Lukas 19 - Nuevo Testamento Romané 2007

O Jesus ta o Sakeo

¹ O Jesus dia ando Jeriko ta ppirda maskar o foro.

² Kote zivila iek lleno barvalo kai ikkardola Sakeo, vou saia gazda katar e publikanura.

³ Mangela te pinllarel e Jesuse, ta nasti dikkela le soke sea but llene, ta e Sakeoki esnaga saia minoni.

⁴ Goleke prastio angle ta, te dikkel le, ta likisto pe iek kas kai saia pase katar saia te nakkel o Jesus.

⁵ Kana o Jesus nakklo kotar, dikkla upre ta ppenda leke: —Sakeo, fulie oma, soke allive ka achau ande cho cher.

⁶ O Sakeo fulisto oma ta veselimaia avilo pachivalo e Jesusea ande po cher.

⁷ Kana dikkle gua, sa die e Jesuseke orbe, ta ppenena kai llelo te achel ando cher iekke bilacheko.

⁸ Ondaka o Sakeo ustilo ta ppenda e Gazdake: —Gazda, ka dau e chorren dopas katar sa so si man; ta te chordem vareka, ka iriu leke star droma mai but.

⁹ O Jesus ppenda: —Allive avilo o braduipe ande gava cher, soke i gava lleno si katar e vicha e Abraameki.

¹⁰ Soke o Chavo e manuseko avilo te rodel ta te braduil so jasailoa.

E paramichi katar e love

¹¹ E llene asunena sar o Jesus ppenela gala alava, ta vou ppenda lenge iek paramichi, soke ia saia pasa o Jerusalem ta von mislina kai e charoina e Devleki ka avel isto ondaka.

¹² Ppenda lenge: “Saia iek lleno kai saia katar e vicha e charonengi, kai llelotar dur ande aver foro, te cheren le charo ta te irilpe.

¹³ Ta kana llalatar, ikkarda desen katar leke esluge, ta ppende lenge: ‘Radisaren gale lovenchar lligo ni ka iriuman.’

¹⁴ A e llene katar leki ppuv murzina pe lete, ta bichalde pala le nesave llenen te ppenen: ‘Ni kamam gava lleno te avel amaro charo.’

¹⁵ “A gole llene cherde le charo, ta irisailo kai pi ppuv. Kana avilo, ppenda te ikkaren e eslugen kai diaia lende e love te radin, te llanel pe gachin chari cherdaia suako iek.

¹⁶ O purvo avilo lete ta ppenda: ‘Gazda, che love cherden len des droma mai but.’

¹⁷ O charo ppenda leke: ‘But sukar, san iek lacho esluga; soke avilan chacho pe iek ezgoda gia minoni, Ka dau tut te gazdari pe des forura.’

¹⁸ Avilo i o gua esluga ta ppenda: ‘Gazda, che love cherdem len panch droma mai but.’

¹⁹ Ta i goleke ppenda: ‘Ka gazdari pe panch forura.’

²⁰ “Ta avilo aver ta ppenda: ‘Gazda, etalen kate che love. Gurudem len ande iek dikklo;

²¹ soke darailem tutar, soke tu san iek lleno zuralo, kai le septelie kote kai ni chudian simiche ta chide o lliu kotar katar ni ttodan e simicha.’

²² Ondaka o charo ppenda leke: ‘Esluga bilacho, isto che alavenchar dosare tut. Llanea kai sem iek lleno silno, ta kai chidau katar ni diem ta kai ikanau o lliu kotar katar ni ttodem e simicha ande ppuv,

²³ ¿soke ni ttodan me love ando banko, ta gia diea tut chari kana me irisailema chere?’

²⁴ Ta ppenda e llenenge kai sea kote: ‘Len letar e love ta den le kai o lleno kai dobisarda des droma mai but.’

²⁵ Von ppende leke: ‘Gazda, ¡le ia si des droma mai but!’

²⁶ O Charo ppenda: ‘Ppenau tumenge kai gole kai si le, ka avel leke dino mai but; a gole kai inai le, i so si le ka avel letar ikando.

²⁷ A me dusmanura kai nikamena te avau lengo charo, anen len kate ta mundaren len angla ma.’ ”

O Jesus del ando Jerusalem

²⁸ O Jesus dia goia orba ta mapala llelo karing o Jerusalem.

²⁹ Kana aviloa pasa o Betfage, ta pasa e Betania pasa o burdo kai ikkardol e Maslinkengo, bichalda duien katar pe disipulura,

³⁰ ta ppenda lenge: —Llan kai e forichura kai si anglal, ta kana ka aven ka malaven iek magarcho ppanglo, kai niko ni likisto pe lete ni ios, Putaren le ta anen le.

³¹ A te puchla tumen vareko soke putaren le, ppenen leke kai trubul e Gazda.

³² E disipulura llele ta malade sa isto gia sar ppendaia lenge o Jesus.

³³ Kana putarena e magarcho, avile e gazda ta puchle len: —¿Soke putaren le?

³⁴ Von ppende: —Soke trubul e Gazda.

³⁵ Ttode pe gertacha po magarcho, inllarde le kai o Jesus ta pomozisarde e Jesuse te likel pe lete.

³⁶ Ta kana o Jesus llala, e llene buliarena pe gertacha po drom.

³⁷ Ta kana reslo kote kai o drom fuliel katar o burdo e Maslinkengo, sa e llene kai llana pala le urkisarde veselimatar ta blagosina e Devle pala e bare ezgode Devlikane kai von dikkle.

³⁸ Ta ppenena: —¡Blagosime o Charo kai avel ando anau e Devleko! ¡pas ando miloso ta blagosipe upre!

³⁹ Ondaka nesave fariseura kai sea maskar e llene puchle le: —Kovachi, de pe llene kai llan pala tu.

⁴⁰ A o Jesus ppenda lenge: —Ppenau tumenge kai gala llene te achen, e barra ka urkin.

⁴¹ Kana avilo pasa o Jerusalem, ta dikkla po foro, o Jesus rovda pala le,

⁴² ta ppenda: “¡Te achardana i tu allive so sai del tut pas! A akana gava si tutar gurudino ta nasti dikke le.

⁴³ Soke ka aven chuke llivesa bilache, kai che dusmanura ka cheren iek zido truial tutar, ta ka ttoven pe truial ta ka chalaven tut katar suako rig,

⁴⁴ ta ka zatrin tut chitavo. Ka mundaren e llenen kai zivin andre katar che zidura, ta ni ka muken barr upral po barr, soke ni acharden o vreme kana o Del avilo tumende.”

O Jesus chistol o cher e Devleko

⁴⁵ Mapalal, o Jesus dia ando cher e Devleko ta ttoda te tradel sa e llenen kai chinena ta bichinena andre,

⁴⁶ ta ppenda lenge: —Ando Pisipe ppenel gia: ‘Mo cher ka ikkardol cher e molimako’, a tumen cherden letar iek ttan kai gurudon e chorane.

⁴⁷ Suako llive o Jesus sikavela ando cher e Devleko, a e gazda e poponenge, e kovacha e zakonoke ta i e gazda e foroke rodena sar ka mundaren le.

⁴⁸ A ni malavena sar te cheren le, soke sa e llene prezona so ka ppenel o Jesus.