Lukas 5 - Nuevo Testamento Romané 2007

Ikanen but mache

¹ Iek drom o Jesus saia pasa e mora katar o Jenesaret, ta avile pe gachin llene kai chichidena le soke mangena te asunen e Devleke alava.

² O Jesus dikkla dui llimie ando pai. E macharia fulistea andral te jalaven pe mreze.

³ O Jesus likisto ande iek llimia, kai saia e Simonoki, ta mangla letar te duriavel la katar e ppuv. Mapalal beslo ande llimia, ta andral sikavela e llenen.

⁴ Kana getosarda pi orba, ppenda e Simonoke: —Inllar e llimia kote kai si mai but pai, ta kote chuden tumare mreze, te ikanen machen.

⁵ O Simon ppenda leke: —Kovachi, radisardam sorro riat ta ni istardam ni iek macho; a soke tu mange amendar te cherale, ka chudau e mreza.

⁶ Kana chudie e mreze, istarde pe gachin mache kai e mreze chindona.

⁷ Ondaka ikkarde e vastenchar e llenen kai radina lea zanio kai sea ande o goia llimia, te pomozin len. Ogola llele, ta pperde pe gachin e dui llimie kai lela te del o pai andre.

⁸ Kana o Simono Pedro dikkla gua, dia changa angla o Jesus ta ppenda leke: —¡Le tut mandar, Gazda, soke sem iek bilacho!

⁹ Gua saia soke o Simon ta sa ogola darailea soke istarde but mache.

¹⁰ Ta daraile i o Santiago ta o Juan, chave e Zebedeoke, kai radina zanio e Simonoia. A o Jesus ppenda e Simonoke: —Na dara; katar angle ka ikane manusen.

¹¹ Ondaka inllarde e llimie pe ppuv, mukle sa ta lleletar lea.

O Jesus sastarel iekke llene kai saia pe lete e lepra

¹² Iek llive, o Jesus saia ande iek foro, ta avilo lete iek lleno kai saia pe lete e lepra. Kana dikkla e Jesuse, chudiape tele muia pe ppuv ta molisailo leke: —Gazda, te mangea, sai sastare man katar mo nasualipe.

¹³ O Jesus dodisarda le pe vastea ta ppenda: —Mangau. ¡Sastiu! Ta isto kote o nasualo sastilo katar e lepra,

¹⁴ ta o Jesus ppenda leke: —Na ppenle nikake; lla ta sikado samo e popoke, ta inllar pala cho chistope so ppenda o Moises te inllare, te dikken e popura.

¹⁵ Ta o Jesus cherdola ios mai pinllardo, ta but llene chidiniaona te asunen le ta te sastarel lengo nasualipe.

¹⁶ A o Jesus llala te molilpe kote kai ni saia niko.

O Jesus prostil ta sastarel iekke llene kai nasti ppirela

¹⁷ Iek llive kana o Jesus sikavela, besena kote nesave fariseura ta i nesave kovacha e zakonoke kai avena katar suako rig e Galileaki, ta i katar e Judea ta katar o Jerusalem. Ta e zor e Gazdaki sikadola ando Jesus kana sastarela e nasualen.

¹⁸ Ondaka avile nesave llene kai anena ande iek postelia iekke llene kai nasti ppirela. Mangena te ttoven le andre ando cher angla o Jesus,

¹⁹ a ni malade katar te den andre, soke sea but llene. Likiste upral po cher, cherde iek putardipe ta kotar fuliarde gole bange ande iek postelia, ta ttode le maskar e llene, angla o Jesus.

²⁰ Kana o Jesus dikkla lengo pachape, ppenda e bangeke: —Amala, cho bilachipe si prostime.

²¹ Ondaka e kovacha e zakonoke ta e fariseura mislisaile: “¿Ko si gava kai ppenel gola bilache alava? Gava lleno kusel e Devle gole alavenchar.” Samo o Del sai prostil o bilachipe.”

²² A o Jesus llangla so mislina, ta puchla len: —¿Soke mislin tumen gia?

²³ ¿So si mai lesno, te ppendol: “Cho bilachipe si prostime,” o te ppendol: “Uste ta ppir”?

²⁴ Goleke ka sikavau tumenge kai o Chavo e manuseko si le e zor pe ppuv te prostil o bilachipe. Ondaka ppenda e bangeke: —Uste, le chi postelia ta llatar kai cho cher.

²⁵ Ondaka, o lleno kai nasti ppirela ustilo angla sa e llene, lia e postelia kai vou inzola pe late, ta llelotar kai po cher ta blagosila e Devle.

²⁶ Sa e llene chudisaile ta daraile ta blagosina e Devle ta ppenena: Gia bare ezgode dikklam allive.

O Jesus ikkar e Levieke

²⁷ Mapalal o Jesus, llelotar kotar ta dikkla iekke publikano. Gua lleno ikkardola Levi, ta besela po stali, kote kai pochindol e love e ppuviake. O Jesus ppenda leke: —Aide pala ma.

²⁸ Ondaka o Levi ustilo, mukla sa ta llelo pala le.

²⁹ Isto gua llive ande po cher o Levi cherda pachiu e Jesuseke; ta but publikanura ta i aver llene, besena lenchar pe sinia.

³⁰ A e fariseura ta e gazda e zakonoke dena lenge orbe ta ppenena: —¿Soke tumen jan ta pien e publikanonenchar ta e bilache llenenchar?

³¹ O Jesus ppenda lenge: —E saste ni trubul len doktori, ka trubul o doktori si e nasualen.

³² Me ni avilem te ikkarau e chachen, me avilem te ikkarau e bilachen, te irinpe kai o Del.

So si te cherdol kana cheren o alluno

³³ Ppende e Jesuseke: —E disipulura e Juaneke ta i katar e fariseura allunin ta molinpe but, a che disipulura jan ta pien.

³⁴ O Jesus ppenda lenge: —¿Sai cheren tumen te allunin e llene kai si ikkarde pe iek biau kana o chavo kai zinilpe si lenchar?

³⁵ A ka avel o llive kana ka len lendar gole kai zinilpe, ondaka von ka allunin.

³⁶ Ta i ppenda lenge gaia paramichi: —Niko ni chinel iek kotor chiti katar iek fistano nevo te lacharel iek fistano purano. Soke te cherdol gia, murilpe o fistano nevo; ta o kotor nevo ni ka achel sukar po fistano purano.

³⁷ Ta ni ttodol e mol nevi ande morcha purane, soke e mol nevi cherel te pparron e morcha, ta gia e mol ta i e morcha jasaon.

³⁸ Goleke morabi te ttodol e mol nevi ande morcha neve.

³⁹ Ta niko ni kamel e mol nevi kana piel e mol e purani, soke suako lleno kai piel mol purani mapalal ni kamel te piel e mol nevi soke ppenel gia: ‘E mol purani si mai sukar.’