Lukas 13 - Nuevo Testamento Romané 2007

Kein tumen ta ka zivin

¹ Isto ande gua vreme llele nesave llene te dikken e Jesuse, ta ppende leke kai o Pilato bichaldaia te mundaren bute llenen kai sea katar ppuv katar e Galilea. Gaia ezgoda avilape kana von dena kurbano e Devleke.

² O Jesus ppenda lenge: “¿Tumen mislin kai gala llene Galileura von mule soke sea mai bilache neko ogola llene katar lengo foro?

³ Ppenau tumenge kai iok; a i tumen te na irisailen kai o Del, i tumen ka meren.

⁴ ¿A so mislin kai gola desojto kai mule kana o cher katar o Siloe pelotar upral pe lende sea mai dosale neko ogola kai zivina ando Jerusalem?

⁵ Ppenau tumenge kai iok; a i tumen te na irisailen kai o Del, i tumen ka meren.”

E paramichi katar o kas simochinengo kai ni dia simochine

⁶ O Jesus ppenda lenge gaia paramichi: “Iek lleno saia le iek kas simochinengo kote kai bariarela e drakka, ta llelo te dikkel dal sea simochine po kas, a ni malada ni iek.

⁷ Ta ppenda e lleneke kai arakkela e drakka: ‘Cheren trin burs kai me avau kai gava kas pala e simochine, a nikada ni maladem ni iek. Chinle, soke samo gia si ttodo ande ppuv.’

⁸ A o lleno kai arakkela e ppuv ppenda leke: ‘Gazda, mukle gava burs; ka mukliarau e chik kai si truial letar ta ka ttovau gosnia ande ppuv.

⁹ Golea sai del simochine; a te na dia, ondaka chinle.’ ”

O Jesus ando llive sabado sastarel iekke diskinia nasuali

¹⁰ Iek llive sabado o Jesus sikavela ande iek kkanlliri e judionengi;

¹¹ ta kote saia iek diskinia kai saia nasuali desojto burs. Iek duo bilacho muklaia lake zea bange, ta nasti ortolape.

¹² Kana o Jesus dikkla la, ikkarda la ta ppenda lake: —Chei, ia san sasti katar cho nasualipe.

¹³ Ttoda pe va upral pe la, ta isto kote e diskinia ortosaili ta ttoda te blagosil e Devle.

¹⁴ A o gazda katar e kkanlliri e judionengi jolailo, soke o Jesus sastarda la ando llive sabado, ta ppenda e llenenge: —Si sou llive te radi; aven ande gola llivesa te aven sastarde, a na ando llive sabado.

¹⁵ O Gazda ppenda leke: —Kojamnalen, ¿vareko tumendar ni putarel pe guruve ta pe magarche ando llive o sabado, te inllarel le te piel pai?

¹⁶ Gaia diskinia kai si katar e vicha e Abraameki ta kai o Satanas ppanglaia la gale nasualimaia cherel desojto burs, ¿saia te na sastardol makar avela ando llive sabado?

¹⁷ Kana o Jesus dia goia orba leke dusmanura achile ando lallao; a sa e llene veselinape kana dikkena e bare ezgode kai vou cherela.

E paramichi katar e simicha mostasaki

¹⁸ O Jesus ppenda: —“¿Pe so mizil e charoina e Devleki ta prema so sai ppene kai si?

¹⁹ “E charoina e milosoki si sargo e simicha katar e mostasa kai iek manus lia la ta ttoda la ande chik katar pi umal, ta cherdol sargo iek kas, gia baro kai e chiriklia cheren pe kuibura pe leke krangura.”

E paramichi katar e levadura

²⁰ O Jesus ppenda: “¿Pe so mizil e charoina e Devleki?

²¹ E charoina e Devleki si sargo e levadura kai lia iek diskinia ta ttoda la ande iek umpa arina ta sa goia arina ppukkili.”

O udar tanguno

²² Kana o Jesus llala karing o Jerusalem, sikavela ande forura ta ande forichura katar vou nakkela.

²³ Iek lleno puchla le: —Gazda, ¿cherricha si e llene kai ka braduin pe? Vou ppenda:

²⁴ —Cheren te den katar o udar o tanguno; soke ppenau tumenge kai but llene ka mangen te den, ta nasti ka cherenle.

²⁵ Kana o gazda e chereko ka ustel ta ka ppandel o udar, tumen, gola kai sen avri, ka maren po udar ta ka ppenen: ‘Gazda, putar amenge.’ A vou ka ppenel tumenge. ‘Ni llanau katar sen tumen.’

²⁶ Ondaka tumen ka ppenen: ‘Jalam ta pilam tuia, ta tu sikadan pe droma amare foroke.’

²⁷ A vou ka ppenel: ‘Ni llanau katar sen tumen. ¡Durion mandar, bilache llene!’

²⁸ Ondaka kote ka avel o roipe ta e bari dar, soke ka dikken e Abraame, e Isaake ta e Santiago ta sa e poraukonen ande charoina e Devleki, ta ka dikken sar sen chudine avri.

²⁹ Soke ka aven llene katar suako rig, te besen te jan ande charoina e Devleki.

³⁰ Ondaka nesave llene kai akana si palune ka aven e purve, ta nesave llene kai akana si e purve ka aven e palune.

O Jesus rovel cheres o Jerusalem

³¹ Ta i avile nesave fariseura, ta ppende e Jesuseke: —Llatar katar, soke o Erodes mangel te mundarel tut.

³² Vou ppenda lenge: —Llan ta ppenen gole lisichake kai: ‘Allive ta ttiara ka tradau e llavolonen ta ka sastarau e nasualen, ta kai aver ttiara ka getosarau.’

³³ A allive si te ppirau, ta ttiara ta i aver ttiara, soke inai sukar te merel iek porauko avri katar Jerusalem.

³⁴ “¡Jerusalem, Jerusalem, kai mundare e poraukonen ta chalave e barrenchar e llenen kai o Del bichalel chuke! ¡Pe gachin droma manglem te chidau che chaurren, gia sar e kkañi chidel pe pilichonen telal tala pe pakka, a tumen ni kamlen!

³⁵ Asunen, tumaro cher ka achel pusto; ta ppenau tumenge kai ni ka dikken man pale lligo ni ka avel o vreme kai ka ppenen tumen: ‘¡Blagosime gua kai avel ando anau e Devleko!’ ”