Lukas 18 - Nuevo Testamento Romané 2007

E paramichi katar e ppivli ta o krisari

¹ O Jesus ppenda lenge iek paramichi te sikavel len kai morabi te molinpe sa o vreme, ta te na jasaren pi zor.

² Ppenda lenge: “Ande iek foro saia iek krisari kai ni darala e Devletar ta ni saia le liubao e llenenchar.

³ Isto ande gua foro saia iek ppivli kai saia la iek chingar ta lleli kai gua krisari te mangel letar te chinel iek chachi kris pe lako dusmano.

⁴ Nakklo but vreme ta o krisari ni kamela te del laia orba, mapalal mislisailo: ‘Makar ni darau e Devletar ta ni dau liubao e llenen,

⁵ a sar gaia ppivli del man pe gachin joli, ka chinau laki kris te na joliavel man ios.’ ”

⁶ O Gazda ppenda: “Gua si so ppenda o bilacho krisari.

⁷ ¿A so mislin tumen kai o Del ni ka arakkel i pe llenen kai esvirisarda, kai mangen letar o riat ta ollivesea? ¿Ka mukel len te aduricharen?

⁸ Ppenau tumenge kai pomozil len oma. A kana ka avel o Chavo e manuseko, ¿ka malavel llenen pe ppuv kai si len pachape?”

E paramichi katar o fariseo ta o publikano

⁹ O Jesus dia orba nesave llenenchar kai saia len but vera ande pete soke mislina kai von si chache, ta ni ttovena sama nikake. Gale llenenge o Jesus ppenda gaia paramichi:

¹⁰ “Dui llene llele ando cher e Devleko te molinpe: Iek saia fariseo, a o gua saia publikano.

¹¹ O fariseo molilape pe porrne ta ppenela gia: ‘Ioi Devla, dau tut fala soke ni sem sargo ogola llene kai si chorane bilache ta llan avere romienchar, ta kai ni sem sargo gava publikano.

¹² Me alluniu dui droma ande efta llive ta dau tut des katar e stotina katar sa so lau.’

¹³ A o publikano achilo mai palal ta ni tromala ni te dikkel upre po miloso, a marelape ando kolin ta ppenela: ‘¡Ioi Devla, te avel chuke zalba mandar, kai sem iek bilacho!’

¹⁴ Ppenau tumenge kai gava lleno kai chidel love irisailo kai po cher llindo chacho, a o fariseo iok. Soke gua kai bariarel vou pe, ka avel ttodo ando lallao. A ko cherela vou pe mai minono, ka avel bariardo.”

O Jesus blagosil e minonen

¹⁵ Anena kai o Jesus i minonen te ttovel pe va pe lende; a kana e disipulura dikkle, die pe llene kai anena e minonen.

¹⁶ Ondaka o Jesus ikkarda len ta ppenda lenge: —Muken te aven mande e minone ta na achaven len, soke e charoina e Devleki si golengi kai si sargo von.

¹⁷ Chachimaia ppenau tumenge kai kogo ni lela e charoina e Devleki sargo iek minono, ni ka del andre.

Iek lleno barvalo del orba e Jesusea

¹⁸ Iek katar e gazda puchla e Jesuse: —Kovachi lachea, ¿so morabi te cherau te lau o zivoto ostade?

¹⁹ O Jesus ppenda leke: —¿Soke ikkare man lacho? Samo iek si lacho, o Del.

²⁰ Tu llane e zakonura: ‘Na cher kurvaluko, na mundar, na chor, na ikan bune ta de liubao che dade ta che da.’

²¹ Gua lleno ppenda leke: —Sa gola ezgode cherdemlen sar kana sema ternorro.

²² Kana o asunda goia orba o Jesus ppenda leke: —Iek ezgoda trubul tut te chere: bichin sa so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.

²³ A kana gua lleno asunda goia orba, tristosailo but, soke saia but barvalo.

²⁴ Kana dikklale gia, o Jesus ppenda leke: —¡Gia trudno si e barvalenge te den ande charoina e Devleki!

²⁵ Mai lesno si iekke devake te nakkel katar e iak iekke suviaki, neko te del iek barvalo ande charoina e Devleki.

²⁶ E llene kai asunde le ppende: —¿A ko ka avel braduime?

²⁷ O Jesus ppenda lenge: —So e manusa nasti ka cheren nikada o Del sai cherel le.

²⁸ O Pedro ppenda leke: —Gazda, amen muklam sa amare ezgode ta llelam pala tu.

²⁹ Vou ppenda lenge: —Chachimaia ppenau tumenge kai varesavo lleno kai pala e charoina e Devleki mukela cher, o romia, o pplal, o dade ta dea, o chaurren,

³⁰ ka lel ios mai but ande gava zivoto, ta ando zivoto kai avel ka len o zivoto ostade.

O Jesus pale o trito ppenel kai ka merel

³¹ O Jesus ikkarda pe iek rig e disipulonen, ta ppende lenge. “Akana aven ando Jerusalem, kote kai si te cherdol sa so pisisarde e poraukura katar o Chavo e manuseko.

³² Ka den le kai e sudura romanura, ta ka maren letar espurnia, ka kusen le ta ka chungarden le.

³³ Ka chalaven le ta ka mundaren le; a pala e trin llive ka ustel katar o meripe.”

³⁴ Von ni acharde niso katar goia ezgoda, ta ni llanena katar so dela lenge orba, soke gola sea ezgode kai nasti acharena len.

O Jesus sastarel iekke korre ando Jeriko

³⁵ Kana o Jesus avela pasa o Jeriko, iek korro kai besela pasa o drom ta mangela esmola,

³⁶ kana asunda kai nakkena but llene, puchla so saia.

³⁷ Ppende leke kai o Jesus katar o Nazaret nakkela kotar,

³⁸ ondaka vou urkisarda: ¡Jesus, Chavo e Davideko te avel chuke zalba mandar!

³⁹ E llene kai llana anglal dena po korro te achel, a vou urkila ios mai zurale: —¡Chavo e Davideko, te avel chuke zalba mandar!

⁴⁰ O Jesus achilo ta ppenda te anen le lete. Kana avilo pase, puchla le:

⁴¹ —¿So mange te cherau pala tu? O korro ppenda: —Gazda, mangau te dikkau.

⁴² O Jesus ppenda leke: —¡Akana ka dikke! Pala cho pachape sastilan.

⁴³ Ondaka isto kote, o korro dikkla, ta llelo pala o Jesus ta blagosila e Devle. Ta sa e llene kai dikkle gua, i von blagosina e Devle.