Lukas 21 - Nuevo Testamento Romané 2007

E love kai dia e ppivli chorri

¹ O Jesus dikkela sar e llene barvale ttovena love ande baulicha kote kai llan e love dine,

² ta i dikkla kai iek ppivli chorri ttovela dui tolaricha jarkune.

³ Ondaka ppenda: —Chachimaia ppenau tumenge kai gaia ppivli dia mai but neko sa e llene;

⁴ soke sa die katar so ni trubula len, a voi, ande po chorripe, dia sa so saia la te zivil.

O Jeus ppenel kai o cher e Devleko ka avel peradino

⁵ Nesave llene dena orba katar o cher e Devleko, katar o sukaripe katar leke barra ta katar e ezgode dine kai sea pe lende. O Jesus ppenda:

⁶ —Ka aven llivesa kai sa gava kai tumen dikken ni ka achel iek barr upral pe aver. Sa ka avel zatrime.

E ezgode kai nakkel e ppuv ka ppenen kai o son si pase.

⁷ Ondaka puchle le: —Kovachi, ¿kana ka aven gala ezgode ta save ezgode ka sikaven kai sa gava si pase te avelpe?

⁸ O Jesus ppenda: “Arakken tumen te na kojadon. Soke ka aven but llene kai ka ppenen kai sem me. Ta ka ppenen: ‘Me sem’ ta ‘akana si o vreme.’ Tumen morabi te na llan pala lende.

⁹ Ta kana ka asunen kai e ppuvia maren pe ta si burkania, na daran, soke gala ezgode trubul te nakken mai anglal; a ni ios ni ka avel o son.”

¹⁰ Ppenda lenge: “Iek charoina ka marelpe averiaia ta iek ppuv ka marelpe avere ppuviaia.

¹¹ E ppuv ka dermolpe but zurale, ka avel bok ta nasualipe pe suako rig, ta ando miloso ka dikkon bare ezgode darane.

¹² “A mai anglal, ka ttoven o va pe tumende ta ka roden te maren tumen. Ka chinen kris pe tumende ande kkanllira e judionenge, ka ttoven tumen ande rubie ta cheres ma ka inllaren tumen kai e charura ta kai e llene kai gazdarin.

¹³ Ta gia tumen ka den e orba chachi mandar.

¹⁴ Na mislin tumen so ka ppenen,

¹⁵ soke me ka dau tumen alava gia pperde bizaipe kai ni iek katar tumare dusmanura ni ka terpin len ta nasti ka ppenen kai tumen kojaven.

¹⁶ A ka ppukaven tumen isto tumare dada, tumare pplal, tumari familia ta tumare amale. Nesave tumendar ka aven mundarde,

¹⁷ ta sa o sueto ka murzil pe tumende pala mo anau;

¹⁸ a ni ka jasaol ni iek bal katar tumaro soro.

¹⁹ ¡Goleke morabi te aven zurale, te sai braduin tumen!

²⁰ “Kana ka dikken kai truial o Jerusalem si e boñikura, llanen kai oma ka avel peradini.

²¹ Ondaka, gola kai ka aven ande Judea, morabi te nasen pe burdura; a gola kai ka aven ando Jerusalem, morabi te liken katar o foro, ta gola kai ka aven ando vos, te na irinpe ando foro.

²² Soke gola llivesa ka aven patniake, ta ka cherdol sa so si pisime ando Pisipe.

²³ ¡Tesko gole diskinienge kai ande gola llivesa ka aven kkamne o ka avel len minone kai den len kolin! Soke ka avel but duk ande ppuv, ta iek patnia but bari gale foroke.

²⁴ Nesave ka aven mundarde e jarnienchar a averen ka inllaren len ppangle ppuv ppuviate; ta e llene kai inai judiura ka len peke o Jerusalem lligo ni ka getolpe o vreme kai si chinado e llenenge kai inai judiura.

O Chavo e manuseko irilpe

²⁵ “Ka dikkon bare ezgode ando kkam, ando chon ta ande cheraia; ta pe ppuv o sueto ni ka llanel so te cherel ta ka daran katar e mora ta e valura kai ka basen zurale.

²⁶ E llene ka baldinpe daratar kana ka mislinpe so ka avelpe e suetotar; soke llik e zor e milosoki ka izdral.

²⁷ Ondaka ka dikkol o Chavo e manuseko kai avel ande iek oblako bare zoriaia ta barimaia.

²⁸ Kana gala ezgode ka aven, den tumen zor ta dikken upre, soke but oma ka aven tumaro braduipe.”

²⁹ Ta i ppenda lenge gia: “dikken po kas e simochinengo, o pe varesavo aver kas.

³⁰ Kana dikken kai liken e patra, tumen acharen kai o milai si pase.

³¹ Isto gia, kana tumen ka dikken sa gala ezgode, ka llanen kai e charoina e Devleki si pase.

³² “Chachimaia ppenau tumenge kai sa gala ezgode ka avenpe bi te nakkel gaia vicha.

³³ O miloso ta e ppuv ni ka aven ios, a me alava si te cherdon.

³⁴ “Arakken tumen ta na muken te zuriaon tumare lie pala e ezgode bilache kai nasti mukenpe, pala o matipe ta e brige gale zivotoke, te na perel pe tumende gua llive kana tumen ni ka mislin

³⁵ sargo iek prevarka. Soke ka avel pe sa o sueto.

³⁶ Prezosaren, ta molintumen sa o vreme, te nasen katar sa gala ezgode kai ka avenpe ta te sai aven angla o Chavo e manuseko.”

³⁷ O Jesus sikavela ollivesea ando cher e Devleko, ta o riat achela po burdo kai ppenen leke katar e Maslinke.

³⁸ Ta sa e llene llana rano ando cher e Devleko.