Lukas 24 - Nuevo Testamento Romané 2007

O Jesus ustel katar o meripe

¹ A o purvo llive katar e efta irisaile kai o limori but rano, ta inllarena e Merisura kai cherdea.

² Kana avile, dikkle o barr kai ni saia pe po ttan;

³ ta die andre, a ni malade e esnaga e Jesuseki.

⁴ Ni llanena so ka cheren. Ta dikkle duie llenen pe porrne pasa lende, ta lenge patave kai klichina.

⁵ E diskinie gia daraile kai die changa ta lengo chikat dodisarda e ppuv; a gola dui llene ppende lenge: —¿Soke tumen roden maskar e mule gole kai si llundo?

⁶ Inai kate, vou ustilo katar o meripe. Den tumen golli so ppenda tumenge kana saia ande Galilea:

⁷ kai o Chavo e manuseko ka avel dino ande va e bilachenge, kai ka mundaren le ta kai pala e trin llive ka ustel katar o meripe.

⁸ Ondaka von die pe golli katar so ppenda lenge o Jesus,

⁹ ta kana irisaile kotar ppende sa e desuiekke apostolenge ta sa ogolenge.

¹⁰ Gola kai inllarde e viasta e apostolenge sea e Maria Magdalena, e Juana, e Maria e dei e Santiagoki, ta ogola diskinie,

¹¹ A e apostolura mislina kai so ppenena saia dilipe, ta ni kamena te pachan len.

¹² A o Pedro llelo prastindo kai o limori; ta kana dikkla andre, dikkla samo o chiti. Ondaka irisailo chere, ta chudisailo katar gala ezgode kai nakkle.

Po drom kai llal karing o Emaus

¹³ Isto gua llive, dui katar e disipulura llana karing o Emaus, des kilometrura katar o Jerusalem.

¹⁴ Dena orba katar sa so avilape.

¹⁵ Ta kana dena orba, isto o Jesus avilo pasa lende ta ppirda lenchar.

¹⁶ A makar dikkena le, vareso ni mukela te llanen ko saia vou.

¹⁷ O Jesus puchla len: —¿Savi orba si tumen e dromea? Zalbaia achile,

¹⁸ ta iek lendar, kai ikkardola Kleofas, ppenda leke: —¿Samo tu san ando Jerusalem kai ni llanel so avilape kote ande gala llivesa?

¹⁹ Vou puchla len: —¿So avilape? Von ppende leke: —So nakkla o Jesus katar o Nazaret, kai saia iek porauko zuralo ande so cherela ta ande so ppenela angla o Del ta angla sa o foro;

²⁰ ta sar e gazda e zakonoke ta amare sudura chinde leke pe kris te krustosaren le ta te merel.

²¹ A amen uzdisailam kai vou ka mukliarel e foro katar o Israel. A cherel trin llive kai sa gala ezgode nakkle.

²² A nesave diskinie kai si amenchar darade amen, soke llelea ttiarinako rano kai o limori,

²³ ta sar ni malade e esnaga, irisaile chere. Ta ppenen kai iek suechura avile lende ta ppende lenge kai o Jesus zivil.

²⁴ Nasave llene amare llele mapalal kai o limori ta malade isto gia sar ppendea e diskinie, a e Jesuse ni dikkle le.

²⁵ Ondaka o Jesus ppenda lenge: —¡Inai tumen bizaipe ta gia poloke pachan ande sa so ppende e poraukura!

²⁶ ¿A ni saia te nakkel gala ezgode o Mesias ta mapalal te avel blagosime ando miloso?

²⁷ Mapalal ppenda lenge sa so ppenena letar e alava e Devleke, katar o Moises llik kai sa e poraukura.

²⁸ Kana avile ando foro kai llana, o Jesus cherda sargo kana llala ios e dromea.

²⁹ A von pe zor cherde le te achel, ta ppende leke: —Achi amenchar, soke nakkle but saiata. Ta lel te perel e riat. O Jesus dia andre, te achel lenchar.

³⁰ Kana besle pe sinia, lia ande pe va o marrno, dia fala e Devle, ta diale lende

³¹ Ondaka putaile lenge akka ta llangle kai saia o Jesus; a vou sumbisailo.

³² Ta ppende iek avereke: —¿Ni ppabola amaro lio kana dela amenge orba e dromea ta kana sikavela amenge so ppenel ando Pisipe?

³³ Ni aduricharde ios ta irisaile ando Jerusalem, ta malade e desuiekke apostolonen ta ogole llenen kai sea lenchar,

³⁴ kai ppende lenge: —De istina o Gazda ustilo katar o meripe, ta sikadilo e Simonoke.

³⁵ Ondaka von ppende so nakkle e dromea, ta sar llangle kai saia o Jesus kana ppagla o marrno.

O Jesus sikadol e disipulonenge

³⁶ Von dena orba katar gola ezgode, kana o Jesus ttoda pe po maskaral lendar ta ppenda lenge: —Pas tumenge.

³⁷ Von daraile but, soke mislina kai iavilape.

³⁸ A o Jesus ppenda lenge: —¿Soke daran? ¿Soke inai tumen pachape ande tumare lie?

³⁹ dikken pe me va ta pe me porrne. Isto me sem. Dodisaren man ta dikken: iek duo inai le mas ni kokala, sa tumen dikken kai si man.

⁴⁰ Kana ppenda gua, sikada lenge pe va ta pe porrne.

⁴¹ A sar von ni pachana, katar e veselia ta o chudo kai saia lenge, o Jesus puchla len: —¿Si tumen kate vareso te jalpe?

⁴² Von ppende leke iek kotor macho peko,

⁴³ vou liale ta jalale angla lende.

⁴⁴ Mapalal ppenda lenge: —So avilape manchar si so ppenava tumenge kana sema tumenchar: kai saia te cherdol sa so si pisime mandar ando zakono e Moiseseko, ando pisipe e poraukonengo ta ande salmura.

⁴⁵ Ondaka cherda te acharen e alava e Devleke,

⁴⁶ ta ppenda lenge: —Pisime si kai o Mesias saia te merel, ta kai saia te ustel katar o meripe pala e trin llive,

⁴⁷ ta kai ande leko anau ka ppendol pe sa e suetoke te irinpe kai o Del, te prostil lengo bilachipe. Katar o Jerusalem ta kotar angle,

⁴⁸ tumen morabi te ppenen gala ezgode.

⁴⁹ Ta me ka bichalau pe tumende so ppenda tumenge mo Dad. A tumen ka achen kate ando foro katar o Jerusalem, lligo ni ka len e zor kai avel katar o miloso.

O Jesus llal upre ando miloso

⁵⁰ Mapalal o Jesus inllarda len avri katar o foro, llik ande betania, ta pe vastenchar upre blagosisarda len.

⁵¹ Ta kana blagosila len, durilo lendar ta avilo inllardo ando miloso.

⁵² Blagosisarde le ta mapalal, irisaile ando Jerusalem but vesele.

⁵³ Ta von sea sa o vreme ando cher e Devleko, ta blagosina e Devle.