Lukas 22 - Nuevo Testamento Romané 2007

Sar ppangle e Jesuse

¹ Saia pase e eslava kai jalpe o marrno kai inai le levadura, e eslava e Paskuaki.

² E gazda e poponenge ta e kovacha e zakonoke, darana katar e llene, ta rodena sar ka mundaren e Jesuse.

³ Ondaka o Satanas dia ando Judas, iek katar e desudui disipulura kai ppenena leke Iskariote.

⁴ Vou llelo kai e gazda e poponenge ta kai e llene kai arakkena o cher e Devleko, te achel lenchar pe orba te sai ppukavel e Jesuse.

⁵ Von veselisaile ta diele po alau kai ka den le love e Judase.

⁶ Ta vou mangla ta ttodape te rodel o vreme, kana ni ka aven llene, te del lende e Jesuse.

E sinia e Gazdaki

⁷ O llive katar e eslava kana jalape o marrno kai inai le levadura, kana mundardola o bakro e Paskuako.

⁸ O Jesus bichalda e Pedro ta e Juane, ta ppenda lenge: —Llan te lacharen e sinia e Paskuaki.

⁹ Von puchle le: —¿Kai mange te ttova e sinia?

¹⁰ O Jesus ppenda lenge: —Kana tumen ka den ando foro, ka malaven iekke muruse kai inllarel iek bardako e paieke. Llan pala le llik ando cher kai ka del,

¹¹ ta ppenen e lleneke katar o cher: ‘O Gazda puchel: ¿Savi si e soba kai ka jau me disipulonenchar o jape e Paskuako?’

¹² Vou ka sikavel tumenge iek soba bari kai si upre ando cher ta lachardi e jamake. Cheren kote so trubul.

¹³ Von llele ta malade isto sar ppendaia lenge o Jesus, ta cherde o jape katar e Paskua.

¹⁴ Kana avilo o vreme, o Jesus ta e apostolura besle pe sinia.

¹⁵ O Jesus ppenda lenge: —¡Gia zeliva te cherau tumenchar gava jape e Paskuako mai anglal katar mo meripe!

¹⁶ Soke ppenau tumenge kai ni ka cherau le pala lligo ni ka cherdol ande charoina e Devleki.

¹⁷ Ondaka lia ande pe va o taso dia fala e Devle, ta ppenda: Len gava ta fulaven le maskar tumende;

¹⁸ soke ppenau tumenge kai ni ka piau pale katar so del e drak, lligo ni ka avel e charoina e Devleki.

¹⁹ Mapalal lia ande pe va o marrno dia fala e Devle, ppagla le diale lende ta ppenda: —Gava si mi esnaga, dini pala tumende. Cheren gava ande mo anau.

²⁰ Kana jale pale cherda isto gua e tasoia, ta ppenda: —Gava taso si o nevo alau chachardo me ratea, rat kai chordol pala tumende.

²¹ A akana mo va ta o va goleko kai ka pukkavel man, si upral pe sinia.

²² Chachimaia o Chavo e manuseko ka ppirel po drom kai si lake chinado, a ¡tesko goleke kai ka ppukavel le!

²³ Ondaka ttode te puchen iek avere ko si gua kai ka ppukavel.

Ko si o mai baro

²⁴ E disipulura denape orba ta mangena te llanen ko si mai baro lendar.

²⁵ O Jesus ppenda lenge: “Maskar e llene kai ni pachan, e charura gazdarin silnomaia pe llene kai zivin ande gola ppuvia, ta e llenenge kai gazdarin ppenen e llenenge kai von si lache lenchar.

²⁶ Tumen morabi te na aven gia. Soke o mai baro maskar tumende si te cherdol sargo o mai terno, ta gua kai gazdaril si te cherdol sargo gua kai radil tumenge.

²⁷ Soke ¿ko si o mai baro, gua kai besel pe sinia te jal o gua kai ttovel o jape angla lete? ¿Inai mai baro gua kai besel? A me sem maskar tumende sargo o lleno kai radil tumenge.

²⁸ “Tumen sena manchar suako drom ande mo zumadipe.

²⁹ Goleke, me dau tumen iek charoina, gia sar mo Dad diale la mange,

³⁰ ta tumen ka jan ta ka pien pe mi sinia ande mi charoina, ta ka besen pe tronura barimake te chinen e kris pe desudui viche katar o Israel.”

O Jesus ppenel kai o Pedro ni ka pinllarel le

³¹ Ta i ppenda o Gazda: —Pedro, Pedro, o llavolo mangla tumen te chinol tumen sargo kana tumen sena lliu;

³² a me manglem pala tu, te avel tut pachape. A tu kana ka iri tut mande, pomozisar che pplalen te na jasaren po pachape.

³³ O Pedro ppenda leke: —Gazda, te si te llau tuia ande rubie, ta i te merau tuia ka merau.

³⁴ O Jesus ppenda leke: —Pedro, ppenau chuke kai isto allive, mai anglal te basel o basno, tu ka ppene trin droma kai ni pinllare man.

Avel o zumadipe

³⁵ Mapalal o Jesus puchla len: —Kana bichaldem tumen bi lovenchar bi jamaia ta bi minienchar ¿trubusarda tumen vareso? Von ppende: —Niso.

