Lukas 4 - Nuevo Testamento Romané 2007

O llavolo zumavel e Jesuse

¹ O Jesus pperdo katar o Santo Duo, irisailo katar o Jordan, ta o Santo Duo inllarda le po pusto.

² Kote achilo saranda llive, ta o llavolo zumavela le. Ni jala niso gola llivesa, ta bokkailo.

³ Ondaka o llavolo ppenda leke: —Te san chachimaia o Chavo e Devleko, ppen gale barreke te cherdol marrno.

⁴ O Jesus ppenda leke: —Ando Pisipe ppenel: “Na samo e marnetar ka zivil o manus.”

⁵ Mapalal o llavolo inllarda le pe iek baro burdo, ta sikada leke sa e ppuvia e suetoke.

⁶ Ta ppenda leke: —Me ka dau tut sa gala ppuvia ta sa lengo barvalipe. Soke me liem sa gala ezgode ta daulen kake me mangava te daulen.

⁷ Te dea changa ta te blagosia man, sa ka avel chiro.

⁸ A o Jesus ppenda leke: —Llatar mandar, Satanas, soke ando Pisipe ppenel: ‘Blagosisar e Gazda cho Del, ta radisar samo leke.’

⁹ Mapalal o llavolo inllarda le ando Jerusalem, ttoda le upral po ttan mai vazdino katar o cher e Devleko ta ppenda leke: —Te san chachimaia o Chavo e Devleko, chude tut tele;

¹⁰ soke ando Pisipe ppenel gia: ‘O Del ka bichalel pe suechonen te arakken tut.

¹¹ Ka vazden tut pe vastenchar, te na eskombal cho porrno pe ni iek barr.’

¹² A o Jesus ppenda leke: —Ta i ando Pisipe ppenel gia: ‘Na ttou ando zumadipe e Gazda kai si cho Del.’

¹³ Ta sar o llavolo nasti ttoda e Jesuse ios ando zumadipe, llelotar letar nesavo vreme.

E Jesuseko rado llal angle ande Galilea

¹⁴ O Jesus irisailo ande Galilea pperdo katar e zor e Santone Duoki, ta dena leki orba ande sa e forura kai sea truial.

¹⁵ Sikavela ande kkanllira e judionengi katar suako rig ta sa blagosina le

O Jesus ando Nazaret

¹⁶ Ondaka o Jesus llelo ando Nazaret, kote kai barilo. Ando llive o sabado dia ando cher e Devleko, sar saia sikado, ta ttodape pe porrne te chitil e Devleke alava.

¹⁷ Die lete te chitil o lil katar o porauko o Isaias, ta kana putardale, malada kote kai ppenela gia:

¹⁸ O Duo e Devleko si upral pe mande, soke blagosisarda man te dau lache viaste e chorren; bichalda man te sastarau e llenen kai si lenge zalba ando lio, te ppenau e ppanglenge kai ka liken katar o ppandipe ta te cherau te dikken e korre; te ikanau e llenen katar o bilachipe kai nakken;

¹⁹ te ppenau o lacho vreme e Devleko kai avel.

²⁰ Ondaka o Jesus ppangla e Devleke alava, dialen kai o lleno kai pomozil ando cher e Devleko ta beslo. Sar sa e llene dikkena pe lete,

²¹ vou dia lenge orba ta ppenda: —Isto allive cherdilo so si pisime angla tumende.

²² Saurre dena lache orbe e Jesuseke, ta saia lenge chudo katar e sukar alava kai ppenela lenge. Ta puchena pe: —¿Inai gava o chavo e Joseeko?

²³ O Jesus ppenda lenge: —Akana tumen ka ppenen mange so ppenen but llene: “Doktori, sastar isto tu tut.” Ta ka ppenen mange: “So asundam kai cherdan ando Kafernaum cherle i kate isto ande chi ppuv.”

²⁴ Ondaka pale dia orba ta ppenda lenge: —Chachimaia ppenau tumenge, kai ni iekke poraukoia inai lea pachivale isto ande leki ppuv.

²⁵ Chachimaia ppenau tumenge kai sea but ppivlia ando foro o Israel kana o porauko o Elias saia llundo, kana ni dia peke trin burr ta dopas saia but bok ande sa o foro,

²⁶ a o Elias ni saia bichaldo kai ni iek katar gola ppivle kai zivina ando Israel, a pomozisarda iekka kai zivila ande Serepta, pasa o foro o Sidon.

²⁷ Ta i ando Israel sea but nasuale katar e lepra kana o porauko o Elias saia llundo, a ni iek lendar ni avila sastardo, samo o Naaman, kai saia katar e Siria.

²⁸ Kana asunde gala ezgode sa e llene kai sea ando cher e Devleko jolaile but.

²⁹ Ustile ta chudie e Jesuse avri katar o foro, ta inllarde le llik upre po burdo kote kai saia o foro te chuden le tele.

³⁰ A o Jesus nakklo maskar lende ta llelotar.

Iek manus kai ande le saia o llavolo

³¹ Ondaka o Jesus llelo ando Kafernaum, iek foro katar e Galilea, ta kote ttodape te sikavel e llenen ando llive o sabado.

³² Ta e llene chudinape sar sikavela len, soke dela lenge orba gazdarimaia.

³³ Ande kkanlliri e judionengi saia iek manus kai saia ande le iek duo bilacho kai urkisarda ta ppenda:

³⁴ —¡Muk amen! ¿Soke amito amenchar, Jesus katar o Nazaret? ¿Ave te zatri amen? Me pinllarau tut, ta llanau kai san o Santo e Devleko.

³⁵ O Jesus dia po duo bilacho ta ppenda leke: —¡Achi, ta muk gale manuse! Ondaka o duo bilacho chudia e manuse pe ppuv angla lende, ta likisto letar ta ni cherda leke nisavo bilachipe.

³⁶ Sa daraile, ta ppenena iek avereke: —¿Save alava si gala? Gava manus del orba gazdarimaia ta zoriaia e bilache duonenge, ¡ta e duura llantar!

³⁷ Ta lleli e Jesuseki viasta pe suako rig katar gola forura.

O Jesus sastarel sasuia katar o Simon Pedro

³⁸ O Jesus likisto katar e kkanlliri e judionengi ta dia ando cher e Simonoko. Ta e sasui e Simonoki ppabola but nasualimatar ta mangena letar te sastarel la.

³⁹ O Jesus bangilo late ta ppenda nasualimake te llaltar, ta o nasualipe liape latar. Isto kote voi ustili ta ttoda te radil leke.

O Jesus sastarel bute nasualen

⁴⁰ Kana peli e riat sa e llene kai saia le nasuale katar suako nasualipe, inllarde len kai o Jesus; ta vou ttoda pe va pe suako iek lendar, ta gia sastarda len.

⁴¹ Katar but nasuale likiste duura bilache, kai urkina ta ppenena: —¡Tu san o Chavo e Devleko! A o Jesus dia pe duura bilache ta ni mukela len te ppenen niso, soke llanena kai vou saia o Kristo.

O Jesus del orba ande Galilea

⁴² Ttiarinako, o Jesus likisto avri katar o foro, pe iek rig korkorre. A e llene rodie le, ta avile kote kai saia vou. Mangena te achaven le, te na llaltar,

⁴³ a o Jesus ppenda lenge: —Morabi te inllarau e viasta katar e charoina Devleki i ande ogola forura, soke goleke sem bichaldo.

⁴⁴ Ta gia llala o Jesus ta ppenela e lachi viasta ande kkanllira e judionenge katar e ppuv e Galileaki.