Lukas 2 - Nuevo Testamento Romané 2007

Sar biandilo o Jesus

¹ Ande gola llivesa o charo o Augusto bichalda te llinen sa e manusen.

² Gava purvo llindipe cherdele kana o Sirenio gazdarila ande Siria.

³ Sa e llene saia te llantar isto ande pe forura te llinen len.

⁴ Goleke o Jose likisto katar o foro o Nazaret, kai achel ande Galilea ta llelo ande Judea, ando foro o Belen kote kai biandiloia o David, soke o Jose saia katar e vicha e Davideki.

⁵ Llelo ando Belen pe romiaia e Mariaia te llinen le.

⁶ Ta kana sea ando Belen, avilo o vreme te maladol e Mariake.

⁷ Kote maladilo lako purvo minono, ta ulisarda le ande pelene ta inzarda le andre ando cher kote kai ttovena e bakren soke ni saia kai te nakken e riat

E suechura ta e chobanura

⁸ Kotar pase sea nesave chobanura kai nakkena e riat ando vos ta arakkena pe bakren.

⁹ Ta sikadilo lenge iek suecho e Devleko, ta o blagosipe e Devleko klichisarda truial lende; ta daraile but.

¹⁰ A o suecho ppenda lenge: —Na daran soke anau tumenge iek lachi viasta, kai ka anel but veselia saurrenge:

¹¹ Allive biandilo ando foro e Davideko iek Braduimari, kai si o Kristo, o Gazda.

¹² Ka malaven e minone pachardo ande pelene, inzardo kote kai ttoven e bakren, kote ka llanen kai vou si.

¹³ Ondaka sikadile but suechura katar o miloso, kai blagosina e Devle ta ppenena:

¹⁴ Blagosime o Del ando miloso ¡ta pas e llenenge kai o Del volil!

¹⁵ Kana e suechura irisaile ando miloso, e chobanura ttode te ppenen iek avereke: —Aven ando Belen te dikka gaia ezgoda kai o Gazda ppenda amenge kai si te avelpe.

¹⁶ Sigarde ta malade e Maria ta e Josee ta e minone inzardo kote kai guruvena e bakren.

¹⁷ Kana dikkle le, ppende so ppenda lenge o suecho katar o minono,

¹⁸ ta sa gola kai asunde e chobanonen chudisaile katar so ppenena.

¹⁹ A e Maria chudisali but, ta suako llive mislilape ande goia ezgoda.

²⁰ E chobanura irisaile ta blagosina e Devle pala sa so asunde ta so dikkle, soke sa e ezgode nakkle isto gia sar ppendilo lenge.

O minono o Jesus sikaven le ando cher e Devleko

²¹ Pala e ojto llive cherde leke e sirkunsision ta ttode leko anau Jesus, isto gua anau kai ppendaia lake o suecho kana voi ni saia kkamni.

²² Kana nakkle e llivesa kai von saia te chistonpe prema o zakono e Moiseseko, inllarde e minone ando Israel te sikaven le e Devleke.

²³ Von cherde gava soke ando zakono e Devleko si pisime kai o “purvo murus kai biandola ka avel chinado e Devleke.”

²⁴ Llele te cheren iek kurbano sar ppenel o zakono e Devleko: dui tortole o dui gulubura.

²⁵ Ande gola llivesa saia ando Jerusalem iek lleno kai ikkardola Simeon. Vou saia iek manus but lacho, kai blagosila e Devle ta aduricharela te avel braduime o Israel. O Santo Duo saia lea,

²⁶ ta ppendaia leke kai ni ka resel kai o meripe lligo ni ka dikkel e Kristo, gole kai o Gazda saia te bichalel.

²⁷ O Santo Duo cherda le te llal ando cher e Devleko; ta kana e dada katar o minono Jesus die ando cher e Devleko te cheren lea sar ppenela o zakono,

²⁸ O Simeon istarda le ande pe va blagosisarda e Devle ta ppenda:

²⁹ Akana, Gazda, cherdilo so ppendan, sai muke man te merau ande pas:

³⁰ Soke dikklem me akkenchar e manuse kai ka braduil amen

³¹ gole kai tu bichaldan ta sa e forura ka dikken le,

³² vou si o villelo kai si te kletosarel po sueto, ta ka avel o baripe katar o Israel.

³³ O Jose ta e Maria chudisaile katar so ppenda o Simeon e minonetar.

³⁴ Ondaka o Simeon blagosisarda len, ta ppenda e Mariake e dei e Jesuseki: —Gale minoneke si chinado te cherel te peren o te usten bute llenen ando Israel. Vou ka avel iek señal kai but llene ni ka mangen,

³⁵ ta gia ka llangliolpe so mislinpe suako lleno ande po lio.

³⁶ I kote saia iek porauka kai ikkardola Ana, lako dad saia o Penuel katar e vicha e Asereki. Voi saia but ppuri ta zinisalia but terni, ta zivisarda pala po rom efta burs;

³⁷ cherena ojtovardes ta star burs kai achilia ppivli. Ni likela katar o cher e Devleko soke radila ollivesea ta i o riat e Devleke, allunina ta molilape.

³⁸ E Ana avili isto ondaka, dia fala e Devle ta lia te del orba katar o Jesus sa e llenenge kai aduricharena te avel braduime o Jerusalem.

Kana irisaile ando Nazaret

³⁹ Ondaka kana cherde sa so ppenel o zakono e Gazdako, irisaile ande Galilea, kai po foro o Nazaret.

⁴⁰ Ta o minono bariola ta cherdola mai zuralo, ta saia but bizai ta o Del blagosila le.

O minono Jesus malaven le ando cher e Devleko

⁴¹ Leke dada llana suako burs ando Jerusalem kana saia e eslava e Paskuaki.

⁴² Kana o Jesus reslo kai e desudui burs, sa llele pe goia eslava ando Jerusalem sar sea sikade.

⁴³ A kana nakkle gola llivesa, von irisaile kai po cher, a o minono Jesus achilo ando Jerusalem, a leke dada ni ttode sama.

⁴⁴ Mislina kai o Jesus avela maskar sa e llene, ta gia ppirde sorro llive; a kana rodie le maskar pi familia ta maskar pe pinllarde,

⁴⁵ ni malade le. Ondaka irisaile ando Jerusalem te roden le kote.

⁴⁶ Nakkle trin llive kotar ta malade le ando cher e Devleko, besindo maskar e kovacha e zakonoke, asunela len ta puchela len.

⁴⁷ Ta sa gola kai asunena le chudinape katar leko bizaipe ta katar so ppenela lenge.

⁴⁸ Kana dikkle le leke dada, chudisaile ta leki dei ppenda leke: —Chaurrea, ¿soke cherdan amenge gava? Cho dad ta me saia amenge but briga ta rodaia tut.

⁴⁹ Ondaka o Jesus ppenda lenge: —¿Soke rodena man? ¿Ni llanen kai si te avau ando cher me Dadeko?

⁵⁰ A von ni acharde so ppenela lenge.

⁵¹ Ondaka irisailo lenchar ando Nazaret, ta cherela sa so ppenena leke. A leki dei mislilape ande sa gala ezgode kai nakklela.

⁵² A o Jesus bariola ios ande esnaga ta i ando bizaipe, ta blagosila le o Del ta i e manusa.