³⁶ Ondaka ppenda lenge: —A akana, ka si love, te anel len, ta te anel i jape; ta gole kai inai le jarni, te bichinel po gertachi ta te chinel peke iek.

³⁷ Soke ppenau tumenge kai si te cherdol manchar so ppenel o Pisipe: ‘Ta saia llindo sargo iek bilacho manus.’ Soke sa so si pisime mandar, si te cherdol.

³⁸ Ondaka von ppende: —Gazda, kate si dui jarnia. A vou ppenda: —Na de orba ios.

O Jesus molilpe po Getsemani

³⁹ Mapalal o Jesus likisto kotar ta llelo po burdo e Maslinkengo sar cherela suako drom; ta e disipulura llele pala le.

⁴⁰ Kana avilo kote, ppenda lenge: —Molintumen, te na peren ando zumadipe.

⁴¹ O Jesus durilo lendar, ta dia changa te molilpe.

⁴² Ta ppenda: “Dade, te kamea, na muk te nakkau gaia patnia, a mai lache si te cherdol chiri volia a na murni.”

⁴³ Ondaka avilo lete iek suecho e milosoko, te del le zor.

⁴⁴ Ande leki bari patnia, o Jesus molilape ios mai but, ta leko esniovo perela pe ppuv sargo rat.

⁴⁵ Kana ustilo katar po molipe, ta irisailo kai e disipulura, malada len kai sovena, chinie katar e zalba.

⁴⁶ O Jesus ppenda lenge: —¿Soke soven? Usten ta molintumen, te na peren ando zumadipe.

Ppanden e Jesuse

⁴⁷ O Jesus dela orba, kana avile but llene. Gua kai ikkardola Judas, kai saia iek katar e disipulura, llala angla lende. Avilo pasa o Jesus te chumidel le,

⁴⁸ A o Jesus ppenda leke: —Judas, ¿ande iek chumidipe pukkave e chave e manuseke?

⁴⁹ E llene kai sea e Jesusea, kana dikkle so llalape kote, puchle le: —Gazda, ¿ka chalava len e jarnienchar?

⁵⁰ Ta iek lendar chinda o kan o chacho katar o esluga e mai bare popoko.

⁵¹ O Jesus ppenda: —Muken len; dosta. Ta dodisarda e eslugako kan, ta sastarda le.

⁵² Mapalal ppenda e gazdenge katar e zakonura, e llenenge kai arakken o cher e Devleko ta e ppurenge, kai avilea te inllaren le: —¿Soke avilen jarnienchar ta kastenchar sargo kana me sema iek kochkari?

⁵³ Suako llive sema tumenchar ando cher e Devleko, ta ni ppanglan man. A akana si tumaro vreme, o vreme kana gazdaril o truñariko.

O Pedro ppenel kai ni pinllarel e Jesuse

⁵⁴ Ppangle e Jesuse ta inllarde le ando cher e mai bare popoko. O Pedro llala pala lende duratar.

⁵⁵ Kote, po dopas katar e barr e chereki, cherdea iag, ta e llene beslea truial; ta i o Pedro beslo lenchar.

⁵⁶ Avilo iek esluga diskinia, ta kana dikkla le kai besela pasa e iag, dikkla ios pe lete ta ppenda: —I gava saia lea.

⁵⁷ A o Pedro ppenda: —Chei, me ni pinllarau le.

⁵⁸ Ni nakkla but kotar, ta aver lleno dikkla le ta ppenda: —I tu san iek lendar. O Pedro ppenda: —Iok, bre, me ni sem.

⁵⁹ Nakkla iek saiato ta aver lleno ppenda: —Cachinaia i gava saia lea, soke vou si katar e Galilea.

⁶⁰ A vou ppenda: —Bre, me ni llanau savi orba de. Isto kote, kana o Pedro dela orba, baslo o basno.

⁶¹ Ondaka o Jesus boldinailo ta dikkla po Pedro, ta o Pedro diape golli kai o Jesus ppendaia leke: “Allive, mai anglal te basel o basno tu ka ppene trin droma kai ni pinllare man.”

⁶² Ta o Pedro llelotar kotar ta rovda but zalbaia.

Maren espurnia katar o Jesus

⁶³ E llene kai dikkena so cherel o Jesus marena letar espurnia ta chalavena le.

⁶⁴ Ucharena leke akka, ta puchena le. —¡Apogodisar ko chalada tut!

⁶⁵ Ta kusena le bute alavenchar.

Chinen kris e Jesuseke

⁶⁶ Kana peli e riat, chidinaile e ppure e Judionenge, e gazda e poponenge ta e kovacha e zakonoke, ta inllarde e Jesuse kai e kris. Kote puchle le:

⁶⁷ —Ppen amenge, ¿san tu o Mesias? Vou ppenda lenge: —Te ppenden tumenge kai ea, ni ka pachan man.

⁶⁸ Ta te puchlem tumen vareso, ni ka ppenen mange.

⁶⁹ A katar angle o Chavo e manuseko ka besel pe rig e chachi katar o Del o zuralo.

⁷⁰ Mapalal sa puchle le: —¿Tu san e Devleko Chavo? O Jesus ppenda lenge: —Isto tumen ppenden kai me sem.

⁷¹ Ondaka von ppende: —Ni trubul amen ios llene te asunen. Isto amen asundam le isto katar leko mui.