Lukas 20 - Nuevo Testamento Romané 2007

O gazdaripe e Jesuseko

¹ Iek llive, kana o Jesus saia ando cher e Devleko ta sikavela e llenen ta ppenela e lachi viasta, avile e gazda e poponenge ta e kovacha e zakonoke, e ppurenchar,

² ta ppende lenge: —¿Save gazdarimaia chere gava? ¿Ko dia tut gua gazdaripe?

³ O Jesus ppenda lenge: —I me ka puchau tumen iek ezgoda. Ppenen mange:

⁴ ¿Ko bichalda e Juane te kristil, o Del o e manusa?

⁵ Von diepe orba maskar pete ta ppenena: “Te ppendam kai bichalda le o Del, vou ka ppenel: ‘¿Soke ni pachaien le?’

⁶ A nasti ppena kai bichalde le e manusa, soke sai mundaren amen e barrenchar soke sa e llene pachan kai o Juan saia iek porauko.”

⁷ Goleke von ppende kai ni llanena ko bichalda e Juane te kristil.

⁸ Ondaka o Jesus ppenda lenge: —Ni me ni ka ppenau tumenge save gazdarimaia cherau gava.

E paramichi katar e llene bilache kai radin e ppuv

⁹ Mapalal o Jesus dia orba e llenenge, ta ppenda gaia paramichi: “Iek manus ttoda te bariol e drak ande pi umal, chinadala iekke llenenge kai radin e ppuv ta llelotar but dur.

¹⁰ Kana avilo o vreme, bichalda iekke esluga te mangel katar e llene kai radina e ppuv o chari kai perela le katar e drak; a von marde le ta bichalde le chuche vastengo.

¹¹ Ondaka o gazda bichalda avere esluga. A i gole kusle le, chalade le ta bichalde le chuche vastengo.

¹² Bichalda avere, a e llene kai radin e ppuv i gole ranisarde le ta chudie le avri.

¹³ “O gazda e ppuviako ppenda: ‘¿So ka cherau? Ka bichalau me chave kai voliu. Le ka kanden.’

¹⁴ A kana e llene kai radin e ppuv dikkle le, ppende iek avereke: ‘Gava si o lleno kai ka achel leke sa gaia ppuv; mundara le ta gia e ppuv ka achel amenge.’

¹⁵ Ta ikande le katar e ppuv e drakkengi ta mundarde le. “¿A tumen so mislin kai ka cherel o gazda katar e ppuv e drakkengi?

¹⁶ Ka llal ta ka mundarel gole llenen kai radin e ppuv.” Kana asunde gua, ppende: —¡Gua ni ka avelpe nikada!

¹⁷ A o Jesus dikkla pe lende ta ppenda: —¿A soke ando Pisipe ppenel gia?: ‘O barr kai ni ttode leke sama e llene kai vazden chera cherdilo o barr mai preche. Gava cherda o Del, ta amen chudi amen.’

¹⁸ Vareko te perel pe gua barr, ka cherdol sa ande kotora; a o barr te perel upral pe varesavo lleno, ka cherel le prajo.

¹⁹ E gazda e poponenge ta e kovacha e zakonoke mangena te ppanden e Jesuse isto kote, soke acharde kai gole paramichaia dela orba lendar. A darana e llenendar.

Puchen e Jesuse katar e love kai denpe e foro

²⁰ Bichalde iekke llenen kai cherenape lache manusa, samo te cheren e Jesuse te kojadol ande pe alava ta gia te avel len varesavi dos te sai ttoven le ando va e lleneko kai gazdaril e romanonen.

²¹ Gala llene puchle le: —Kovachi, llana kai so ppene ta so sikave si o chachipe, ta kai ni rode te ave lenge drago. Tu sikave chachimaia o drom e Devleko.

²² ¿Si sukar te da amare love kai o lleno kai gazdaril pe romanura, o iok?

²³ A o Jesus, sar pinllerela lengo kojaipe, ppenda lenge:

²⁴ —Sikaven mange iek tolari. ¿Kako si o mui ta kako anau si pisime po tolari? Von ppende: —E Sesareko.

²⁵ O Jesus ppenda lenge: —Den e Sesare so si e Sesareko, ta den e Devle so si e Devleko.

²⁶ Ta ande sa so vou ppenda angla e llene ni malade ni iek dos te sai ppanden le, ta chudisaile letar ta ni ppende niso.

Puchen sar ka avel kana e manusa ka usten katar o meripe

²⁷ Mapalal nesave saduseura llele te dikken e Jesuse. E saduseura ni pachan kai e manusa ka usten katar o meripe; goleke ppende leke gia:

²⁸ —Kovachi, o Moises mukla amenge pisime kai kana iek murus zinime merel ta ni avile le minone pe romiaia, o pplal gole lleneko kai mulo morabi te zinilpe e ppivliaia te del minonen pe pplale kai mulo.

²⁹ Ondaka e saduseura ppende gia e Jesuseke: sea efta pplal, o purvo lendar zinisailo, ta mulo ta ni mukla porodo.

³⁰ O duito

³¹ ta i o trito zinisaile laia, ta i ogola zinisaile laia, a e li efta mule ta ni avila le porodo.

³² Mapalal muli i e romi.

³³ Kana ka usten katar o meripe, ¿save pplaleki romi ka avel voi, kana e efta sea zinime laia?

³⁴ O Jesus ppenda lenge: —Ande gava zivoto, e murusa ta e diskinia zininpe;

³⁵ a gola kai o Del ka chinavel lenge te usten katar o meripe, ta kana ka avel gua vreme avena murusa o diskinie, ni ka zininpe ios

³⁶ ta ni ka meren. Soke von ka aven sargo e suechura, ta ka aven chave e Devleke soke ustile katar o meripe.

³⁷ Isto o Moises, kana pisisarda katar e karrne kai ppabona, ppenel amenge kai e mule ka usten katar o meripe. Kote ppenel kai o Gazda si o Del katar o Abraam, katar o Isaak ta i katar o Jakob.

³⁸ ¡Ta vou inai Del e mulengo, vou si Del e llundengo, soke e Devleke saurre si llunde!

³⁹ Ondaka nesave kovacha e zakonoke ppende: —Sukar ppendan, kovachi.

⁴⁰ Ta ni tromana te puchen le niso ios.

¿Katar savi vicha si o Mesias?

⁴¹ O Jesus puchla len: —¿Soke ppenen kai o Mesias avel katar e vicha e Davideki?

⁴² A isto o David, ande Salmura, ppenel: ‘O Gazda ppenda me Gazdake: Bes pe mi chachi,

⁴³ lligo ni ka ttovau che dusmanonen telal tala che porrne’.

⁴⁴ ¿Sar ka avel o Mesias katar e vicha e Davideki kana isto o David ikkarel le Gazda?

O Jesus ppukavel e kovachen katar o zakono

⁴⁵ Sa e llene asunena, ta o Jesus ppenda pe disipulonenge:

⁴⁶ “Arakken tumen katar e kovacha e zakonoke, soke drago lenge te ttoven pe pete e bare fistanura, ta mangen te den lenchar orba liubaimaia kana llan ando foro. Roden e estoliche mai barikane ande kkanllira e judionenge ta e mai lache ttana kana si varesavo jape;

⁴⁷ ta len katar e ppivlia so si len, ta te na llanel le niko molinpe but. Von ka len mai bari duk.”