta i e fariseura prezona e Jesuse te dikken dal ka sastarel le ando llive sabado, ta gia te avel len vareso te dosaren le.

⁸ A vou, sar llanela so mislinpe, ppenda e lleneke kai saia leko va bango: —Uste ta ttou tut po maskaral. O nasualo ustilo ta ttodape pe porrne,

⁹ ondaka o Jesus ppenda ogole llenenge: —Ka puchau tumen iek ezgoda: ¿So sai cherdol ando llive sabado: O lachipe o o bilachipe? ¿Te bradui iek zivoto o te zatri le?

¹⁰ Dikkla pe sa e llene kai sea truial, ta ppenda gole manuseke: —Inzar cho va. Ta gua manus inzarda po va, ta leko va sastilo.

¹¹ A ogola llene jolaile but ta ttode te denpe orba te sai cheren vareso bilacho e Jesuseke.

O Jesus esviril e desuduie apostolen

¹² Ande gola llivesa, o Jesus llelo pe iek burdo te molilpe, ta molisailo e Devleke sorro riat.

¹³ Kana llivosaila, ikkarda pe disipulonen ta esvirisarda desuduien lendar, ta ttoda lengo anau apostolura.

¹⁴ Gola llene sea: O Simon, kai ttoda leko anau i Pedro, o Andres, o pplal e Simonoko, o Santiago, o Juan, o Felipe, o Bartolome,

¹⁵ o Mateo, o Tomas, o Santiago chavo e Alfeoko, o Simon, gua kai ppenena leke Selote.

¹⁶ O Judas, chavo e Santiagoko, ta o Judas Iskariote, gua kai ppukada e Jesuse.

O Jesus sikavel bute llenen

¹⁷ O Jesus fulisto katar o burdo lenchar ta achilo pe iek bari umal. Chidinailea but llene kai llana pala le ta but llene katar sa e forura e judeake, katar o Jerusalem ta katar o Tiro ta o Sidon kai si pasa e mora.

¹⁸ Avilea te asunen e Jesuse ta te sastarel len katar lengo nasualipe. Ta i gola kai sea ande lende duura bilache sastona.

¹⁹ Ta sa e llene mangena te dodin e Jesuse, soke suako lleno kai dodila le sastola pala e zor kai likela letar.

So mol chachimaia angla o Del

²⁰ O Jesus dikkla pe disipulura ta ppenda lenge: “Blagosime tumen e chorre, soke tumari si e charoina e Devleki.

²¹ “Blagosime tumen kai akana sen bokkale, soke ka achen chalie. Blagosime tumen kai akana roven, soke mapalal ka asan.

²² “Blagosime te aven tumen kana e llene ka murzin pe tumende, kana ka traden tumen, kana ka kusen tumen kana ka murzin pe tumaro anau sargo kana si iek ezgoda bilachi, pala o Chavo e manuseko.

²³ Veselin tumen but, ande gua llive pperdon veselia, soke so si te dobin ando miloso si baro, soke isto gia cherde e poraukonenchar lenge ppure.

²⁴ “A ¡tesko tumenge barvalalen, soke ia saia tumen tumari veselia!

²⁵ “¡Tesko tumenge kai akana sen chalie, soke ka avel tumenge bok! “¡Tesko tumenge kai akana asan, soke ka roven zalbatar!

²⁶ “¡Tesko tumenge kana sa e llene ka blagosin tumen, soke isto gia cherena tumare purane e llenenchar kai sea poraukura kojamne!

O volipe pe dusmanura

²⁷ “A tumenge kai asunen ppenau: Volisaren tumare dusmanonen, cheren o lachipe golenge kai murzin pe tumende,

²⁸ blagosisaren golen kai ppenen tumenge bilache alava, molintumen pala gola kai kusen tumen.

²⁹ Te chalavela tut vareko pe chi cham, ttou te chalavel tut i pe o goia; a vareko te lela tutar cho gertachi, muk te inllarel i cho gad.

³⁰ A vareko te mangela tutar vareso, de le leke, ta ko lela tutar so si chiro, na mangle letar.

³¹ Cheren e llenenchar isto gia sar mange te cheren tumenchar.

³² “Te volina tumen samo e llenen kai si len volipe pala tumende, ¿savi bari ezgoda cheren? I e llene bilache cheren gia.

³³ A te cheren o lachipe samo e llenenge kai i von cheren o lachipe tumenchar, ¿savi bari ezgoda cheren? I e llene bilache cheren gia.

³⁴ A te den unllile samo golen kai mange te le lendar i tu vareso, ¿savi bari ezgoda cheren? I e bilache den pe unllile maskar pete, te len chari iek averetar.

³⁵ Tumen morabi te volisaren tumare dusmanonen, ta te cheren o lachipe, ta te na mangen chari kana den unllile, ta gia ka avel baro tumaro chari, ta tumen ka aven chave katar o Del e milosoko, kai si lacho i e llenenchar kai ni den fala ta e bilachenchar.

³⁶ Si te avel tumen zalba, sargo i tumaro Dad kai si leke zalba tumendar.

Na chin kris nikake

³⁷ “Na krisin averen, ta ni o Del ni ka krisil tumen, na dosaren averen, ta o Del ni ka dosarel tumen. Prostin, ta o Del ka prostil tumen.

³⁸ Den averen, ta o Del ka del tumen. Ka del tumen so trubul tumen. Isto gia sar tumen den averen, o Del ka del i tumen.”

³⁹ O Jesus ppenda lenge iek paramichi: Iek korro nasti inllarel avere korre, soke e dui ka peren ando iek jar.

⁴⁰ Ni iek disipulo ni llanel mai but neko leko kovachi: Kana ka getol po sikadipe ka avel sargo po kovachi.

⁴¹ “¿Soke dikke e truña kai si ande che pplaleki iak, a ni dikke o kas kai si ande chiri iak?

⁴² A te na acharea kai si iek kas ande chi iak, ¿sar ppene che pplaleke: ‘Pplala, muk te ikanau e truña kai si ande chi iak’? ¡Manus kojamno san! mai anglal ikan o kas kai si ande chiri iak, ta ondaka ka dikke sukar te ikane e truña katar e iak che pplaleki.

O kas pinllardol pala pe septelie

⁴³ “Ni iek kas lacho ni del bilache septelie, ni o kas bilacho ni del lache saptelie.

⁴⁴ Suako kas pinllardol pala pe septelie, ni ikandon simochine katar e kasta karrnale, ni drakka katar e karrne.

⁴⁵ O manus lacho del orbe lache soke o lachipe si ande leko lio, a o manus bilacho del orbe bilache soke o bilachipe si ande leko lio. Soke o manus del orba katar so mai but si ande leko lio.

E dui chera

⁴⁶ “¿Soke ppenen mange tumen, ‘Gazda, Gazda’, a ni cheren so ppenau tumenge?

⁴⁷ Ka ppenau tumenge sar si o lleno kai avel mande ta asunel man a ni cherel so ppenau:

⁴⁸ gua lleno si sargo iek manus kai mai anglal anada but te vazdel po cher, ta vazdiale po barr. Kana barili e len, o pai chalada zurale pe gua cher, a ni miskosarda le, soke vazdieale po barr.

⁴⁹ A vareko kai asunel me alava ta ni cherel so ppenau, si sargo iek manus kai cherda po cher pe chisai ta ni anada te malavel e ppuv zurali. Ta kana e len barili ta chalada zurale ando cher, pelotar ta achilo sa pe kotora.”