Lukas 16 - Nuevo Testamento Romané 2007

E paramichi katar o esluga llanglo

¹ Ta i ppenda o Jesus pe disipulonenge: “Saia iek lleno barvalo kai saia le iek esluga; ta avile te ppenen leke kai o esluga zatrila leko barvalipe.

² Ondaka o gazda ikkarda le ta ppenda leke: ‘¿Soke ppenen mange gala orbe tutar? ppen mange katar cho rado, soke ia nasti ave ios mo esluga,’

³ O esluga mislisailo: ‘¿So ka cherau akana kai mo gazda mukel man bi radoia? Inai man zor te radiu ande ppuv, ta lallao mange te mangau esmola.

⁴ Ia llanau so ka cherau te avel man kate te llau kana ka achau bi radoko.’

⁵ Ondaka ikkarda iekke po iekke golen kai sea unllile leke gazdake. Puchla e purvo: ‘¿Pe gachin san unllile me gazdake?’

⁶ Gua lleno ppenda leke: ‘Sem leke unllile stotina burure zeitino.’ O esluga ppenda leke: ‘Etalo kate cho lil kai san leke unllile; bes oma ta pisisar kai san leke samo pinda.’

⁷ Mapalal puchla avere: ‘A tu, ¿pe gachin san leke unllile?’ Vou ppenda leke: ‘Stotina vreche lliu.’ O esluga ppenda leke: ‘Etalo kate cho lil kai san leke unllile; pisisar kai san leke samo ojtovardes.’

⁸ O gazda llangla kai o bilacho esluga saia bizai prema sar cherda e ezgode. Gua si soke kana o manus cherel pire bucha, e llene kai si e suetoke si mai bizai neko e llene kai si e villeloke.

⁹ “Ppenau tumenge te dobin amalen e kojamne barvalimaia kai si ande gava sueto, ta gia kana o barvalipe kojamno ni ka avel ios, ka avel tumen ko te lel tumen ande chera kai si ando miloso.

¹⁰ “Gua kai arakkel so si eftino, arakkel i so si kuch; a ko inai chacho pe so si eftino, inai chacho pe so si kuch.

¹¹ Te na avilen chache e barvalimaia kai si kojamni, ¿ko ka del tumende o chacho barvalipe?

¹² A te na avilen chache pe so si averengo, ¿ko ka del tumen so si tumaro?

¹³ “Ni iek esluga nasti radil duie gazdenge; soke ka murzil pe iek ta ka volil ogole, o ka kandel iekke a ogoleke ni ka ttovel sama. Nasti radilpe e Devleke ta i e barvalimake.”

¹⁴ E fariseura, kai volina but e love, kana asunde sa e orba ta marde espurnia e Jesusetar.

¹⁵ A o Jesus ppenda lenge: “Tumen cheren tumen chache angla e llene, a o Del pinllarel tumare lie; soke so e manusenge si kuch, e Devleke ni mol le niso.

O zakono ta e charoina e Devleki

¹⁶ “O zakono ta e poraukura resen llik kai o Juan. Ta sar kotar ppendol e lachi viasta katar e charoina e Devleki, ta sa cheren zor te den andre.

¹⁷ “Mai lesno si te na avel ios o miloso ta e ppuv, neko te na cherdol e ezgoda mai minoni kai si pisime ando zakono.

So sikavela o Jesus kana mangen te mukenpe

¹⁸ “Iek lleno te mukelpe katar pi romi ta te zinilpe averiaia, cherel kurvaluko, a gua kai zinilpe iekke mukliaia, i vou cherel kurvaluko.

E paramichi katar o barvalo ta o Lasaro o chorro

¹⁹ “Saia iek lleno barvalo, kai ttovela pe pete patave lache ta barikane ta suako llive cherela iek glamno jape.

²⁰ Saia i iek lleno chorro kai ikkardola Lasaro, ta leko mas saia sa chindo ta besela pe ppuv angla o udar e barvaleko.

²¹ Gava lleno chorro mangela te jal so perela katar e sinia e barvaleki ta te pperel po lli; ta e llukela avena te charran o chindipe katar leko mas.

²² Iek llive o lleno chorro mulo, ta e suechura inllarde le te besel te jal pasa o Abraam. Mapalal i o barvalo mulo, ta prajosarde le.

²³ “Ta kana o barvalo patilape kote kai llan e llene kai maren, dikkla upre ta dikkla duratar e Abraame ta e Lasaro kai besela pasa le.

²⁴ Ondaka urkisarda: ‘¡Dade Abraam, te avel chuke zalba mandar! Bichal e Lasaro te chingarel po nai ando pai ta te sudravel mi chib, soke nakkau bari patnia ande gaia iag.’

²⁵ A o Abraam ppenda leke: ‘Chavea, de tut golli kai kana sana llundo lian o lachipe kai perela tut, ta o Lasaro lia o bilachipe kai perela le. Akana vou lel o lachipe kate, ta tu nakke patnia.

²⁶ Ta i maskar amende ta tumende si iek bari jar; ta gola kai mangen te nakken katar incha, nasti cherenle, ni okotar nasti nakken karinga.’

²⁷ “O barvalo ppenda: ‘Dade Abraam, mangau tutar te bichale e Lasaro kai me dadeko cher,

²⁸ kote si man panch pplal, te del pe lende, ta gia te na aven i von pe gava ttan e dukkengo.’

²⁹ O Abraam ppenda leke: ‘Len ia si so pisisarda o Moises ta e poraukura: ¡cheren so si pisime!’

³⁰ O barvalo ppenda: ‘Dade Abraam, ni resel samo golea; a te ustel iek mulo katar o meripe ta te sikadol lenge, von irinape katar pe bilache droma.’

³¹ A o Abraam ppenda leke: ‘Te na mangena te cheren so ppenda o Moises ta e poraukura, ni ka pachan ni te ustel katar o meripe iek mulo.’ ”